Read Tobelo O AYUB 42 Bible Online

O AYUB 42 - Tobelo bible

O AYUB 42

¹O Ayub wibaluhu ma Jouika, ”Ngohi tohiöriki, ya Jou, Ngona duru Nokokuaha; Ngona nakunu nadiai okia dika.

³ Ngona noleha yadodoa ngohi tobarani tododato ani barija, enahioko ngohi mahirete toma hiori-orikua. Ngohi totemo mangale hagala o hali tomangö ngaratiua, mangale hagala o hali duru iheranga ngohino nënanga.

⁴ Ngona nohi huloko ngohi tohigihene maöraha Ngona notemo, deʼ tohidöaka o bobaluhu nako Ngona noleha.

⁵Mahira, ahiganako mangale Ngona duga-duga toihene o nyawaino dika, mä öraha nënanga toni nako Ngona de obiono.

⁶Hababu gënanga ngohi ihimal̄eke tohininga hagala ahi demo deʼ tomatoduba ngohi togogere o kuhuhunu deo kafo magoronaka.”

⁷O Ayubika witemo-temo iböto ipahaino, ma Jou witemo o Elifasika, ”Ngohi toni ngamo ngonaika deʼ anidodiawo yahinotoika, karana ngini nihidemoua madiai mangale Ahidiri. Mä ahigilaongo o Ayub hoko genangua.

⁸Aa, öraha nënanga nial̄ë o hapi manauru o dutu tumidi, o duba o dutu tumidi, deʼ nioiki o Ayubika. Ipaha nihihuba mata-mata gënanga hokä o huhuba ituhu-tuhuku mangale nia diri. O Ayub aha womäniata mangale ngini deʼ ai niata aha Tatarima. Ngini aha tinihimal̄ekua, ngaroka ngini kokiani niatarima o hukumanga. Ngini nihi demoua madiai mangale Ahi diri, enahioko o Ayub wohi demo.”

⁹O Elifas, o Bildad deʼ o Zofar yadiai okia wahöhulo-huloko ma Jou, deʼ ma Jou watarima o Ayub ai niata.

¹⁰ Ipaha, o Ayub womä niata ibötino mangale ai dodiawo yaruange, ma Jou wadiai ünanga wokayaoli deʼ wihidöaka unangika o lape hinoto ngaro de hagala toünanga mahira.

¹¹Mata-mata ai riaka deʼ ngoi hira-hiranga o Ayub, ikali mata-mata imakokanako mahira, yoböa iwï lega daha yorameanga ima kinïki de ünanga ai tauoka. Onanga ihi matoko imakinïki yoduka mangale hagala o huha ma Jou widödotagaooka unanguku, deʼ iwilaru ünanga. Moi-moi önanga manga hidogoronaka iwihidöaka o tiwi deʼ moi o ali-ali o gurasi o Ayubika.

¹²Ma Jou wihibarakati o Ayub de iholoi iwöe ai wowango mahou magoronaka, ngaro de maöraha ünanga wamakeuahi o huha. O Ayub wamake o kabingi de o duba o dutu o ribuhu ngimoi de iata, o onta o dutu o ribuhu butanga, o hapi o dutu o ribuhu hinoto, deʼ o keledai o dutu o ribuhu moi.

¹³Unanga womämake o ngohaka o nauru yatumidi deʼ o ngohaka o ngoheka yaruange.

¹⁴O ngohaka o ngoheka madodihiraoka womihiromanga o ngo Yemima, mahinotoka o ngo Kezia, deʼ madodoto o ngo Kerenhapukh.

¹⁵O berera yamode-modekika koiwa o moholehe imaketero manga hailoa o Ayub ngoi ora yaruange. Onanga wohidöaka manga hidoku manga ama ai puhaka magoronaka, kaimaketero de toönanga manga ira-iranga.

¹⁶Iböto gënanga o Ayub kawowangohi o taongo o ratuhu moi de moruata madekana, hiädono ünanga wakunohi wamake ai dano-danongo ikali toönanga manga ngoha-ngohaka.

¹⁷Daha o Ayub wohonenge ai umuru duru kohagurutoka.