Read Tobelo O MAZMUR 109 Bible Online

O MAZMUR 109 - Tobelo bible

O MAZMUR 109

¹Mangale yonyä nyanyi manga tutuda. O Daud ai Mazmur. Ya Jou Madutu salalu toni higogiriri, uha kanoma rirïdoka.

²Hababu ngohi ihi parangi o nyawa madorou deʼ yotipu-tipu ihingö ngahu-ngahu hagala o jarita ielu-eluku mangale ngohi.

³Onanga ihi parangi ngohi deo demo-demo iomanga o dohata, deʼ ihi parangi koiwa mahababu.

⁴Onanga ihi kalaki ngohi, ngaroko ngohi tädora önanga, deʼ tahi niatoka önanga.

⁵Onanga ahioa yabalahi deo dorou, deʼ ahi dora deo dohata.

⁶Nïgoraka womatengo o nyawa madorou la iwihijuruhakimi ünanga, mal̄aikala ünanga ai lawani iwi kalaki.

⁷Mal̄aikala ünanga iwihi juru hakimi deʼ ihi nyata wahowono, deʼ mal̄aikala ai niniata yapulono o baradoha.

⁸ Mal̄aikala ai ngango itaiti ihi bobaha, deʼ ai pangkati o nyawa mahomoa yal̄ë.

⁹Mal̄aikala ai ngoha-ngohaka yodadi o gohihi, deʼ ngoi hekata modadi o bobao.

¹⁰Mal̄aikala aingoha-ngohaka yodadi yogaho-gahoko yotagi-tagi yakaika yakaino, deʼ ini duhu ai tau magiliangino.

¹¹Mal̄aikala hagala ai kiahonanga yasita ai nagimi yögaho-gahoko, deʼ ai kangela mahasili yaora o nyawa.

¹²Uha naga manga hininga yaoa unangika, ekola yähayangi ai ngoha-ngohaka wä mal̄a-mal̄aika.

¹³Mal̄aikala aidifauku yongodumu yäbinaha, deʼ ai romanga yawohanga o gö maduru.

¹⁴Mal̄aikala ai ete de ai tohora manga dorou kahirahi ma Jou wöhohininga, deʼ ngoi ayo ami baradoha koi eheua.

¹⁵Mal̄aikala toönanga manga baradoha salalu ma Jou wöhohininga, deʼ o dunia moiua yähohininga önanga.

¹⁶Hababu o nyawa gënanga komaiwa womä hohininga mangale wohidumutu ai hayangi de ai dora. Unanga wä aniaya o mihikini manyawa deʼ wähangihara, deʼ wätoma o nyawa ima ngaku-ngakunua.

¹⁷Unanga wöigo wololai; mal̄aikala ünanga mahirete iwikorona o lolai! Unanga wöigoua wahidöaka o barakati, mal̄aikala mangale ünanga koiwa o barakati.

¹⁸Mangale ünanga wo lolai gënanga o manarama biaha, imatero hokä ai pakeanga womahinoa. Mal̄aikala o lolai gënanga hokä o akere iwi womo ai roehika, deʼ hokä o minya ai kobo-kobongika magoronaika.

¹⁹Mal̄aikala o lolai gënanga iwi tamunika hokä o pakeanga, deʼ salalu iwipalino hokä o gorona maninikutu.

²⁰Jou, näditifa o hukumanga gënanga ihi kokalakiuku, o nyawa yotö temo-temo itotorou mangale ngohi.

²¹Mä nohiriwo ngohi imoteke de Ani jaji, ya Jou ahi Jou Madutu, nohihihalamati ngohi karana Ani oa deʼ Ani dora.

²²Hababu ngohi tomihikini deʼ tohangihara, deʼ ahi hininga yal̄abo kahälukuika.

²³Ngohi ngadeke tohihanga hokä o gurumini obobimaoa, ngohi ihi hurero hokä o kahoho.

²⁴Ahi buku ihahara karana topuaha, ahi röehe idadi i gafeaka ihi pelelaka.

²⁵ O nyawa ihimö make-make ngohi ihi hikauku inoli yagiwi-giwi manga häeke.

²⁶Nohï riwo ngohi, ya Jou ahi Jou Madutu, nohihihalamati ngohi imoteke de Ani dora.

²⁷Done ahi haturu aha ihiöriki gënanga Ani manara Ngona, Jou, nadodiai.

²⁸Ngaroko önanga ihi lolai ngohi, tanu Ngona nohi hibarakati. Ngaroko önanga yomomiki ima okoino, önanga aha yahimal̄eke; ma tanu ngohi, Ani gilaongo, tomorene.

²⁹Mal̄aikala o nyawa ihi kokalaki ngohi yähawoino o hikauku, deʼ o mal̄eke yahi hawoino hokä o juba.

³⁰Ngohi tomau tïhigiriri ma Jou takua-kuatil̄e, katï heto-hetongo Unanga o umati manga doomu mahidogoronaka.

³¹Hababu Unanga wariwo deʼ wahihalamati o mihikini manyawa onangino yägogelenga onanguku yähukumu yähohonenge.