Read Tobelo O MAZMUR 108 Bible Online

O MAZMUR 108 - Tobelo bible

O MAZMUR 108

¹O nyanyi. O Daud ai Mazmur.

² Ngohi tongaku ibitumu, ya Jou Madutu, ngohi tomau tonyanyi deʼ toni higiriri Ngona. Hei nomomiki, ahi jiwa!

³Hei nimomiki, gambus deʼ o kecapi! Ngohi tomau tatomanga o cahaya o wange mahiwaroko.

⁴Jou, ngohi tomau tosyukur Ngonaika hagala o hoana deo berera manga hidogoronaka. Tonahihu tohi nyanyi o higiriri Ngonaika umati o nyawa manga hidogoronaka.

⁵Hababu Ani dora ilamoko hiädono o dihangil̄e deʼ Ani satia hiädono o lobi-lobil̄e.

⁶Ya Jou Madutu nohi dumutu Ani mulia o dihangoka deʼ Ani mulia o dunia yamode-modekika.

⁷ Nomi hihalamati ngomi de Ani kuaha, nöbaluhu tongomi mia niniata, hupaya hagala o nyawa Ngona nädora-dora yohalamati.

⁸Ai tau mangï itebi-tebinino ma Jou Madutu wotemo, ”Ngohi tomau toulili deʼ taregu-regu o Sikhem matonaka, o Sukot ma Wai aha Taundi.

⁹O Gilead deʼ o Manasye ganga Tongohi, o Efraim Ahi sapeo o waja, deʼ o Yehuda Ahi popareta madiki-diki.

¹⁰Mä o Moab ganga Ahi l̄ou magigihoro mangï; Ngohi toulili o Filistea tautumu. O Edomika Tohi kaweli Ahi tarupa, hokä manonako ënanga Tongohi madutu.”

¹¹O naguna aha wohiao ngohi o Edomika? O naguna wohituda ngohi o kotaika dema bebeno o mehele gënanga?

¹²Ya Jou Madutu, Ngona nonikua dede ngomi? Ngona notagiua mahimangiha de tongomi mia tentara?

¹³Nomï riwo ngomi mia haturu manga himangoka, hababu o nyawa manga roriwo koiwa mafaida.

¹⁴Kamamoi dema Jou Madutu, ngone aha honauru de hoputurungu; Unanga ganga wähohihanga tongone nanga haturu.