Read Tobelo O AYUB 5 Bible Online

O AYUB 5 - Tobelo bible

O AYUB 5

¹Nopöaka, hei Ayub, nagaka mabobaluhu? O malaikat okia nomahigahoko maroriwo?

²Duga-duga o nyawa bodo dika yohonenge hababu manga hininga mahiri.

³Mamoi iböto tamake o nyawa bodo; manga wowango hamake duru ibitumu. Mä itodokanino dika tohilolai mangï yogogogere.

⁴Done manga ngoha-ngohaka komaiwahi yamake o hohohongo; moiua yomodeke yademo önanga o juru hakimoka.

⁵Okia yao utu-utuku toönanga manga dumuleoka, yaol̄omo yamata o nyawa manga mamata kamahomoa. Maboboloi o gandum o deremi mahidogoronaka, o nyawa yahahahini imahidol̄omo deʼ mahoka. Toönanga manga kiahonanga deʼ manga kaya idadi yapulono ihiridoka o nyawa yokokiriti madudungu o arata.

⁶O duniainoua o dorou ipuda; o tonakinoua o huha ipuda.

⁷Kowali! Duga-duga o nyawa mahirete yodotagao o bodito manga dirika, hokä bunga api ihoropu ipuda maukuil̄e mahirete.

⁸Nako ngohi niaöraha magoronaka, ma Jou Madutuika ngohi tomahiböaka. Unangika ngohi tomahiböaka, ikali tohilapahi ahiperekara.

⁹Ma Jou Madutu Ai gao-gao kabiahaua hakunua ngone hamangarati. I hö hera-heranga Wadodiai, hakunua haetongo deʼ imata-mataua.

¹⁰Unanga wohi guti o awana o dunia mal̄oku-l̄okuuku, hiädono o dumule deʼ o tonaka malua-luasi yatuagi yopehaka.

¹¹Unanga ma Jou Madutu wahikurutil̄e o nyawa yopöpoluluku, deʼ wahi utumu o nyawa yohöhuhuha.

¹² O nyawa yosawaro yotötakaidulu manga datoro idadiua, o nyawa yososawaro yatagoko deʼ o dadagoko, hiädono toönanga manga hidailako mata-mata koidadiua, deʼ önanga yatipu manga akali mahirete.

¹⁴O wangeoka önanga yabanga o huhutu, imahi bobabal̄anga hokä maöraha o hagahutu.

¹⁵Mä ma Jou Madutu wahihalamati: o nyawa mihikini o honengino, o nyawa yopopoluluku yatuku-tukuino.

¹⁶Oraha nënanga nagali manga ngonganono mangale o nyawa komanga kia-kiaua. Deʼ o nyawa madorou ihidemokaua o demo o ribuhu moi, karana ma Jou Madutu watamunoka manga uru.

¹⁷ Noutumu ngona nako ma Jou Madutu wonitaaere! Uha anihininga isanangua nako ünanga wonihohedu.

¹⁸ Hababu ma Jou Madutu wonihangihara, unangoli wonihouru. Deʼ ai giama wonigohara, wonihi togumuokali.

¹⁹Nako o bodito inikorona, salalu ngona Wonihihalamati.

²⁰Nako ohabirokata iniparono ngona aha nohi honengua o hahini. Nako o parangi magiria hoboborohono, ngona norïdi deʼ o honenge.

²¹Ngona wonïgoana inïdodiai o demo madorou deʼ o higaro madorouino; ngona nöhimanga o bodito nohawanua.

²²Maöraha mahayanga koiwa deʼ o habirokata inioluil̄e, ngona aha notongohono deʼ iholoi noiete. Ngona namaoua nohawana ekola anihininga ihuha, nohimanga o aiwani ihohorodo de ihohatera.

²³O dumule napopajeko aha de mahelewo okaua; o aiwani ihuhuhuku aha inidodoaua.

²⁴Ngona aha nogogere norïdi anitau-tauoka; deʼ nako natailako aniduba-duba, mata-mata ihalamati, moi-moi ikurangua.

²⁵Ani ngohaka de ani danongo aha hakunua hä etongo, önanga ima ketero manga ngöe o momo o tonaka ilua-luasoka.

²⁶Hokä o gandum iohaka, maorahoka yautuku, ngonaö aha nowango notumuloa hiädono maöraha inipereki.

²⁷O Ayub, mata-mata gënanga ngomi miatailakoka. O demo gënanga itiai, ho natarima dika.