Read Tobelo O AYUB 39 Bible Online

O AYUB 39 - Tobelo bible

O AYUB 39

¹Ngona nohiöriki o öraha okia ol̄okuika makabingi maayo dei ngohaka? Mamoi iböto namake o maijanga ihuhuhuku ihingohaka mangohaka?

²Ngona nohiöriki hokokia madekana ënanga iröehe? Maöraha ingohaka ngona yakunu nogetongo?

³Ngona nohiöriki o öraha okia maröehe yaiduiha, imatupukoruku, daha ihingohaka mangoha-ngohaka?

⁴Mangoha-ngohaka idogo ilamoko deʼ ikuata o tonaka ma kokakahaka; ënanga ioiki deʼ iliookaua maayoika.

⁵O nagona yapidili o keledai ihühuhuku o honganoka? O nagona yahohe maliliko deʼ yamal̄aika ënanga imahikabarihi?

⁶Enangika tohidöaka o tonaka ilua-luasi hokä matau o gahi matonaka malua-luasika mangale mangï yogogere.

⁷Enanga imahikurutika hagala o kota deʼ marame, yakunua yadana deʼ ihikarajanga.

⁸O momo matonaka malua-luasika ol̄okuoka mainomo mangï, imalingiri o dori maijo-ijo dokengoka.

⁹Boteka o hapi o huhuku imau imanarama mangale ngona? Enanga imau imä idu anikurunga magoronaka?

¹⁰Kaiyakunu naliko ënanga deʼ napakisa ipajeko mangale ngona? Kaiyakunu nahuloko ënanga yaihara anidumule?

¹¹Kaiyakunu nangaku maröehe ikua-kuata, deʼ nohi lapahi enangika ani karajanga itö totubuho?

¹²Boteka nangaku ënanga yätoomu anigugutuku, deʼ yao nahido-hidoro mangïika?

¹³Hokokia majapati imahi tatal̄oko o totaleo o onta magahuhu! Mä o totaleo o huweko ihoho yakunua imatero.

¹⁴O totaleo o onta igohi o tonakoka, daha yodogumal̄aika; done o dowongi aha yahauku magohi.

¹⁵Enanga yamaoua maraioka o nyawa yadoko deʼ hagala o aiwani ihü huhuku yadoko.

¹⁶Enanga majako matero-tero toenangua mangohaka madutu; ënanga ihaduliua nako mahidailako kaparahaja dika.

¹⁷Ngohi tadiai ënanga ibodo deʼ ifuma, tohidöakua enangika o barija deʼ o akali.

¹⁸Mä nako ënanga imulaenge imapopäta itaiti, ënanga yautumu o kuda ikali wobare-barenuku.

¹⁹Hei Ayub, ngona nohidöaka mabuturungu o kudaika deʼ mahorogono matomaruku igal̄o-gal̄oko?

²⁰Bote ngona nahuloko imatotubo hokä o kahoho, dei hanguru yähawa-hawana o nyawa?

²¹Enanga yaihara o tonaka o waioka dema morene deʼ makuata itö totomo ënanga iparangi o gangamo ma lapangoka.

²²Enanga yanakoua mamangarati idodato deʼ ihawana koiwa o oworo yadiai ënanga imadohuku.

²³O daë womahi huru-hurukuku wobare-barenuku magerenge deʼ maletongo yakorona o sahaya.

²⁴Dema kuata ihiru-hiru o kuda gënanga imapopäta; nako o trompet mailingi yakunua ënanga yatumungu madiri.

²⁵Enanga ihanguru o trompet yawuwu magetongo magurutokahi ënanga yaame o parangi mabounu. I ihene o tentara manga balu-baluhu manga böaka maöraha önanga ihidöaka o pareta.

²⁶Boteka o totaleo o kawihi nodotoko ihoho nako ënanga yameta o koreharail̄e dema gahuhu i refeika?

²⁷Ani pareta yanïki o totaleo o rajawali ënanga ima diaiuahi maigutu ol̄oku magogurutil̄eoka?

²⁸Ol̄oku o helewo matubuoka ënanga ihigoko matau; hagala o helewo mabarene madol̄o-dol̄omo idadi mabebeno o mehele.

²⁹Genangino ënanga malako ihi lega-lega hagala kiaika honanga ihidonga-donga yalingiri mainomo.

³⁰ Kiaka naga ihonenge, genangoka ënanga, deʼ mainomo ma awunu gënanga yaokere mangoha-ngohaka.