Read Tobelo O MAZMUR 103 Bible Online

O MAZMUR 103 - Tobelo bible

O MAZMUR 103

¹O Daudino. Nïhigiriri ma Jou, hei ahi jiwa, de ahi hininga madol̄a mata-mata, nihigiriri Ai romanga itebi-tebini.

²Nïhigiriri ma Jou, uha nawohanga hagala Ai oa!

³Unanga wohiapo-apongo ani baradoha mata-mata, wohi togu-togumu hagala ani panyake,

⁴Unanga wohirehene ani nyawa o lungunino, wonihiholoi ngona deo dora deʼ o rahamati.

⁵Unanga wasanangi ani ngango deo oa-oa, hiadono ngona itaitua ini pereki hokä o totaleo o rajawali.

⁶Ma Jou wohidagi o tita deʼ o adili mangale mata-mata o nyawa yätuku-tuku.

⁷Unanga wohinyata Ai datoro o Musaika deʼ hagala Ai manarama o Israel ma nyawaika.

⁸ Hababu ma Jou wotodora deʼ wotahayangi, Unanga Ai sabari ikurutu deʼ Ai dora dema boboloi.

⁹Unanga wonä banaratua kahokogenangika, deʼ wongamoua kahiado-adonika.

¹⁰Unanga wonä hukumua ngone wohitero de nanga baradoha, ekola wona hibalahi ngone imatero de tongone nanga howono.

¹¹Mä magurutil̄e hokä o dihanga o dunia mal̄okuil̄e, hoko gënanga ma amoko Ai dora mangale o nyawa iwï modo-modongo.

¹²Hokä o wange mahiwara mahoana magurutika deo wange madumunu hoko gënanga magurutika Waumo hagala tongone nanga baradoha.

¹³Hokä womatengo o ama wädora ai ngoha-ngohaka, hoko genangoli ma Jou wädora o nyawa iwï modo-modongo.

¹⁴Hababu ma Jou wohioriki inä diai de okia, Unanga womä hininga ngone nënanga duga-duga o kuhuhunu.

¹⁵O nyawa manga ngango itipoko hokä o momo; ënanga ima hohe hokä o maratana o dumuleoka;

¹⁶nako o hidal̄oko yawuwu, ënanga ihihanga, iholoioli mangï ma koihiorikokaua.

¹⁷Mä ma Jou kahirahi wädora o nyawa iwï modo-modongo, Ai oa itagi igila-gila ingohaka dei danongo

¹⁸mangale o nyawa imahi jojojö Ai jaji ika, deʼ yosatia yadiai Ai pareta.

¹⁹Ma Jou wopareta o horogaka, Unanga o koano wakokuaha hagala mata-mata.

²⁰Niwi higiriri ma Jou, hei Ai malaekat-malaekat nipoputurungu, ni ihe-ihene deʼ niadodiai Ai pareta.

²¹Niwi higiriri ma Jou, hei o dodadi o horogaka mata-mata, mata-mata Ai gilaongo niadiai Ai mau.

²²Niwi higiriri ma Jou, hei hagala Ai dodadi yamode-modekika o daera Wakokuaha. Niwi higiriri ma Jou, hei ahi jiwa.