Read Tobelo O AYUB 33 Bible Online

O AYUB 33 - Tobelo bible

O AYUB 33

¹O öraha nënanga, hei Ayub, noihene demadiai o demo-demo tomau tohiädono nënanga.

²Ngohi toma hidiaioka tomau totemo-temo.

³De ahi hininga iriko-rikoto ngohi totemo; totemo ganga madiai.

⁴Ma Jou Madutu Ai Womaha ihihidadioka ngohi deʼ ihidöaka o ngango ngohino.

⁵Ho, nako iyakunu, nohi baluhu ngohi. Nohidiaino noma demo ani bobaluhu.

⁶Mangale ma Jou Madutu, ngona deʼ ngohi homahowonua o tonaka matau-taulino ngone wonä tuuku.

⁷Ho, ngarouha nohimodongo ngohino, ngohi ahidungutua tonihohininga.

⁸Aa, toihenoka okia notö temo-temo, deʼ ngohi tomangarati okia anidungutu.

⁹Ngona notemo, ”Ngohi totebini, tadiaiua ilara-laranga. Ngohi koiwa ahikuranga deʼ tadiaiua o howono.

¹⁰Mä ma Jou Madutu wolingi-lingiri o titi wohilawani ngohi, deʼ wohihidiai ngohi hokä o haturu.

¹¹ Unanga wohipake o rante ahil̄ouika; deʼ wogoana hagala ahi gokoil̄e de ahi gogeruku.

¹²Hei Ayub, anidamake ihowono mata-matauku! Hababu ma Jou Madutu iholoi wolamoko ngaro deo nyawa.

¹³Yadodoa ngona ningelo ma Jou Madutu Unanga wolegaikaua o nyawa manga hininga maböaka.

¹⁴Ma Jou Madutu wotemo-temo de madodagi irupa-rupa, mä moiuaö yohohininga Ai demo.

¹⁵ Enahioko o nyawa imä idu manga nihu-nihuku maöraha o hutu-hutu, o nanere deʼ o lolega magoronaka, ma Jou Madutu wotemo.

¹⁶Ma Jou Madutu wähuloko önanga ihigihene; wätodokana önanga deo dodaaere-o dodaaere.

¹⁷Ai dungutu hupaya önanga imatogumu yobaradoha, deʼ yamal̄a toönanga manga edenge.

¹⁸Wamal̄aikaua önanga yamake o bodito; wagoana önanga de honengino.

¹⁹Ma Jou Madutu wataaere o nyawa de wädotagao o panyake hiädono manga röehe iomanga yamao mahiri.

²⁰Wopopanyake ai nahihu wol̄omo ihihanga, o inomo duru mahemo-hemoro makawohingunanga.

²¹Ai röehe idadi yapelelaka kohagiria, ai kobo-kobongo mata-mata kahapulonika.

²²Unanga ngadeke wolioka o alami ikokakaliika o nyawa yohone-honenge manga dunia itigioka unangika.

²³Kaiyakunu moi ma Jou Madutu Ai malaikat yaribuhu moi manga hidogoronaka wohidöaka o hohininga mangale o nyawa ai manarama, aha woböa wiriwo ünanga.

²⁴De ahihininga madora o malaikat gënanga aha itemo, ”Niwipidili ünanga, yakunua ünanga wouti o nyawa yohone-honenge manga duniauku. Nenanga ai duduhuku matiwi, hupaya ünanga wobebasoli.”

²⁵Ai röehe aha idadi ikuata ibarani madirihi hokä o nyawa yo gö gö.

²⁶Nako ünanga womä niata, ma Jou Madutu aha widora, done ünanga aha wihigiriri ma Jou Madutu de ai morene deʼ ma Jou Madutu aha wohigilio ai wowango hokä ihira-hira.

²⁷Done o nyawa yowöe-wöe manga himangoka ünanga aha wotemo, ”Yatotorou tapulono yaoa, ma amoko ahi baradoha, mä ma Jou Madutu wohihukumua ngohi.

²⁸Ma Jou Madutu wohi tatoko ngohi töiki o nyawa yohone-honenge manga duniaika, hiädono öraha nënanga ngohi katowangohi.

²⁹De kawogogilio, ma Jou Madutu wadiaioka mata-mata nënanga,

³⁰hupaya ünanga wakunu wahihalamati o nyawa deʼ wohidöaka o utumu manga ngango magoronaka.

³¹Done noihene Ayub, nohidakunu aningauku nomarïdi, öraha nënanga ngohi totemo-temo.

³²Mä nako naga nomau notemo, ika notemo; deʼ nako ngona itiai, ngohi aha toigo tohigoungu.

³³Mä nako kowali, nomarïdi deʼ nohihigihene ngohi, ngohi aha tonïdotoko o barija ngonaika.