Read Tobelo O AYUB 37 Bible Online

O AYUB 37 - Tobelo bible

O AYUB 37

¹O rato yadiai ahihininga ihahara deʼ ahihuo iuti-doa.

²Niihene ma Jou Madutu Ai ilingi, hei ngini mata-mata; niihene o dotoreke ihupu Ai uruiha.

³O dihanga yamode-modekika, wodipidili Ai leletongo; wohidingoto Ai dotoreke o dunia mabati-batingika.

⁴Ipaha, hoihene Ai ilingi maruruhu, o dotoreke deʼ o leletongo mailingi ma amokil̄e; deʼ mailingi ipopotoka mahidogoronaka, o leletongo iletongo imakokepeleke.

⁵Karana ma Jou Madutu Ai pareta, done idadi ihö hera-heranga, hagala o hali ihera-heranga hakunua ngone homangarati.

⁶O domoata itifa o duniauku mangale Ai pareta; o awana iriki-rikimi iuti mangale Ai huloko.

⁷Wä togumu o nyawa manga karajanga, hupaya önanga ihiöriki Unanga magogiria wokarajanga.

⁸Hoko genangö o aiwani ihü huhuku iwohama o pidaha deʼ o aruku magoronaika, deʼ ima hohongo maigutu magoronaka.

⁹O korehara de yauku ihupu o rato deʼ o koremie de yail̄e o dumamata yaparono.

¹⁰Ma Jou Madutu Ai Womaha yatokoru o akere mal̄okuino malua-luasika, yangali idadi o es madodogowini.

¹¹O lobi wohigina deo akere, deʼ o lobi iletongo yatararono o leletongo.

¹²Hagala o lobi imahaili o dunia yamode-modekika, mangale ma Jou Madutu Ai pareta ënanga imakelu okiaika honanga.

¹³Ma Jou Madutu wohidöaka o awana mangale yapehaka o tonaka, ekola mangale wähukumö o umati o nyawa; mudukuaö mangale wahimatoko onangika, hokokia maamoko Ai dora kahirahi mangale kahiado-adonika.

¹⁴Nomarïdi o örahautu, hei Ayub, deʼ noihene; nohohininga ma Jou Madutu wadiai ihöra-heranga.

¹⁵Nohiöriki ngona sarakia ma Jou Madutu wohidöaka o pareta, hiädono o leletongo yodararono o lobi deʼ o kamo-kamoroka de yauku?

¹⁶Nohiöriki ngona sarakia hagala o lobi ihaili, ma Jou Madutu wanako mata-mata mahasili hoinä heranga?

¹⁷Kowali, ngona duga-duga yakunu notaiana mahauku nako o dunia yaparono o hidal̄oko o korehara.

¹⁸Yakunu ngona hokä ma Jou Madutu nohihoheika o gitawa, deʼ natogowini hokä o gurasi deo haaka yaö ui-uihi ekola o kahina?

¹⁹Nomi dotoko ngomi kiani ngomi mitemo ma Jou Madutuika; koiwa yakunu ngomi mihitararono, tongomi miapikiranga kao homoa.

²⁰Toluku ngohi togahoko toade-ade ma Jou Madutuika, uha-uha Unanga wamake o hababu wadiai ngohi tobodito.

²¹O öraha nënanga o dihanga maletongo duru kohadararono hiädono nanga lako yamal̄eke; o hidal̄oko dema wuwu yatebini o gitawa.

²²O dararono magogurati ipuda o koremieuku, deʼ ma Jou Madutu Ai mulia yaheranga tongone nanga hininga.

²³Igoungu tongone nanga Jou Madutu Ai kuaha ilamoko; hakunua ngone homahitigi Unangika, Unanga worikoto deʼ woadili hokogenangika; komaiwahi Unanga wätuku o nyawa.

²⁴Genanga mahababu Unanga kokiani iwi horomati mangale o nagona dika, deʼ o nyawa imangaku yosawaro Walegaikaua.”