Read Tobelo O AYUB 36 Bible Online

O AYUB 36 - Tobelo bible

O AYUB 36

¹Noihene kabötinookahi, deʼ nosabari, kanagahi tomau totemo de ma Jou Madutu.

³Ahi ganako iamokika; aha tohibaraguna gënanga mangale tohinyata ahi Dodadi woadili.

⁴Ahi demo koiwala madutua; o nyawa igoungu yososawaro naga anihimangoka.

⁵Ma Jou Madutu gënanga woputurungu! Hagala moi-moi Wanako. Moiua o nyawa iwipulono okia-kiaua iwidaene.

⁶O nyawa baradoha wämal̄aikaua yowango yotedekana, Unanga wahidöaka o adili o nyawa yohohangiharaika.

⁷Hagala o nyawa yoriko-rikoto Wä hohininga, Wadiai önanga yokuaha hokä o kokoano, hiädono önanga yahoromati kahiado-adonika.

⁸Mä nako o nyawa yaalara deo rante o behi watagongo o hangihara ai manarama mahirete mahasili,

⁹done toönanga manga baradoha deʼ manga edenge ma Jou Madutu aha wahelenga.

¹⁰Wahuloko önanga ihigihene Ai hitoilingi deʼ yamal̄a toönanga manga dorou.

¹¹Nako önanga iwimoteke ma Jou Madutuika deʼ iwipuji Unanga, önanga yowango idame deʼ makuranga koiwa hiädono manga ngango mabaha.

¹²Mä nako önanga ihigihenua, önanga aha yohonenge manga bodo magoronaka.

¹³O nyawa koö iwa-iwa manga jou yagogono o dohata; mal̄aika ma Jou wähukumu, önanga yoluku yogahoko o roriwo.

¹⁴Onanga yohonenge imasikaua maöraha imägöika, karana manga wowango iomanga o hikauku.

¹⁵Ma Jou Madutu wädotoko o nyawa deo hangihara, Unanga wapake o huha mangale wihimamao.

¹⁶Ma Jou Madutu wonihibebasoka ngona o hukarangino, hiädono ngona yakunu namao irirïdi, deʼ ani inomo mameja ioma-omanga o inomo.

¹⁷Mä o öraha nënanga imamoteke de anidorou, ngona natarima anihukumanga.

¹⁸Nomahidodiai, uha ngona initipu mangale o uru bokumu ma tiwi; uha ngona norehene karana okaya.

¹⁹Kaparahaja dika ngona nopöaka nogahoko inibatumu, parasuma hagala anibuturungu deʼ anikuata.

²⁰Uha nömau o hutu mahohuhutu, o hoana deo berera manyawa manga öraha yobinaha deʼ yohihanga.

²¹Nomahidodiai, uha nomaidulu nososetiauaika. Ahi hangihara madungutu hupaya namal̄a o dorou.

²²Nohininga, ma Jou Madutu gënanga igoungu Ai kuaha i lamoko. Naga o guru duru wosawaro hokä Unanga?

²³O nagona yakunu ihitantu o ngekomo Unangika? Ekola yobarani iwikalaki wodiai o howono?

²⁴Salalu Unanga iwihigiriri karana Ai gao-gao, deʼ ngonaö kiani Nigorakil̄e.

²⁵Mata-mata o nyawa yamake Ai manara; mä moiua igou-goungu yamangarati.

²⁶Ma Jou Madutu igoungu womulia, ngone hakunua hodumunu ekola haetongo mangöe Ai taongo.

²⁷Ma Jou Madutu watauru o akere o duniaino idadi o lobi daha wangali idadi o awana maakere madututu.

²⁸Unanga wapuraraha o awana o dihangoka de yauku wahi tuagi o umati o nyawa manga l̄okuuku.

²⁹Moiua imangarati hagala o lobi madodagi ikali o dotereke mailingi o dihangoka o ngï ma Jou Madutu wogogogere.

³⁰Unanga watararono o dihanga yamode-modekika deo leletongo, mä o ngöto mabuku-bukuuku kahirahi mamohuhutu.

³¹Genanga madodagi Unanga wahiwango o hoana deo berera manyawa, deʼ wahidöaka o inomo mangöe demaboloioka.

³²Unanga wätagoko o leletongo de Ai giama deʼ wahuloko yautuku Ai dumutika yakokorona.

³³O dotoreke mailingi manonako o rato aha iböa, o aiwani o giginö maihiöriki o rato dema japati imahiädono.”