Read Tobelo O MAZMUR 106 Bible Online

O MAZMUR 106 - Tobelo bible

O MAZMUR 106

¹ Ni syukur ma Jouika, hababu Unanga yaoa; Ai dora ikakali kahiado-adonika.

²O nagona yakunu ihi ngangahu ma Jou Ai buturungu, deʼ ihidöaka o higiriri ipatu-patutu Unangika?

³Youtumu o nyawa ihingou-ngounu hagala Ai pareta, deʼ salalu itiai okianaga yadodiai.

⁴Nohïhininga, ya Jou, mangale Ani oa Ani umatika, ngohiö nohï riwo nako Ngona nahihalamati önanga.

⁵Tanu ngohi tamake Ani ngongiriki manyawa iwoë manga hasili deʼ tomorene kamamoi de Aniumati. Tanu ngohi ahi hininga iamoko deʼ tomorene kamamoi de yodädadi to Ngona Ani nyawa.

⁶Ngomi mibaradohaka hokä tongomi mia ete de mia tohora; ngomi midiaioka o dorou deʼ misatiaua.

⁷ Maöraha o Mesir mabereraka tongomi mia ete de mia tohora imangaratiua; Ani gao-gao yöhera-heranga önanga yanako itiaiua. Onanga yawohanga Ani dora dema boboloi, deʼ o Gelagah ma Ngoto madatekoka önanga imalawani Duru Woko Kurutil̄eika.

⁸Mä ma Jou wahihalamati önanga mangale Ai diri mahirete, hupaya Ai buturungu idadi inyata.

⁹ De Ai pareta o Gelagah ma Ngöto idadi idudungu, Unanga wä ao Ai umati imädagi o ngöto yanonu, hokä o tonaka ikokakaha yanonu.

¹⁰De hoko gënanga önanga wahihalamati manga lawani manga giama mahoatino, Wahibebasi önanga o haturu ma nga kuahaino.

¹¹Mä o akeruku yälutu toönanga manga lawani; kao nyawa moiö ma yogögogerua.

¹²Daha Ai umati yongaku Ai jajika deʼ ihi nyanyi o higiriri Unangika.

¹³Mä önanga itaiti yawohanga ma Jou Ai manarama deʼ okianaga yodiai yogahokua Ai nasihati.

¹⁴ O tonaka ikokakahaka önanga yahidubo manga nahihu, deʼ iwi taili ma Jou Madutu.

¹⁵Unanga wahidöaka okianaga önanga yogahoko, mä o panyake o bobaku ö yädaene önanga.

¹⁶ O tonaka ikokakahaka gënanga önanga yosanangiua o Musaika deʼ o Harunika Ai gilaongo wotebi-tebini.

¹⁷De o tonaka ibelaka iwi l̄ahiri o Datan, iwi tamunu o Abiram deʼ ai tau manyawa.

¹⁸O uku iuti yäutuku toönanga manga dodoomu, yätuhuku mata-mata yososatiaokaua.

¹⁹ O Sinai mal̄okuoka önanga yodiai o hapi mangohaka o gurasi, deʼ yahuba o dulada yaui-uihuku gënanga.

²⁰Onanga iwi hitagali ma Jou Madutu womomulia deo dulada o hapi o momo i ol̄o-ol̄omo.

²¹Onanga yawohanga ma Jou Madutu wahihohalamati önanga wadodiaioka hagala o hali ilago-agomo o Mesir mabereraka.

²²Igoungu höborohono hagala Ai manarama o bereraka gënanga, höheranga okianaga Wadodiai o Gelagah ma Ngötoka.

²³Daha ma Jou Madutu Ai dungutu wäbinaha Ai umati, mä o Musa Ai ngongiriki manyawa, wïtatoko. O Musa wodadi toönanga manga nyawa womahitö togoronauku, hiädono ma Jou Madutu Ai dohata itoruhu.

²⁴ De ipaha önanga yaoluku o berera ihöhailoa gënanga karana yongakua ma Jou Madutu Ai jaji ika.

²⁵Onanga yongamo yotetemo toönanga manga tau-tau magoronaka deʼ yoluku ihi gihene ma Jou Ai ilingi.

²⁶Dema koboto Unanga wojaji aha wätoma önanga o tonaka ikokakahaka.

²⁷ Toönanga manga difauku aha Wä umo o hoana deo berera ilago-agomo manga hidogoronaka deʼ wahi kokitingakika hagala o berera mahomoaka.

²⁸ Deipaha o Peor mabereraka önanga yahuba o Baal, deʼ yaol̄omo ihi huba-huba o gikirika.

²⁹O manarama gënanga yatomanga ma Jou Ai dohata, hiädono önanga yäkorona o bobaku o panyake höboborohono.

³⁰Mä o Pinehas womomiki womaoko wähukumu yahö howo-howono, deo panyake i hora-hora gënanga ima togumu.

³¹O manarama gënanga yapulono hokä o manarama maoa mangale ünanga, deʼ yöhohininga kahiado-adonika.

³² Hagala o Mariba mahumuoka önanga yadiai ma Jou wongamo, deʼ iwidiai o huha o Musa de toönanga manga manarama.

³³Onanga yadiai ai hininga isanangiua, hiädono ünanga wotemo madibanga koiwa.

³⁴ O hoana deo berera mahomoa önanga yäbinahaua, hokä ma Jou wahi poparetaka.

³⁵Onanga iholoi imaka ganu deo hoana deo berera gënanga, deʼ yäduru o nyawa iwi nako-nakoua ma Jou Madutu manga adati de manga biaha.

³⁶De önanga yahuba hagala o gomanga, deʼ gënanga idadi o hababu önanga yoruba deyokilianga.

³⁷ Onanga ihi huba toönanga manga ngoha-ngohaka o Kanaan manyawa manga gomangika.

³⁸ Onanga yakopoa o nyawa yahowo-howonua manga awunu, toönanga manga ngoha-ngohaka mahirete manga awunu, mangale ihi huba manga gomangika; hiädono o berera gënanga ipeseke.

³⁹Karana hagala o manarama gënanga önanga idadi yopeseke deʼ yosatiaua ma Jou Madutuika.

⁴⁰ De ma Jou Ai dohata yädotokara onangika, Unanga waemono Tounanga mahirete ai dutu.

⁴¹Daha wähilapahi önanga hagala o hoana deo bereraika, Wä mal̄aika önanga manga haturu yäkuaha.

⁴²De toönanga manga haturu yätuku, deʼ imaponu toönanga manga kuaha matimiuku.

⁴³Wohigali-gali ma Jou wahibebasi önanga, mä önanga iholoi yöigo yomalawani, hiädono önanga yobinaha toönanga manga baradoha magoronaka.

⁴⁴Mä ma Jou woihene toönanga manga böaka, Unanga watailako wohi dodiai toönanga manga huha.

⁴⁵Mangale önanga Unanga wöhininga Ai jaji deʼ wähayangi önanga karana ma amoko Ai dora.

⁴⁶Unanga wadiai onanga yadora mata-mata o nyawa yätago-tagokika önanga.

⁴⁷ Nomi hihalamati ngomi, ya Jou tongomi mia Jou Madutu, nomi toomu ngomi o hoana deo berera ilago-agomo manga hidogoronaino, hupaya ngomi miakunu mi syukur deʼ mihigiriri Ani romanga itebi-tebini.

⁴⁸Niwi higiriri ma Jou, o Israeloka manga Jou Madutu, o oraha nënanga dekahiado-adonika. Mal̄aikala mata-mata o nyawa yotemo, ”Amin!” Niwi higiriri ma Jou!