Read Tobelo O AYUB 9 Bible Online

O AYUB 9 - Tobelo bible

O AYUB 9

¹ Mä o Ayub wohaluhu, ”Igoungu, ngohi tohiöriki, anidemo-demo gënanga ihowonua. Mä kiaka iyakunu o nyawa imateke perekara iwilawani ma Jou Madutu deʼ iwiutumu?

³O loleha o ribuhu moino wohihimanga ma Jou Madutu, kamoiö yakunua o nyawa yahaluhu.

⁴Ma Jou Madutu gënanga duru wosawaro de wokuaha; o nagona yakunu yataana iwilawani Unanga?

⁵Ma Jou Madutu watururu ol̄oku ihiorikua o nyawa, daha walulumomiki de ai dohata deʼ ai gangamo.

⁶Ma Jou Madutu wadiai o ohu hiädono o dunia igiwi, deʼ o dunia maliate madidiki igiwi-giwi.

⁷Ma Jou Madutu wakunu woduhunu o wange ipotoka maöraha o ngorumino, deʼ watatoko o muru-murumu itararono o hutu-hutu.

⁸Wohi hoheika o gitawa koiwa o roriwo; Wapito-pitoko o ngöto managa maporetuku.

⁹ Wohipake o murumu madoomu o koreharail̄e o tatanguoka, O murumu ö Kalulu, o murumu o Loahange deʼ o murumu o Pariama.

¹⁰Hakunua ngone ho mangarati hagala ai gao-gao, hakunua ngone ha etongo Ai nonako i hera-heranga.

¹¹Unanga wakaino ahihimangoka, mä tïmakeua; Unanga wakaino ahidatekoka, mä tihiorikua.

¹²Nako Unanga waora, o nagona yobarani iwiduhunu? ekola yo barani iwi leha Unangika, ’Hei, okia ma gogiria nadiai?ʼ

¹³Ma Jou Madutu watumungua ai gangamo deʼ ai hininga ma hauku; o ngo Rahab imï riwo-riwo o ima ponu Unangika.

¹⁴Ho, sarakia ngohi yakunu tiributu Unanga? De o demo-demo okia ngohi aha tibaluhu?

¹⁵Ngaroka ngohi tohawanua, okia ahi kuata, sowaliua togahoko o dora ma Jou Madutuino ahihakimi?

¹⁶Hohiade Unanga wohaluhu maöraha ngohi tomahiböaka, ngohi tododato, igoungu Unanga woigo woihene ahi ilingi?

¹⁷Unanga wohiwedere ngohi o rato magoronaka, deʼ wodogo ahihangihara koiwa mahababu.

¹⁸Wohi mal̄aikaua ngohi tomä ngomaha itiöraha moi; koaholi wohihi dogo-dogo ngohi deo mali kohagiria.

¹⁹Kokiani ngohi mima tidingi dede Unanga? Mä niamake, hokokia magiria Ai kuata! Hohiade Unangika ngohi tiperekara, o nagona yobarani Iwi ahoko o juru hakimika?

²⁰Ngohi tosetia deʼ todiaiua o baradoha, mä ahiuru matero-tero itemo itotiaiua; o demo magetongo yatü tuuku ahiuru makai, matero-tero ihihowono ahidiri.

²¹Ngohi tahowonua, mä ngohi tohaduliua. Ngohi togihounu o ngango. Ngohioka koiwa ipoparuoli; yahohowo-howono deʼ yatotiai, kaimatero dika manga nasib: Ma Jou Madutu aha wabinaha yahöhinoto.

²³Nako o nyawa yahowo-howonua itodokanino yohonenge, ma Jou Madutu duga-duga woiete dika.

²⁴O dunia wohilapahi ma Jou Madutu o nyawa yososetiaikaua, deʼ o haki-hakimi wadiaioka mata-mata yopiloko. Ma Jou Madutu wadiai mata-mata nënanga, nako Unangua, o nagonahi?

²⁵Hagala ahiwange ipaha dema dataiti, daha ima hihanga yamaoua isanangi.

²⁶Hokä o ngotiri mahiapoto, ahingango ihitilakuru de majapati, imatero majapati o totaleo o kawihi yodowöto, yautuku mainomo.

²⁷Nako ngohi tomau tomahumuiete deʼ toiete tomorene, nako tohi taili tawohanga hagala ahihangihara, done ahiduka iböaokaöli ihiginïki ngohi; hababu tohiöriki, ma Jou Madutu kahirahi wohihihowono ngohi.

²⁹Aa, nako hoko gënanga, tahaduli okia ngohi?

³⁰Koiwa naga o sabongo yakunu yahihanga ahibaradoha!

³¹Ma Jou Madutu wohihidumunu ngohi o peseke magoronauku, hiädono ahipakeangö matapulono ngohi taemono.

³²Hohiade ma Jou Madutu gënanga o nyawa, ngohi aha takunu tibaluhu Unanga; daha ngomi aha mio himanga o juru hakimi mangale mia tiai hagala mima teke roributu.

³³Mä tongomi miahidogoronaka koiwa o hakimi yakunu imi tailako ngomi imihinoto.

³⁴Tanu ma Jou Madutu womatogumu wohihukumu ngohi deʼ wohi kurutika o momodongo ngohioka!

³⁵Ngohi timodongua Unangika deʼ aha totemo öraha nënanga, hababu ngohi tanako ahihininga mahirete.