Read Tobelo O AYUB 38 Bible Online

O AYUB 38 - Tobelo bible

O AYUB 38

¹Ipaha o rato magoronaino ma Jou witemo o Ayubika, hoko nënanga:

²”O nagona ngona, hiädono nobarani nododato Ahi barija, deʼ anidemo-demo ibodo deʼ koiwa madol̄a gënanga?

³O öraha nënanga, nöhihimanga Ngohi hokä o nauru, deʼ nobaluhu o loleha-o loleha nënanga.

⁴Nagaka ngona maöraha o dunia Tohidiai? Nako i goungu aniganako i amokika, nohingahu!

⁵O nagona ihitantu maamokika o dunia? O naguna wodauru o duduga magumini enangika? Ngona nohiöriki mabobaluhu?

⁶Sarakia o dunia madidiki maliate-liate imaoko ibitumu? O nagona yogelenga o dunia malibuku mahelewo dema kuata,

⁷maöraha hagala o murumu o ngorumino inyanyi imakokinïki deʼ o horoga madodadi-dodadi imä uli-ulili imorene.

⁸ O nagona yabeno o ngorana mangale yatatoko o ngöto maöraha o dunia mamamataino ihuaele ihupu ma akere?

⁹Ngohi tatamunu o ngöto deo lobi deʼ tahawo deo huhutu.

¹⁰Ngohi tohitantu mabatingi mangale o ngöto ilago-agomo dede o ngorana madödudukuroka ngohi tohitatoko.

¹¹Tatemo enangika, ”Nënanga mabatingi uha natilakuru! Nenangoka hagala animoku-moku ikö kua-kuata kiani imatogumu.”

¹²Hei Ayub, mamoi iböto ngona bote iti mamoiani, nahuloko o ngorumino iböa?

¹³Mamoi iböto ngona nahuloko ibatingoka yasö o dunia deʼ nähurero o nyawa madorou toönanga manga ngï ima ngiu-ngiunino?

¹⁴O wangeoka madararono ihimatoko de madiai o l̄oku deʼ o wai hokä o sapu o tonaka matau-taulika deʼ madupukoro o juba moika.

¹⁵O wangeoka madararono duru kohamodararono mangale o nyawa koiwa-iwa manga Jou, deʼ yätumungu önanga yodiai dema pakisa.

¹⁶Mamoi iböto ngona nouti o ngöto matitiuku, magurutukudau mabuku-bukuku? Mamoi iböto ngona notagi-tagi o ngöto maamo-amoko mal̄okuika?

¹⁷Mamoi iböto o nyawa inihi dumutu ngonaika o ngorana maamo-amoko o honenge maalami ihöhohuhutu mahimangoka?

¹⁸Iyakunu ngona natuga o dunia maamokika? Nohaluhu nako ngona nohiöriki.

¹⁹Ngona nohiöriki okiaka de yaino o dararono, deʼ madiai okiaka o huhutu matiti?

²⁰Yakunu ngona nohitamtu mabatingi o huhutu deʼ o dararono mahidogoronaka, ekola yoböainoka denä huloko önanga yolio?

²¹Maraioka ngona nakunu, karana ngona initimonoka, deʼ maöraha o dunia ihi dadi, ngona nagaoka!

²²Mamoi iböto ngona nolega hagala Ahi gudang mangï o domoata deʼ o awana o helewo,

²³tagogono mangale o hukaranga maorahoka, mangale maöraha o parangi deʼ hagala o wange imateke parangi?

²⁴Ngona nohiöriki o wange matiti mangï? ekola okiaino maahali o wange mahiwara mahidal̄oko?

²⁵O nagona yofaiti mangale o awana iriki-rikimi maheli-heli deʼ nohidöaka o ngekomo mangale o dotoreke deʼ o leletongo?

²⁶O nagona ihiguti o awana o tonaka makokakaha mal̄okuuku, deʼ o tonaka yogogogerua o nyawa mal̄okuku?

²⁷O nagona yatuagi o dunia madüdudungu deʼ ipopelelaka, hiädono o momo itori mata-mata?

²⁸Boteka o awana toënanga dema ama madutu? O nagona ma ama hagala madututu o dumunitara maakere?

²⁹Boteka o es maakere de toënanga ma ayo? O nagona ihingohaka o dumunitara madokoru?

³⁰O nagona yangali o akere idadi o helewo, deʼ o nagona yadiai o ngöto mal̄oku idadi itogowini?

³¹ Yakunu o pariama mamurumu maliliko nohidotoomu? ekola o loahange mamurumu manahohe?

³²Yakunu natuda hagala o murumu maorahoka magetongo, deʼ o kalulu mamurumu mapako-pako deʼ maiteteke, nohi tantu mangekomo?

³³Nohiöriki ngona hagala o hukumu o gitawaoka? deʼ yakunu ngona nohipake o duniaoka?

³⁴Yakunu ngona nohi böaka o pareta o lobika, deʼ nahuloko inidunguihi deo awana?

³⁵Deʼ nako ngona nahuloko o leletongo-leletongo imakokuutuku, boteka ënanga iböa deʼ itemo, ”Ngohi, Tuanga!”?

³⁶Okiaino o totaleo o ibis ihiöriki muruonoka o Nil ma Ngairi aha iolu? O nagona ihingahu o kuru-kuru manauru o awana aha iböa?

³⁷O nagona iyaoaka manga sawaro mangale yaetongo o lobi deʼ waidulu hiädono iuti o awana,

³⁸o awana yatogowini o kafo idadi ipopupuka deʼ o tonaka idadi imakokataulino?

³⁹Iyakunu ngona nodagoko mangale hagala o singa mainomo deʼ nohipunuhu mangoha-ngohaka mamamata,

⁴⁰maöraha okia önanga imahohongo o aruku magoronaka ekola ima modukuku maigutu magoronaka?

⁴¹O nagona yabatumu o totaleo o wogono yahöhahahini, deʼ imahikabarihika yakaika yakaino imalingiri o inomo? O nagonaoli ihidöaka o roriwo maöraha mangoha-ngohaka ipöaka ngohino igahoko o inomo?