Read Tobelo O MAZMUR 104 Bible Online

O MAZMUR 104 - Tobelo bible

O MAZMUR 104

¹Nihigiriri ma Jou, hei ahi jiwa! Hokokia Ani mulia, ya Jou ahi Jou Madutu! Ngona nomahipakeanga o kabaharanga deʼ o mulia,

²deʼ ini tamunuku o cahaya. Ngona nohihohe o dihanga hokä o tenda,

³deʼ nohigoko Ani tau o akere mal̄okuoka o dihangoka. O lobi-lobi nadiai Ani kereta Ngona nöbarene o hidal̄oko magahuhu.

⁴ O hidal̄oko nadiai Ani huhuloko deʼ o leletongo ini löleleani.

⁵Kahä bitumu o dunia nohi beloho matitiuku, hiadono koigiwiua kahiado-adonika.

⁶Ngona natamunuku ënanga o ngoto malago-agomo, ma akere yaolu hagala ol̄oku mabuturungu ma tubu.

⁷Maöraha Ngona nöbanarata, o akere gënanga ihahuru, i hahuru kahä kuata karana Ani ilingi maruruhu.

⁸O akere ihahuru o waiuku yanonu hagala ol̄oku, o ngï nasosadiaka mangale ënanga.

⁹Nohi tantuoka o batingi-o batingi yakunua yatilakuru, hupaya uha yaoluoli o dunia.

¹⁰Ngona nahuaele o jobubu o wai-waioka, o ngairi maiti ihahuru hagala o doporono mahidogoronaika,

¹¹La nohi okere o aiwani mata-mata o dumuleoka, deʼ hagala o keledai o honganika nohi aiki ma kiriti madudungu.

¹²Madatekoka hagala o totaleo imadiai maigutu; ënanga itakuaoro o gota mahoka-hoka mahidogoronaka.

¹³O dihanguku nohi guti o awana ol̄oku mabuturunguku, o dunia i omanga de Ani gao-gao mahasili.

¹⁴Ngona nohi wango o momo mangale o aiwani, deʼ mangale o nyawa hagala idödato-datomo. Deʼ önanga yakunu imä datomo,

¹⁵deʼ mahasili o angguru mateongo ijame-jame. Inoli o zaitun maminya yadiai ai biono ihailoa, deʼ o inomo iwihidöaka o kuata.

¹⁶Ma Jou Ai gota mautu yamake o awana dema boboloioka o Libanon maliwewuru magota mautu Wödatomo mahirete.

¹⁷Hagala o totaleo imä igutu genangoka, o totaleo o huweko imä igutu matubuoka.

¹⁸Hagala ol̄oku magögurutil̄e idadi o honganika makabingi mangï; o kancil imangiunu o helewo o nuhaka.

¹⁹Ngona nadiai o mede idadi o oraha manonako, o wange malako ihioriki maöraha itamunu.

²⁰Nako Ngona nohi guti o huhutu, o wange idadi yö hutu, deʼ mata-mata o aiwani o honganika yakaika-yakaino.

²¹Hagala o singa magö ima pöaka ilingiri mainomo, igahoko o inomo ma Jou Madutu wasosadia.

²²Nako o wange ipotoka, ënanga ima hirehene deʼ ima hiruba-ruba mangingiunoka.

²³Daha o nyawa yohupu la yadiai manga karajanga, deʼ igila-gila yokarajanga hiädono o wange imulaenge yöhutu.

²⁴Hokokia mangöe Ani gao-gao, Jou, mata-mata Nohidadi de ani sawaro; o dunia iomanga de Ani dodadi.

²⁵Nia make o ngöto ma amo-amokika imahohe, de Ani dodadi ipako dei aluhu haetongo hakunua.

²⁶ Genangoka hagala o kapa ihidete, deʼ o Lewiatan, o naga o ngotika Ani dodadi iule-ule.

²⁷Mata-mata önanga ima hinganono Ngona, mangale yamake o inomo ma orahoka.

²⁸Ngona nahidöaka, deʼ önanga imä doomu, Ngona nasadia, deʼ önanga yol̄omo hiadono yäpunuhu.

²⁹Nako Ngona noma hiniporo, önanga yohawana; nako nal̄ë manga womaha, önanga yobinaha, deʼ yolio yodadi o kuhuhunu hokä mahirali.

³⁰Mä nako önanga Nahidöaka o womaha, önanga yodadi; Ngona nohidöaka o ngango mahungi o duniaika.

³¹Tanu ma Jou Ai mulia kahirahi kahiado-adonika! Tanu Unanga womorene de hagala Ai dodadi!

³²Unanga wapulono o dunia deʼ wadiai i hahara, hagala ol̄oku Wapeleke, hiädono manofo ihupu.

³³Ngohi tomau tonyanyi mangale ma Jou ahi ngango madekana, tohi nyanyi o higiriri mangale ahi Jou Madutu madekana ngohi naga.

³⁴Tanu ahi nyanyi ai hininga yadaene Unangika, hababu Unanga ganga wadiai ahi hininga imorene.

³⁵Mal̄aikala o nyawa baradoha yohihanga o dunia mahimangoka, mal̄aikala o nyawa madorou yomata-mataka yobinaha. Nihigiriri ma Jou, hei ahi jiwa! Niwi higiriri ma Jou!