Read Tobelo O MAZMUR 118 Bible Online

O MAZMUR 118 - Tobelo bible

O MAZMUR 118

¹ Nisyukur ma Jouika hababu Unanga yaoa, Ai dora ikakali kahiado-adonika.

²Kokiani o Israel manyawa yotemo, ”Ai dora ikakali kahiado-adonika.”

³Kokiani o imam-imam yotemo, ”Ai dora ikakali kahiado-adonika.”

⁴Kokiani mata-mata o nyawa iwï modo-modongo yotemo, ”Ai dora ikakali kahiado-adonika”

⁵Ahi hidehoto magoronaka ngohi toma hiböaka ma Jouika; deʼ Unanga wohaluhu deʼ wohi hibebasi ngohi.

⁶ Ngohi tohaharua hababu ma Jou wohi totomoteke ngohi, o nyawa ihi ngakunua ngohi.

⁷Ma Jou wohi totomoteke ngohi la wohï riwo ngohi, ngohi aha tämake ahi haturu yohihanga.

⁸Deo nyawa hängaku, iholoi yaoa homa hohongo ma Jouoka.

⁹De o nyawa yomomulia homa hinganono iholoi yaoa homa hohongo ma Jouoka.

¹⁰Manga ngöe o haturu ihi higilolitino; dema Jou Ai kuaha önanga tähihanga.

¹¹O higili deo nirakino önanga ihi hidoomuino; dema Jou Ai kuaha önanga tähihanga.

¹²Hokä o ohungu önanga ihi higuruheino; dema Jou Ai kuaha önanga tähihanga. O lako dadawi önanga yähohonenge hokä o uku yatuhuku o momo ihohihika.

¹³Ngohi ihi parangi duru kahä giria deʼ ngade-ngade toruba mä ma Jou wohï riwo ngohi.

¹⁴ Ma Jou ganga ahi kuata deʼ tihi gogiriri, Unanga wohi hihalamati ngohi.

¹⁵Ni ihene youtumu youlili Ai umati manga tau-tauoka ”Ma Jou wodiai o manarama ipoputurungu!

¹⁶Ma Jou Ai kuaha inahidöaka ngone houtumu! Ma Jou wodiai o manarama ipoputurungu.”

¹⁷Ngohi aha kotohonengua, mä kahirahi towango la tohingangahu ma Jou Ai gao-gao.

¹⁸Ma Jou wohi hangiharaka duru kahä hiri, ma Unanga wohi hidöakua o honengika.

¹⁹Nihï belenga ma Jou Ai Tau mangorana ma amo-amoko, hupaya ngohi towohama deʼ tosyukur Unangika.

²⁰Nënanga ma Jou Ai ngorana ma amo-amoko duga-duga o nyawa manga hininga iriko-rikoto yakunu yatilakuru.

²¹Ngohi tonihigiriri Ngona, hababu Ngona nohimoteke ahi niniata; Ngona nohihidöakoka ngohi toutumu.

²² O helewo yaumo-umoika o tau yododiai, i dadioka o helewo o tau maliate mahohol̄e.

²³Genanga ma Jou Ai manarama, igoungu ngone hoheranga.

²⁴Nenanga o wange ma Jou wohitö tantu; niaino ngone hohimulia de homorene.

²⁵ Ngomi migahoko, Jou nomi hihalamati ngomi, ya Jou, nohidöaka ngomi miutumu!

²⁶ Nihi barakati ünanga woboa-boa dema Jou Ai romanga, ngomi minihibarakati ngini ma Jou Ai Tauoka de yaino.

²⁷Ma Jou ganga ma Jou Madutu, Unanga ai hininga imura ngoneino. Hotagi nanga himangika hotuo-tuono deo gota mararaga nanga giamoka, deʼ hakokiloliti ma Jou Ai huhuba mangï.

²⁸Ngona ahi Jou Madutu, ngohi tosyukur Ngonaika, ahi Jou Madutu ngohi toni himulia Ngona.

²⁹Tosyukur ma Jouika hababu Unanga yaoa, Ai dora ikakali kahiado-adonika.