Read Tobelo O AYUB 32 Bible Online

O AYUB 32 - Tobelo bible

O AYUB 32

¹Karana o Ayub duru wongaku ai diri itiai, done ai hobata yaruange gënangö yoluku iwibaluhu ünanga.

²Mä gënangoka naga womatengo ai romanga o Elihu o Barekheel aingohaka, womatengo o Bus aidifauku o Ram ai ahalino. Unanga wakunua watumungu ai dohata, karana o Ayub watiai ai diri mahirete deʼ wihihowono ma Jou Madutu.

³Unangö wängamo o Ayub ai hobatika yaruange gënanga karana önanga yakunua yalawani o Ayub ai demo-demo, ngaroka önanga iwihihowono.

⁴O Elihu duru woma göikahi toönanga manga hidogoronaka, hababu gënanga ünanga wodamä hiädono mata-mata yotemo iböto.

⁵Wamake o nyawa yaruange gënanga ibötino yakunua yahaluhu, ünanga wongamo,

⁶deʼ wotemo hoko nënanga, ”Ngohi kato göohi enahioko ngini nibaluhoka, hababu gënanga ngohi tohawana deʼ tododato tohihimanga ahidamake.

⁷Tapikiri, ngini kokiani nitemo-temo, iholoi wotimono kiani wohikodoku ai barija.

⁸Mä wohidoa-doaka o barija o nyawaika, duga-duga ma Jou Madutu Woko Kuaha ai Womaha.

⁹O nyawa idadi yobarija, karana manga umurua ikurutu; o nyawa imangarati madiai, karana manga umurua magurutil̄e.

¹⁰Hababu gënanga, nihihigihene ngohi; nihihi gumal̄a ngohi ahidamake tohidemo.

¹¹De ahisabari ngohi toihene maöraha ngini nitemo-temo, deʼ todamä maöraha ngini nialingiri o demo-demo i sosawaro.

¹²Tohohininga de madiai; toihene ngini niamake nihasilua. O Ayub ai demo-demo mahowono magoronaka ngini ni akunua nihi nyata.

¹³Sarakia ngini yakunu nitemo o barija ngini nia makeoka? Karana pakisa ngini nimahidoaka. Yakunu iwi baluhu o Ayub duga-duga ma Jou Madutu.

¹⁴Nginiika o Ayub wini temo-temo, deʼ ngohinoua, mä ngohi aha tohidoakua o bobaluhu hokä ngini.

¹⁵Ayub, önanga ima hiorikokaua deʼ yakunua ihidöaka mabobaluhu; okiaua önanga yakunu yotemo.

¹⁶Onanga kaimaokoino dika, yakunokaua yotemooli. Kokiani ngohi tadamä ngaroka önanga ima rirïdoka?

¹⁷Kowali, öraha nënanga aha tohidöaka mabobaluhu; ahi damake aha tohidöaka.

¹⁸Tosabarokaua ngohi totamä. Takunokauaoli tatumungu ahi demo-demo.

¹⁹Nako ngohi tomarirïdoka dika, aha ngohi topooteke, hokä o kadu-kadu iomanga deo angguru mahungi.

²⁰Ngohi kiani totemo, hupaya ahi hininga irïdi, ngohi kiani tahelenga ahi uru deʼ tohidöaka o bobaluhu.

²¹O nagonaö aha tahiböa o ributu nënanga magoronaka deʼ moiuaö aha tahigogiriri.

²²Madodagi yägora-gorakaö ngohi tohiorikua, deʼ hohiade ngohi todiai gënanga, ma Jou Madutu aha dema japatioka wohi hukumu ngohi.