Read Tobelo O AYUB 6 Bible Online

O AYUB 6 - Tobelo bible

O AYUB 6

¹Daha o Ayub wohaluhu, ”O demo maade ahiduka de ahihangihara tatibanga madubuho,

³maraioka iholoi itubuho ngaro de o dowongi o ngotoka. Ho, uha niheranga nako ahi demo-demo ikuranga tohi dodiai ikali de majapatioka.

⁴O toimi wo Woko Kuahaino yatotara ahi röehe; Ai rasongo yodogerewoto ahi jiwa de ahiröehe yamode-modekika. Ma Jou Madutu Ai Kuaha duru hoboborohono, deʼ ihiparangi ngohi hokä o duduono yolawa-lawani.

⁵O keledai aha imahi bunu-bunuhika nako hohidöaka o momo ma gogil̄au, hoko genangoli o hapi nako hohidöaka mainomo.

⁶Mä o inomo ma ake-akere, o nagona yoigo? Kiaka yakunu o gohi magarehe naga dema jameoka?

⁷Tatigiö mä ngohi toigoua; ngohi yato katowunanga taol̄omo.

⁸Yadodoa ma Jou Madutu woluku woihene ahininiata? Yadodoa Wohiningaikaua ahi böaka?

⁹Tanu ma Jou Madutu woigo wohi wede-wederuku ngohi! Tanu Unanga wodiai deʼ wohi toma ngohi!

¹⁰Mangale ngohi o hali gënanga aha marupa o lolaru; ngohi aha ihidiai toselo o hangihara mahidogoronaka. Hagala aipareta ma Jou Madutu Woto Tebi-tebini, tohi ngounoka deʼ töhohininga hokogenangika.

¹¹Okia ahi kuata hiädono ngohi kanagaohi? Okia ahi ngonganono mangale toigo towango iholoi itedekana?

¹²Hokä o helewo makuata ahiröehe nënanga? O tabagaino ahiröehe nënanga?

¹³Imataka ahikuata tohilingiri o roriwo; ngohino koiwakaoli o roriwo.

¹⁴O hangihara hokä hoko nënanga magoronaka, duru tomau o dodiawo madutu. Boteka ngohi kahirahiohi tosetia ekola tilegaikaokaua Woko Kuaha.

¹⁵Mä ngini, hei dodiawo, hakunua hiningauku deʼ hini higoungu. Ngini hokä o ngairi maiti imataka ma akere, maöraha o awana mai böa-böaua.

¹⁶Ngini hokä o ngairi irirïdi deʼ ibagä oka, karana yatamunuku o domoata deʼ o es.

¹⁷De majapati nako maöraha ihiwara iböa, o domoata deʼ o es gënanga ihihanga mario makoiwa. O ngairi mangomaha idadi itore, koiwa ma akere deʼ itore itotororata.

¹⁸Hagala o kafila yahihanga maöraha ilingiri o akere; önanga yodagi yongika-ngino deʼ yohonenge o tonaka ma kokakahaka.

¹⁹O kafila o Syebaino deʼ o Temaino yolingiri o akere gënanga deʼ yonganono.

²⁰Mä toönanga manga ngonganono kaparahaja o ngairi madatekoka koiwa ma akere.

²¹Hokä ngairi gënanga ngini, ahidodiawo; noma dohuku deʼ nohawana namake ahihangihara.

²²Yadodoa? Boteka okianaga moi togahoko ngonaino? Ekola tonihüloko yäurubokumu o nyawa mangale ahi paralu?

²³Boteka ngohi togahoko nohihihalamati deʼ nohi tuhuhu o haturuino koö iwa-iwa manga dora de manga hayanga?

²⁴Ah, nohidotoko ngohi, nohihidumutu ahihowono! Ngohi aha tomarïdi deʼ tohi gihene ani demo.

²⁵Hagala o demo iriko-rikoto yamäta o hininga, mä anidemo ihi hohomoa, koiwa mamangarati!

²⁶Hagala ahi demo ngini niapulono o hidal̄oko dika; parahaja ngini nihï baluhu ngohi itö toa-toakoka ahi nganono.

²⁷Ikali o ngohaka o gohihi ngini niaundi manga wowango, niadodiawo itö tigi-tigi ngini niatipu mangale nidadi nikaya.

²⁸Abeika, nihi pulono ngohi; yakunu ngohi nënanga tinieluku nginika?

²⁹Uha nidiai iadilua, niamao! Uha nihihohedu ngohi, ngohi igoungu tahowonua.

³⁰Boteka niatobote ngohi tini eluku, takunua tatingaka de tafara maoa-oa deʼ itotorou?