Read Tobelo O MAZMUR 11 Bible Online

O MAZMUR 11 - Tobelo bible

O MAZMUR 11

¹Mangale yonyä nyanyi manga tutuda. O Daud ai Mazmur. Ngohi toma hohongo ma Jouika; koiwa mafaida ihi temo ngohino, ”Nohi halamati ani diri hokä o totaleo ihoho o l̄okuil̄e.

²Hababu o nyawa madorou yateli manga toimi ma l̄eha deʼ ihi tadanga manga toimi madoto hupaya ihi meta o ngï mahohuhutuika o nyawa manga hininga irö riko-rikotika.

³Nako o kawaha madatoro itiaiua, o nyawa maoa okiaua yakunu.”

⁴Ma Jou naga Ai Tau itebi-tebinoka, Ai popareta makuruhi naga o horogaka. Unanga watö tailako o nyawa deʼ wohi öriki hagala toönanga manga manarama.

⁵Ma Jou wä uji o nyawa maoa deʼ o nyawa madorou, Unanga wädohata o nyawa yöigo-igo yadö dobuturungu.

⁶O nyawa madorou Wähukumu deʼ o bodito, de o uku, o walira deʼ o hidal̄ako itö tuhu-tuhuku.

⁷Hababu ma Jou yaoa deʼ woadili, Unanga wädora o nyawa yadodiai o oa-oa; o nyawa manga hininga irö riko-rikoto aha iwimake deʼiwi nako ma Jou.