Read Tobelo O AYUB 41 Bible Online

O AYUB 41 - Tobelo bible

O AYUB 41

¹ Yakunu natagoko o gohomanga Lewiatan, duga-duga deo nawoko maguma moi? Yakunu maakiri naliko de hagala o gumini hohilöliko-liko?

²Yakunu ngona nohiliko o gumini mangunungika ekola o lalakete o behi maokokika?

³Boteka ënanga igahoko ngonaika mangale nohibebasi? ekola nimahikadatoro dede ngona, igahoko o hayanga deo dora?

⁴Iyakunu ënanga idiai irimoi dede ngona, deʼ nima jaji aha hoko genangika inïleleani?

⁵Iyakunu ngona naliko hokä o totaleo ipopaliara, yäsanangi o gogilaongo o ngoheka?

⁶Iyakunu ënanga yahukunu yolöleleaniika deʼ ihikodoku ima huku-hukunika manga hidogoronaka?

⁷Yakunu nahakara makai deo hohoba madoto hangeoka ekola natuduku ënanga deo kawai yatotara mahäeke?

⁸Natigi ënanga mamoi dika, deʼ aha kowalioka ngona nogilio; o parangi gënanga aha na wohangokaua kahiado-adonika.

⁹O nyawa moi-moi yamake o Lewiatan, aha idadi yabole daha yoruba yokiditoko.

¹⁰Enanga ihatera nako manga ngidu-ngiduoka de hatumomiki; moiuaö yobarani imaokoino mahimangoka.

¹¹ O nagona yakunu yaparangi yadaenua o bodito? O duniaka nënanga koiwa yakunu yadiai.

¹²Naino toniade-ade mangale o Lewiatan maröehe mahidoku, mangale makuata deʼ maduuku mahailoa.

¹³Moiua yakunu yakakihi mabaju maporetino ekola yatotara mabaju ihipoparangi yapö pake-pake.

¹⁴O nagona yakunu yahelenga mauru ikö kua-kuata, madol̄a maingi-ingiri homodo-modongo?

¹⁵Hokä o dadatoko imakokalapeil̄e, gënanga maporete, imahitataulu makekete, hokä o helewo madogowini.

¹⁶Imateke totapaluuku, imakiliko makekete, hiädono o hidal̄oko mayakunua imahingero iwohama.

¹⁷O dadatoko gënanga hoko gënanga makuata ima tamunu hiädono yakunua hohikitingaka.

¹⁸Nako o Lewiatan ihorene, ihohoropu majanga; malako mameletongo hokä o wange ipotoka.

¹⁹O uku madokara ihibarihi mauruiha; o uku mamurumu ihoropu okiaika honanga.

²⁰O nofo ikokapupu mangunungu magoronauku, hokä o gota hohidofo-dofo manofo o bohoko matimioka.

²¹Mawomaha ihiwango o ngaboho; o uku madokara ihupu mauruiha.

²²Matotö hoko gënanga makuata, hiädono mata-mata ikokihawana mahimangoka.

²³Koiwa o ngï yabole makaioka; yakunua ipooteke karana imatero madogowini deo baja.

²⁴Mahininga imatero mabitumu o helewo, yanakoua ibingu makuata deʼ madogowini hokä o helewo ihigogulinga.

²⁵Nako ënanga imomiki, o nyawa duru yokua-kuatö ma’ manga barani ihihanga, yadiai ima sikaokaua karana duru komanga hawana.

²⁶Koiwa o oworo yakunu yal̄abo; o kuama, o toimi ekola o kawai yakunua yahiri.

²⁷O behi yapulono imatero mamangaluhu o momo deʼ o tabaga mamobole imatero o gota mababiti.

²⁸Koiwa o toimi yakunu yaduhu ënanga; o helewo ihikokaweli enangika matero-tero o gandum maröehe madoolenge dika.

²⁹O boboha yapulono o momo madoolenge moi; ënanga i iete nako o nyawa ihituduku o gaawiti.

³⁰Ma unaha mamamataoka hokä o kahina mabelaka mabarene madol̄o-dol̄omo. Hokä o boboha mabobal̄ama ënanga ihitubalenge o peseke deʼ ihibelaka.

³¹O ngöto yakirotaka hiädono imahi rupa o akere ituha-tuhara; hokä o bohobehi ihihohakai o igono magohaka iabo-abo.

³²Enanga yamal̄aika mal̄ou mahoata mario kama leto-letongo, o ngöto yangali idadi iabo marupa kamagare-garehe.

³³O dunia mal̄okuoka koiwa imatero; o dodadi yanakoua o hawana, gënanga ënanga!

³⁴O aiwani duru imomuliaö yapulono okia-kiaua yadaene; hagala o aiwani ihohatere, ënanga ikoano.”