Read Tobelo O MAZMUR 105 Bible Online

O MAZMUR 105 - Tobelo bible

O MAZMUR 105

¹Nisyukur ma Jouika, nihi ngangahu Ai kabaharanga, nihi jarita Ai manarama o hoana deo berera ilago-agomika.

²Nihi nyanyi o higiriri mangale ma Jou, nihi abari hagala Ai gao-gao ihöhera-heranga.

³Una ganga ma Jou Duru Wotebi-tebini; nimorene hababu ngone ganga Tounanga, mata-mata iwihöhuba-huba kokiani yomorene.

⁴Nigahoko o kuata Unangika, niwi huba Unanga kahokogenangika.

⁵Hei o Abraham aidifauku, Ai gilaongo, deʼ o Yakub aidifauku, Ai ngongiriki manyawa, nio hohininga mata-mata Wadodiai ihöhera-heranga, uha nia wohanga hagala Waputu-putuhoka.

⁷Ma Jou ganga tongone nanga Jou Madutu, Ai putuhu ihidagi o dunia yamode-modekika.

⁸Unanga salalu wöhininga Ai jaji, Ai jaji ihidagi kahiado-adonika.

⁹ O jaji gënanga Wadiai de o Abraham, deipaha de o Ishak;

¹⁰ daha Wohikekete deo Yakub, idadi o jaji ikokakali kahiado-adonika mangale o Israel ma umati.

¹¹Wato, ”O Kanaan matonaka aha Tini hidöaka nginika, idadi tingini nia puhaka.”

¹²Mahiraino ma Jou Madutu Ai umati yowango dokengoka hokä o nyawa maporetino toönanga manga gegetongo kamanga huhutulu dika.

¹³Onanga yotagi-tagi yakaika yakaino o hoana deo berera moioka deo berera moika, ima tururu o berera moi oka deo berera mahomoa ikali.

¹⁴ Mä ma Jou wahigumulaua o nagona dika yätuku önanga; mangale önanga, o kokoano yahidöaka o hohininga,

¹⁵”Uha nia ruae Ahi ngongiriki manyawa, uha niadiai o dorou Ahi nabi-nabi ika!”

¹⁶ Ma Jou wödotagao o habirokata o bereraka gënanga, deʼ Wa l̄ë mata-mata manga inomo yasosadiauku.

¹⁷ Mä Unanga wïhuloko womatengo wähihira önanga, o Yusuf, iwi hukumoka hokä o gilaongo.

¹⁸ Ai l̄ou yaliko deo liliko o behi, ai tomara ihi guleuku deo rante o behi.

¹⁹Mabobahaka imadadi okianaga waheto-hetongoka, ünanga itiai mangale ma Jou Ai demo.

²⁰ De o Mesir ma koano wakokuaha o hoana deo berera ilago-agomo, wihi bebasi ünanga o buioka.

²¹ Unanga iwi hidöaka o manarama wohi dailako o kadato, deʼ iwi hidöaka o kuaha toena ma arata ingodumu;

²²inoli ai haku mangale wä tatoro ma koano ai pegawe-pegawe, deʼ wä tuda o balu-baluhu.

²³ De o Yakub woiki o Mesirika deʼ wo gogere dokengoka hokä o nyawa ma poretino.

²⁴ Ma Jou wadiai Ai umati yo dogo yo woe, hiadono önanga i holoi yo kuata de manga lawani.

²⁵Unanga wangali manga hininga o Mesir manyawa hiadono yadohata Ai umati de yahidiai Ai gogilaongo dede madiaiua.

²⁶ Daha Unanga wï huloko o Musa Ai gilaongo deʼ o Harun Ai ngongiriki manyawa.

²⁷O Mesir mabereraka önanga yo diai ihö hera-heranga, o manarama-manarama ma ago-agomo ma Jou ino,

²⁸ deʼ önanga ihingounu Ai pareta ika. Daha ma Jou wadiai o berera gënanga i huhutu.

²⁹ Toönanga manga Ngairi wa ngali ima dadi o awunu, hiadono ma nawoko mata-mata i binaha.

³⁰ O ngotara kai tika-tika toönanga manga bereraka, ma boboloi oli i wohama ma koano ai kadato ma goronaika.

³¹ De ma Jou Madutu Ai pareta hagala o guhuru i boa, deʼ hagala o gomoma i toomu i polu-polu o berera ya mode-modekika.

³² Unanga wä doburaraha o es o awana ma dagali, deʼ wä dotagao o leletongo ima kokapeleke.

³³Unanga wa ruba o angguru ma gota ma utu deʼ o ara ma gota ma utu, deʼ wa heleuru mata-mata toönanga manga gota ma utu.

³⁴ De Ai pareta, i boa o kahoho, duru kahä ngoe, hakunua ha etongo.

³⁵Enanga yaol̄omo mata-mata idö dato-datomo o dumuleoka, deʼ yaol̄omo yamata-mataka ingodumu manga tonaka mahasili.

³⁶ Daha Wätoma o nau-nauru o ngohaka o riaka, o Mesir manyawa manga tau madol̄a yögetongo.

³⁷ De ipaha o Israel manyawa Wängotaka yohupu, önanga yoao o gurasi deʼ o haaka; mata-mata yotötumuloa deʼ yokuata.

³⁸O Mesir manyawa yamao yohawana deʼ yäporohono, hoʼ önanga yosanangi maöraha o Israel manyawa ima jobo.

³⁹ Ma Jou Madutu wohihoheika o lobi layä hohongo Ai umati, deʼ o uku layä totararono maöraha o hutu-hutu.

⁴⁰ Onanga yogahoko, dewädotagao o totaleo o habiana, önanga Wahidöaka o roti o horogauku hiadono yäpunuhu.

⁴¹ Wabelaka ol̄oku o helewo, deo akere ihoropu i hahuru hokä o ngairi o tonaka ikokakahaka.

⁴²Hababu ma Jou wö hininga Ai jaji o Abrahamika, Ai gilaongo.

⁴³De Wängotaka Ai umati de manga morene, Ai ngongiriki manyawa imä uli-ulili.

⁴⁴ Hagala o hoana deo berera manga tonaka Wahidöaka onangika, toönanga manga dumule idadi to Ai umati madutu,

⁴⁵hupaya Ai umati gënanga ihingounu hagala Ai titaika deʼ yanïki hagala Ai pareta. Niwi higiriri ma Jou!