Read Tobelo O MAZMUR 107 Bible Online

O MAZMUR 107 - Tobelo bible

O MAZMUR 107

¹ ”Ni syukur ma Jouika hababu Unanga yaoa, Ai dora ikakali kahiado-adonika.”

²Nia hetongo gënanga niö gogilio, hei ngini winihi hohalamatoka o huhaino.

³Ngini winï toomuoka o berera mahomoaka de niaino, o wange mahiwariha deʼ o wange madumunoko, o koremieil̄e deʼ o koreharauku.

⁴Naga yototatagi yakaika yakaino o tonaka ikokakahaka, de ihiorikokaua o ngekomo manga tau mangï yogögogerika o kotaka.

⁵Onanga yähabirokata deʼ manga kiriti yödudungu deʼ ihihanga hagala manga ngonganono.

⁶O huha magoronaka önanga imahiböaka ma Jouika, deʼ Unanga wahi bebasi o dehehotino.

⁷Unanga wätuda önanga yanonu o ngekomo i riko-rikoto manga tau mangï ika o kotaka?

⁸Ipatutu önanga yosyukur ma Jouika karana Ai dora, karana Ai gao-gao höhera-heranga mangale o nyawa.

⁹Hababu Unanga wahi sanangi o nyawa manga kiriti yodüdudungu, deʼ Unanga wahiholoi o nyawa yähähahini de hagala o oa-oa.

¹⁰Naga yorubaika o huhutu magoronaka, o bui manyawa yo hangihara o lara o behi magoronaka,

¹¹hababu önanga yomalawanoka ma Jouika deʼ koyölegaikaua Duru Wokö kurutil̄e Ai pareta.

¹²Unanga wawede-wederuku manga hininga deo karajanga madodubuho, önanga yäotaka deʼ moiua yäriwo.

¹³O huha magoronaka önanga imahiböaka ma Jouika, deʼ Unanga wahibebasi önanga o dehehotino.

¹⁴Unanga wä ao önanga o huhutuoka de yaino, deʼ wa tobiki toönanga manga lara.

¹⁵Ipatutu önanga yosyukur ma Jouika karana Ai dora, karana Ai gao-gao höhera-heranga mangale o nyawa.

¹⁶Hababu Unanga waruba hagala o ngorana o tabaga deʼ wawede-wederuku hagala o dudukuru o behi.

¹⁷Naga utu yofuma deʼ yohangihara karana toönanga manga baradoha, inoli yähangihara karana toönanga manga howono.

¹⁸Onanga yaemono hagala o inomika, toönanga manga ajali itigioka.

¹⁹O huha magoronaka önanga imahiböaka ma Jouika, deʼ Unanga wahibebasi önanga o dehehotino.

²⁰Unanga wahitogumu önanga de Ai pareta, deʼ wahirehene önanga o lungunu mabaitino.

²¹Ipatutu önanga yosyukur ma Jouika karana Ai dora, karana Ai gao-gao höhera-heranga mangale o nyawa.

²²Mal̄aikala önanga yosyukur de yoao manga huhuba, deʼ ihingangahu Ai manarama deo nyanyi o morene malugo.

²³Nagali yotoaka o ngöto deo kapa, la ima lingiri manga ngol̄omo o ngöto ilua-luasoka.

²⁴Onanga yamake ma Jou Ai manarama, Ai gao-gao ihöhera-heranga o ngötoka.

²⁵De Tounanga Ai pareta o hidal̄oko o rato i wuwu deya luluaka o moku-moku.

²⁶Hagala o kapa yagoraka yakökurutil̄e, o homoail̄e daha ihiboha o ngöto matitiuku. Hagala o nyawa ihihanga manga nauru yöhimanga o bodito hokogënanga ma amoko.

²⁷Onanga manga hininga ihihanga deʼ yoleboto o higili deo niraka hokä o nyawa yädaluku deʼ manga akali ihihanga.

²⁸O huha magoronaka önanga imahiböaka ma Jouika, deʼ Unanga wahibebasi önanga o dehehotino.

²⁹O rato mangutuku ingö ngamo-ngamo Wahuloko irïdi, o moku-moku ma idadi iogoro.

³⁰Onanga yosanangi hababu o hidal̄oko o rato ipahaka; Wä ao önanga o leleotika yodö dumu-dumutu.

³¹Ipatutu önanga yosyukur ma Jouika karana Ai dora, karana Ai gao-gao höhera-heranga mangale o nyawa.

³²Onanga yaheto-hetongo ma Jou Ai mulia Ai umati manga hidogoronaka, deʼ Unanga iwi higiriri o dimo-dimono manga doomu magoronaka.

³³Hagala o ngairi Wangali idadi o tonaka ikokakaha o akere malako idadi o tonaka matore-tore.

³⁴O tonaka maboburere idadi o tonaka magahi-gahi, karana o nyawa yogögogere manga dorou.

³⁵O tonaka ikokakaha Wangali idadi o akere malupungu o tonaka madüdudungu idadi o akere malako.

³⁶O nyawa yähähahini dokengoka yahigogere; önanga ihi goko o kota mangale toönanga manga tau mangï.

³⁷Toönanga manga dumule ihi barihi deʼ yodatomo o angguru magota mautu, daha yatoomu mahasili dema boboloi.

³⁸Ma Jou wahidöaka önanga o ngohaka mangöe, deʼ toönanga manga aiwani kahokogenangika ifäta.

³⁹Mä önanga yähohihanga deʼ mahou manga huhutulokahi karana o hangihara deʼ yätuku koiwa mahayangi.

⁴⁰Ma Jou wahitipokouku yäkokuaha önanga, deʼ wähuloko önanga yotagi-tagi yakaika yakaino o tonaka i kokakahaka mangekomo koiwa-iwaika.

⁴¹Mä o mihikini manyawa wahibebasi toönanga manga huhaino, toönanga manga tau madol̄a yodogo hokä o duba dema tika.

⁴²O nyawa manga hininga iriko-rikoto yamake deʼ yomorene mä o nyawa madorou manga uru yatamunu.

⁴³Tanu o nyawa yososawaro yapikiri o hali mata-mata gënanga deʼ ihi goungu ma Jou hirahi wädora.