Read Tobelo O AYUB 8 Bible Online

O AYUB 8 - Tobelo bible

O AYUB 8

¹Daha o Bildad wotemo, ”Hokokia madekanoli notemo hoko gënanga? Ani demo-demo hokä o hidal̄oko maruruhu.

³Ma Jou Madutu komaiwahi wapeleoko o adili; komaiwahi o diai wohi goko-goko ikilianga.

⁴Maraioka aningoha-ngohaka yobaradoha Unangika, done ipatutu önanga Wä hukumu.

⁵Mä nako Unangika ngona noma hohongo, noma gahoko o dora de o hayanga deʼ nogahoko o apongo,

⁶nako anihininga irikoto, koiwa makuranga, ma Jou Madutu aha wonï riwo demadataiti; deʼ hokä anihewa, anitau manyawa aha ilio hokä mahirali.

⁷Ani kaya ihihihanga gënanga koiwa mamangarati hohitotero de okia aha namö make-make.

⁸O nyawa yososawaro maöraha kahuruonika kokiani nahohininga, deʼ natiba-tibanga manga mamao ani ete de ani tohora.

⁹Tongone nanga ngango itipoko, ngone okia-kiaua hohiöriki; hagala tongone nanga wange hokä o gurumini dika.

¹⁰Noihene o nyawa yososawaro manga demo gënanga mahira, önanga inihidöaka o dodotoko nënanga ngonaika.

¹¹O ngï ma ake-akeroka dika iwango o bongo-bongono; o pudaki duga-duga hamake o tonaka ihipese-pesekoka.

¹²Nako ma akere idudungu, o bongo-bongo gënanga kama bobelelaka, iholoi itaiti ngaro de iwöwango-wango mahomoa. Enahioko kamagou-gouohi deʼ maörahauahi, ënanga yatol̄anga deʼ yal̄e mafaidä.

¹³Hoko gënanga o nyawa koö iwa-iwa manga Jou. Unanga wiwohanga ma Jou Madutu, done ihihanga ai nganono.

¹⁴O lawe o utumangai moi mabole-bole idadi wongano-nganono; o arara maigutu idadi ai ngongaku.

¹⁵Ikuata o igutu gënanga nako nadiai nomahi ake-ake? Itongohono o lawe gënanga nako hohidadi nanga jojo?

¹⁶Hokä o nguhumu, o nyawa imamao yosanangi koiwa-iwa manga Jou; nako o wange yodihiwara, ënanga iwango iburere deʼ yaomanga o dumule.

¹⁷Mangutuku yarakutu o helewo-helewo o tonakoka, yadehoro makuata, ënanga igapangua igiwi.

¹⁸Mä, abeika, niarahuku öraha nënanga o nguhumu gënanga, done matero-tero komaiwahi ënanga naga genangoka.

¹⁹Ya, manga sanangi o nyawa madorou duga-duga gënanga dika; o nyawa mahomoa yoböa deʼ yatagali ënanga.

²⁰Mä ma Jou Madutu komaiwahi wämal̄a o nyawa yosossetia, deʼ komaiwahioli Unanga wariwo o nyawa yososetiaua.

²¹Aniuru aha wadiai i iete, aniuru makai aha imäuli-ulili imorene.

²²Inï doha-dohata aha yamal̄eke deʼ yamao okia-kiaua yadaene, deʼ o nyawa madorou manga tau aha yakilianga hiädono i hihanga.