Read Tobelo O MAZMUR 102 Bible Online

O MAZMUR 102 - Tobelo bible

O MAZMUR 102

¹O nyawa yohöhangihara manga niniata duru manga bole-bole magoronaka ihi hupu manga huha mamamao ma Jouika.

²Ya Jou, noihene ahi niniata; mal̄aikala ahi boaka ini adono Ngonaika.

³Uha noma hiniporo dede ngohi nako ngohi o huha magoronaka. Nohigihene nako ngohi tomahiboaka deʼ nohï baluhu ngohi itaiti.

⁴Ahi ngango imahihanga hokä o nofo; ahi kobongo mahauku hokä o uku.

⁵Ngohi tamao ihi bole hokä o momo madooloenge deʼ ahi nahihu tol̄omo ihihanga.

⁶Ngohi tokururihi makuatil̄e; ahi röehe mahou ahi kai yahawoino ahi kobongo.

⁷Ngohi hokä ototaleo o angsa ihühuhuku o tonaka ikokakahaka, hokä o totaleo o wuku o rutu-rutukoka.

⁸Ngohi koihikiokua, hokä o totaleo kaimongorika o tau makatuoka.

⁹O wange magurutu ahi haturu ihi hikauku ngohi; o nyawa ihi ngamo-ngamo ahi romanga jadiai ololai ngohino.

¹⁰Ngohi tol̄omo o kafo hokä o roti, ahi akere ima ganu o kongo,

¹¹hababu Ngona nohigorakoka deʼ nohihikaweli ngohi Ani dohata itoka-tokara magoronaka.

¹²Ahi ngango ihihanga hokä o gurumini o böbimaoaka; ngohi tomaai hokä o momo.

¹³Ma Ngona, ya Jou, o Koano kahiado-adonika, kahirahi inï hohininga ingohaka dei danongo.

¹⁴Ngona aha nomomiki noma okoil̄e deʼ nödora o Sion, maöraha yadonoka mangale nödora enangika.

¹⁵Hababu Ani gogilaongo yöhohininga ënanga, ngaroko ënanga idadioka o rutuku. Onanga yamao yödora enangika, ngaroko ënanga idadioka o kuhuhunu.

¹⁶Ma Jou Ai kuaha o hoana deo berera ilago-agomo aha yömodongo, deʼ Ai mulia o kokoano mata-mata aha yödodato,

¹⁷nako ma Jou wo higokooli o Sion, deʼ woma himatoko Ai mulia magoronaka.

¹⁸Unanga aha wohigihene Ai umati yohühuha deyo hangihara manga niniata, deʼ watilaua toönanga manga gogahoko.

¹⁹Nihi tulihi ma Jou Ai manarama mata-mata mangale nia difauku aha yoboa-boa, hupaya o hoana deo berera idädadiuahi yakunua iwi higiriri Unanga.

²⁰Ma Jou Ai ngï ikokurutil̄eoka dewo pulo-pulono, o horogaka de Unanga wotötailako o duniauku

²¹mangale wo ihene o nyawa yobui-buika manga hininga maböaka deʼ wahi bebasi o nyawa yähukumu yähohonenge.

²²Done Ai romanga aha ihi ngangahu o Sion makotaka, deʼ Unanga aha iwi higogiriri o Yerusalem mabereraka,

²³maöraha o hoana deo berera ilago-agomo deʼ opopareta-popareta ima toomu, mangale iwi huba de iwi horomati ma Jouika.

²⁴Ma Jou watobiki ahi kuata maöraha katomä göikahi, deʼ watipoko ahi umuru.

²⁵De ngohi totemo, ”Ya Jou Madutu uha nal̄ë ahi nyawa ahi ngango tatogoronaika.” Jou, Ngona nowango kahiado-adonika,

²⁶ kahuruonino Ngona nohidadi o dunia; o dihanga ma Ani giama magao-gao.

²⁷Mata-mata gënanga aha ihihanga, mä Ngona naga kahirahi; mata-mata gënanga aha ibabiti hokä o pakeanga. Ngona näumo hokä o kota madorou, deʼ mata-mata aha ibinaha.

²⁸Mä Ngona hirahi imatero, Ani ngango aha koiwa mabobaha.

²⁹Tongomi mia ngohaka de mia danongo aha yowango kairorahai, deʼ salalu yorïdi Ani gogoana magoronaka.