Read Tobelo O AYUB 34 Bible Online

O AYUB 34 - Tobelo bible

O AYUB 34

¹Koigoungua ngini nisawaro deʼ nia akali maoa-oa? Aa, niihene hagala ahidemo nënanga.

³O nyawa ihiöriki o inomo ihemoro nako yajame, deʼ o barija mademo-demo nako yoihene.

⁴O hali nënanga kiani ngone hatailako daha ngone homakinïki hahohe.

⁵O Ayub wato, ’Koiwa o howono ngohioka mä ma Jou Madutu woluku wohihidöaka okia iadi-adili ngohino.

⁶Ngohi ihipulono toeluku, karana totemo ngohi tobaradohaua. O öraha nënanga ngohi ahinabo mangöe ma ago-agomo ngaroka ngohi tahowonua.’

⁷Mamoi iböto ngini niämake o nyawa hokä o Ayub nënanga? Unanga wihohedu ma Jou Madutu wohi gali-gali.

⁸Unanga woigo imateke dodiawo de hagala o nyawa yososetiaua ikali ima kaganu deo nyawa madorou.

⁹Unanga wotemo, kaparahaja dika nako ünanga wohidailako wadiai ma Jou Madutu Ai mau.

¹⁰Hei hagala o nyawa yobobarija, niihene! Kiaka yato, ma Jou Madutu Duru Woko Kuaha wodiai o howono?

¹¹ Unanga wähukumu o nyawa imadaene ai manarama, wihidiai ünanga imamoteke ai kalakuanga.

¹²Ma Jou Madutu Duru Woko Kuaha wodiaiua o dorou; mata-mata o nyawa wahidöaka o adili.

¹³O nagonaino ma Jou Madutu watarima Ai kuaha? O nagona iwihigogoana o dunia nënanga Unangika?

¹⁴Hohiade ma Jou Madutu warahuku o nyawa manga jiwa, deʼ wal̄ëokali ai ngango mawomaha,

¹⁵done o dodadi mata-mata dema jiwa i honenge, deʼ o nyawa yodadi o kafo hokä mahira.

¹⁶Aa, nako ngona nosawaro, nohohininga, nohidakunu ani ngaku deʼ noihene.

¹⁷Boteka ma Jou Madutu woadi-adili deʼ wonau-nauru gënanga nihihowono? Boteka natobote ma Jou Madutu wodohata o adili?

¹⁸Ma Jou Madutu wähukumu o koano deʼ yokokuaha nako önanga itorou deʼ yosetiaua.

¹⁹Unanga wahiböaua o kokoanoika, ekola wagorakil̄e o kaya manyawa ngaro deo mihikini manyawa. Karana önanga mata-mata ganga Ai dodadi.

²⁰O hutu gorona, itodokanino önanga yakunu yohonenge. Ma Jou Madutu wahukumu yokokuaha deʼ onangö yobinaha; dema gapanga Wätoma o nyawa yonau-nauru.

²¹Unanga wögoana o nyawa manga ngango, Wolega-lega hagala manga aguru.

²²Koiwa o huhutu, hokokiaö mahaiti, yakunu imangiunu o nyawa baradoha.

²³Iparaluua ma Jou Madutu wohitantu ai öraha, o nyawa yoböa mangale Wä adili.

²⁴Woma dotokua deʼ watailakoua Unanga wäaiki yokokuaha deʼ wägoraka manga dagali.

²⁵Hababu, Unanga wohiöriki okia önanga yadiai; done Unanga wälulu deʼ wäwedere önanga maöraha o hutu-hutu.

²⁶Onanga wäpoka karana toönanga manga baradoha, o nyawa yo wöe-wöe manga himangoka önanga wähukumu.

²⁷Hababu, önanga ihingounua Ai mau deʼ yahaduliua hagala Ai pareta.

²⁸Onanga idadi hababu o mihikini manyawa yoliwolu de yotaiana toönanga manga gari woihene ma Jou Madutu.

²⁹Nako ma Jou Madutu waputuhu mangale womarirïdoka dika, moiua aha yobarani iwïngelo. Nako Unanga wagogono Ai biono, moiua o yakunu iwimake.

³⁰Done hagala o hoana deo berera manyawa imasikaua, mangale yätatoko yätuku itotorou yakuaha.

³¹Ayub, boteka anibaradoha ma Jou Madutuika nomangakuoka? Ngona nojajioka aha nobaradoha okauaoli?

³²Nogahokoka hupaya wonihidumutu anihowono? Ngona nokobotoka namal̄a o manarama gënanga?

³³Kiaka yakunu ma Jou Madutu aha watarima okia nonö nahihu ma Jou Madutu Ai manarama nohi goungua? Oraha nënanga, ngona kiani naputuhu, ngohiua. Nahetongo okia anidamake!

³⁴Mata-mata o nyawa yososawaro maraioka aha ihi goungu; o nyawa yobobarija ihigihene ngohi aha totemo.

³⁵O Ayub wotemo womangaratiua, deʼ ai demo madol̄a koiwa mamangarati.

³⁶Nako o Ayub ai demo-demo hatailako hohidodiai, aha inyata ai ade-ade hokä o nyawa madorou.

³⁷Ai howono wodogooli de moi o baradoha; ünanga womalawani ma Jou Madutuika, deʼ wihikauku tongone nanga himangoka.