Read Tobelo O MAZMUR 119 Bible Online

O MAZMUR 119 - Tobelo bible

O MAZMUR 119

¹Youtumu o nyawa manga wowango koiwa mahowono deʼ ihi ngounu ma Jou Ai titaika.

²Youtumu o nyawa yamote-moteke Ai pareta, deʼ manga hininga magahumu ihidailako iwi nako ma Jou.

³Youtumu o nyawa yowango yamoteke ma Jou Ai mau, deʼ yodiaiua o dorou.

⁴Ngona nomi hidöaka ngomino Ani tita, ya Jou, hupaya ngomi miadiai de mia satia.

⁵Tanu ngohi de ahi hininga ibitumu tamoteke hagala Ani datoro.

⁶Nako ngohi tatailako tohidodiai Ani pareta mata-mata, done ngohi aha koihihimal̄ekua.

⁷Nako ngohi tomä dotoko Ani putuhu iadi-adili, ngohi toni higiriri Ngona de ahi hininga madebi-debini.

⁸Ngohi tomau tohingounu Ani tita, uha hakali-kali nohi mal̄aika ngohi.

⁹O goduru yakunu wogoana ai wowango koiwa mahowono nako ünanga wowango wamoteke Ani pareta.

¹⁰De ahi hininga dema gahumu ngohi tohidailako Ngona toni nako, uha nohihigumal̄a ngohi törehene Ani pareta.

¹¹Ani dodotoko tagogono ahi hininga magoronaka, hupaya ngohi uha to baradoha Ngonaika.

¹²Ngohi toni higiriri Ngona, ya Jou, ngohi tohï dotoko nohi totatapuoka.

¹³Ngohi tohingahu takua-kuatil̄e mata-mata o tita Nohi doa-döaka.

¹⁴Ngohi tomorene tanïki hagala Ani pareta, hokä hagala irupa o arata toma hitongohi.

¹⁵Ngohi tomau tomä dotoko Napö putu-putuhu, deʼ tatailako tohidodiai hagala Ani hidumutu.

¹⁶Nohi totatapu yadiai ngohi tosanangi Ani dodotoko ngohi kotawohangua.

¹⁷Tanu Ngona ani hininga imura Ani gilaongika nënanga, hupaya ngohi hirahi towango deʼ tohingounu Ani dodotoko.

¹⁸Nahelenga ahi lako hupaya ngohi tamake o dodotoko höhera-heranga Ani tita magoronaka.

¹⁹Duga-duga katohijai-jai ngohi togogere o duniaka, uha nohï ngiunu ngohino Ani tita.

²⁰Ahi hininga yöhiri tamao duru töhohininga, ngohi töigo tohioriki Ani tita o öraha higeto-getongo.

²¹Ngona nataaere o nyawa ima ede-edenge, deʼ nälolai o nyawa Ani pareta yörehe-rehene.

²²Ngohi nohihibebasi manga hikauku deʼ manga hoheduino hababu ngohi tadiai Ani datoro.

²³Ngaroko yokökokuaha ima teke fakati ihi lawani ngohi, Ani gilaongo nënanga aha tatibanga taluku-lukuku hagala Nohi totatapu.

²⁴Hagala Ani datoro idadi ihi nonasihati ahi hininga yasosanangi.

²⁵Ngohi toma iduiha o kuhuhunoka; ahi ngango nohigilio hoihira-hirali imoteke Ani jaji.

²⁶Ngohi tohigoungu Ani manarama, de Ngona nohï baluhu; ngohi Nohi dotoko Nohi totatapu.

²⁷Nohï riwo ngohi tanako hagala Ani tita, Ani dodotoko höhera-heranga aha tatibanga taluku-lukuku.

²⁸Ahi hininga iwede-wederuku o huha yatapal̄u, ngohi Nohi hikuata imamoteke de Ani jaji.

²⁹Ngohi nohihitingaka deo ngekomo ihowo-howono, karana Ani oa, ngohi nohi dotoko Ani tita.

³⁰Ngohi toma ngirikoka mangale tohingounu, Ani pareta salalu töhohininga.

³¹Ngohi tamotekoka hagala Ani datoro, ya Jou, uha nohigumal̄a ngohi tamake o mal̄eke.

³²Dema sanangi ngohi aha tohingounu Ani pareta, hababu Ngona nadiai ngohi iholoi tomangarati.

³³Jou, ngohi nohi hidotoko hagala Nohi totatapu toena mamangarati, hupaya ngohi tamoteke hiädono mabobaha.

³⁴Nadiai ngohi tomangarati Ani tita hupaya tohingounu, deʼ tadiai de ahi hininga magahumu.

³⁵Tanu ngohi toma hijojö takëkekete Ani paretaika, karana gënanga töigo-igo.

³⁶Ngohi nohi hidöaka o ngigo mangale tohingounu Ani datoro, iholoi detö nahihu o kaya.

³⁷Ngohi nohïgoana hupaya uha takinïki ipoparahaja ngohi nohihidöaka o ngango imoteke Ani mau.

³⁸Nohikekete Ani jaji Ani gilaongino nënanga, nahidöa-döaka o nyawaika ihingou-ngounu Ngonaika.

³⁹Nohi tingaka o hikauku tömodo-modongo, karana Ani tita igoungu yaoa.

⁴⁰Ngohi nohi hidöaka o wowango ma hungi, hababu Ngona noadili, ngohi tomau tohingounu hagala Ani putuhu.

⁴¹Ya Jou, nohi hidumutu hokokia Ngona nohï dora ngohi, nohihihalamati ngohi imamoteke de Ani jaji.

⁴²Done yakunu ngohi täbaluhu o nyawa ihi hikokauku ngohi, hababu ngohi tangaku Ani demo.

⁴³Ngohi nohï riwo la salalu tahetongo o diai, hababu ngohi toma hinganono Naputu-putuhika.

⁴⁴Ngohi tomau toma hijojö hagala Ani titaika, kahiado-adonika.

⁴⁵Done ngohi aha towango tobebasi karana tohidailako tohingounu Ani dodotoko.

⁴⁶Ani datoro aha tohingangahu o kokoanoika, deʼ ngohi aha o maleke kotamakeua.

⁴⁷Ahi sanangi genangala tadiai Ani pareta, hababu ngohi katöhohininga.

⁴⁸Ngohi tahoromati deʼ katöhohininga Ani pareta, Nohitotatapu aha tatibanga taluku-lukuku.

⁴⁹Nöhininga Ani jaji Ani gilaongika nënanga, o jaji ihidoa-döaka o ngonganono ngohino.

⁵⁰Nënanga doka ihilö laru-laru ahi huha de ahi hangihara magoronaka, Ani jaji gënanga ihihidöaka ngohino o ngango.

⁵¹O nyawa yoede-edenge duru ngohi ihihikauku, mä ngohi kotörehenua Ani tita.

⁵²Ngohi töhininga Ani tita naga kahuruoninohi, de ahi hininga yalaru ya Jou.

⁵³Ngohi duru tangamo o nyawa madorouika, karana önanga yodogumalaika Ani tita.

⁵⁴Ahi ngango madodipoko madekanino o duniaka, Nohi totatapu tadiai o higiriri manyanyi malugo.

⁵⁵Maöraha o hutu-hutu tomä hininga Ngonaika, ya Jou, Ani tita kahirahi tasöino.

⁵⁶Ngohi tamake o utumu Ani pareta tohingounu magoronaka.

⁵⁷Ngona dika tonï mau, ya Jou, ngohi tojaji aha tadiai Ani dodotoko.

⁵⁸De ahi hininga magahumu ngohi togahoko Ani dora de Ani hayangi, nohï dora ngohi imamoteke de Ani jaji.

⁵⁹Ngohi tapikiroka ahi kalakuanga, deʼ tojaji aha tohingounu Ani datoro.

⁶⁰Ngohi toma tai-taiti deʼ totamaua mangale tohidagi Ani pareta.

⁶¹O nyawa madorou yatataurika manga homa mangale ngohi, ma ngohi tawohangua Ani tita.

⁶²O hutu goronaika ngohi tomomikino tomau toni higiriri Ngona, karana hagala Naputu-putuhu iadili.

⁶³Ngohi mima kohobata de mata-mata o nyawa inï modo-modongo, mata-mata o nyawa yadodiai Ani pareta.

⁶⁴O dunia iomanga de Ani dora, ya Jou, Nohï dotoko ngohi hagala Nohi totatapu.

⁶⁵Ngona nohi totomoka Ani jaji, ya Jou, deʼ nodiai o oa Ani gilaongino.

⁶⁶Nohi hidöaka ngohi o sawaro deʼ o ganako, hababu ngohi tongaku Ani pareta-paretaika.

⁶⁷Nohi hukumowahi, ngohi torehene, o oraha nënanga ngohi toma hijojö Ani paretaika.

⁶⁸Hababu Ngona yaoa deʼ nodiai o oa, nohï dotoko ngohi hagala Nohi totatapu.

⁶⁹O nyawa yoede-edenge ngohi ihi fitana, mä ngohi de ahihininga magahumu tohingounu Ani putuhu.

⁷⁰Hagala o nyawa gënanga yomangaratiua, mä mangale ngohi Ani tita yasanangi ahi hininga.

⁷¹Igoungu yaoa Ngona nohi hukumu ngohi, hupaya ngohi tanako hagala Nohi totatapu.

⁷²Mangale ngohi Ani tita iholoi maragane deo gurasi deo haaka mata-mata o duniaka.

⁷³Ngona nohi hidadi deʼ nohi tuku ngohi, ngohi nohi hidöaka o mangarati la tomä dotoko hagala Ani pareta.

⁷⁴O nyawa inï modo-modongo aha yosanangi nako ihi make ngohi, hababu ngohi toma hinganono Ani jaji ika.

⁷⁵Ngohi tohiöriki Ani putuhu iadili ya Jou, Ngona nohi hukumoka ngohi karana Ani satia.

⁷⁶Tanu Ani dora idadi ahi lolaru, imamoteke de Ani jaji Ani gilaongika.

⁷⁷Nohï dora ngohi, la ngohi aha kahirahi towango, karana Ani tita yasanangi ahi hininga.

⁷⁸Mal̄aikala o nyawa yoede-edenge idadi yamal̄eke karana ngohi ihi fitana oka mä ngohi aha tatibanga taluku-lukuku hagala Ani pareta.

⁷⁹Tanu o nyawa inï modo-modongo yoboa ngohino, mata-mata yanö nako-nako hagala Ani pareta.

⁸⁰Tanu ahi hininga yörehenua Nohi totatapuino, hupaya ngohi uha tamake o mal̄eke.

⁸¹Ahi hininga duru yonahihu o halamati Ngonaino; Ani jaji ngohi tönganono.

⁸²Ahi lako yabole tödama Ngona natotomo Ani jaji, ngohi totemo, ”Muruonoka Ngona aha nohi laru ngohi?”

⁸³Ahi kai ikororomo hokä o angguru mangï madorou, mä Nohi totatapu kotawohangua.

⁸⁴Hiädono muruonoka kokiani Ani gilaongo tosabari? Muruonoka aha Ngona nähukumu o nyawa ihï goginïki ngohi?

⁸⁵O nyawa ihi ngou-ngounu Ani tita yohaitoka o pidaha mangale ihï akali ngohi.

⁸⁶Mata-mata Ani tita yakunu hangaku, Nohï riwo ngohi, hababu ngohi ihï ginïki koiwa mahababu.

⁸⁷Ngadekohi önanga yakunu ihi toma ngohi mä ngohi toalipaua Ani paretaika.

⁸⁸Nohihihalamati ngohi hababu Ngona kahirahi nohï dora, hupaya ngohi yakunu tohingounu Ani tita.

⁸⁹Jou, Ani demo o bitumu kahiado-adonika, ikakali kahiado-adonika o horogaka.

⁹⁰Ani satia itongohono o oraha magurutu, Ngona naoko natotiail̄e o dunia hiädono kahirahi naga.

⁹¹Okia naga mata-mata o oraha nënanga, naga karana Ani pareta, hababu önanga mata-mata ganga Ani gogilaongo.

⁹²O demo ma ade Ani tita ahi morene matitiua, marai ngohi tohonengoka ahi hangihara magoronaka.

⁹³Salalu ngohi aha toalipaua Ani paretaika, hababu de gënanga Ngona nohihiwango ngohi.

⁹⁴Nohi hihalamati ngohi, hababu ngohi nënanga Tongona, ngohi tohidailakoka tohingounu Ani putuhu.

⁹⁵O nyawa madorou yototama yomau ihi toma ngohi, mä ngohi tomau tatailako tohidodiai Ani tita.

⁹⁶Tamake itotiai ma dema batingi duga-duga Ani pareta itotiai.

⁹⁷Hokokia tohohininga Ani tita; ngohi tatibanga taluku-lukuku o wange magurutu.

⁹⁸Ngohi salalu töhininga Ani paretaika, yadiai ngohi iholoi tosawaro de tongohi ahi haturu-haturu.

⁹⁹Ahi mangarati iholoi de ahi guru-guru manga mangarati, karana ngohi tatibanga taluku-lukuku hagala Ani pareta.

¹⁰⁰Ngohi iholoi tanako itiai deo nyawa o balu-baluhu, hababu ngohi taso hagala Ani putuhu.

¹⁰¹Törehene hagala o kalakuanga madorou, hupaya ngohi tohingounu Ani dodotokika.

¹⁰²Ngohi toalipaua Ani titaika, hababu Ngona ganga ngohi nohï dotoko.

¹⁰³Hokokia mamutiti Ani demo, majame iholoi imutiti deo madu!

¹⁰⁴Hagala Ani tita ihihidöaka o mangarati, hiädono ngohi tödohata o kalakuanga irusi-rusi.

¹⁰⁵Ani demo ganga o padamara ahi agurika, o cahaya la yatararono ahi ngekomo.

¹⁰⁶Tojäjaji dema koboto aha taganapi, la tomahijojö Ani putuhu iadi-adili.

¹⁰⁷Ngohi duru tohangihara, ya Jou, ahi ngango Nogoana ima moteke de Ani jaji.

¹⁰⁸Natarima ahi niniata masyukur, ya Jou, deʼ ngohi Nohï dotoko hagala Ani tita.

¹⁰⁹Ngohi salalu tohitai ahi nyawa, mä ngohi tawohangua Ani tita.

¹¹⁰O nyawa madorou o modoi ihi akana mangale ngohi, mä ngohi torehenua de Ani putuhu.

¹¹¹Ani pareta ganga ahi puhaka mangale kahiado-adonika, yadiai ahi hininga imorene.

¹¹²Ngohi duru tomau tohingounu Nohi totatapu hiädono ahi ngango mabaha.

¹¹³Ngohi duru töhohininga hagala Ani tita, tädohata o nyawa yosatia itotomua Ngonaika.

¹¹⁴Ngona ahi roriwo deʼ ahi gogoana, ngohi toma hinganono Ani jajiika.

¹¹⁵Hei o nyawa madorou nima kökurutika nihi tingaka ngohi! Ngohi tomau tohingounu Ani pareta ahi Jou Madutu.

¹¹⁶Nohi hikuata ngohi imamoteke de Ani jaji hupaya ngohi towango, uha Nohigumala ngohi ahi hininga itobiki ahi ngonganono magoronaka.

¹¹⁷Nohitiki ngohi hupaya ngohi tohalamati, deʼ salalu tatailako tohidodiai Ani pareta.

¹¹⁸Ngona nätila o nyawa yorehe-rehene nohitotatapu, parahaja dika toönanga manga tipu.

¹¹⁹O nyawa madorou mata-mata Napulono hokä o wal̄e, hababu gënanga ngohi töhohininga hagala Ani datoro.

¹²⁰Ngohi tohahara karana Toni modongo, ahi hininga ihahara Naputu-putuhika.

¹²¹Ngohi tadiaioka iadi-adili deʼ itötotiai, uha ngohi Nohihilapahi ahi lawani manga giamika.

¹²²Nojaji Ngona aha nohï riwo ngohi, uha Nahigumala o nyawa yoede-edenge ihi tuku ngohi.

¹²³Ahi lako yahihi tödama Ani bobatumu ihihihohalamati, tödama tobebasi nohi hijäjaji.

¹²⁴Nohihidiai ngohi imamoteke de Ani dora, deʼ ngohi Nohi dotoko Nohi totatapu.

¹²⁵Ngohi Ani gilaongo, nadiai ngohi tomangarati, hupaya ngohi tanako itiai Ani pareta.

¹²⁶Jou, maöraha yadonoka ngohi okianaga tadiai, hababu hagala o nyawa yatilakuru Ani tita.

¹²⁷Hagala Ani pareta katö hohininga iholoi deo gurasi, iholoi deo gurasi madutu.

¹²⁸Hababu gënanga ngohi towango imamoteke de Ani hidumutu mata-mata o kalakuanga ipopeleoko tödohata.

¹²⁹Hagala Ani datoro igoungu höheranga, done tohingounu de ahi hininga magahumu.

¹³⁰Nako tohingounu de ahi hininga magahumu. ihidöaka o mangarati o nyawa biahaika.

¹³¹Ahi womaha iuti idoa, karana tönahihu Ani pareta.

¹³²Nomaidulu ngohino deʼ ngohi Nohï dora, hokä Nädora o nyawa inïhohininga.

¹³³Nabitumu ahi aguru imamoteke de Ani jaji, uha nohigumala o dorou ihi kuaha ngohi.

¹³⁴Ngohi nohihibebasi de hagala o nyawa ihi tuku-tuku ngohi, hupaya ngohi yakunu tohingounu Ani pareta.

¹³⁵Ngohi nohihibarakati de Ani himanga, deʼ ngohi Nohï dotoko Nohi totatapu.

¹³⁶Ahi kongo ihahuru hokä o ngairi, karana Ani tita ihingounua.

¹³⁷Ngona noadili, ya Jou, Ani tita mata-mata itiai.

¹³⁸Hagala Ani pareta nohidoa-döaka iadili deʼ yakunu homa hinganono.

¹³⁹Ahi dohata mahauku ahi diri magoronaka karana ahi haturu yawohanga Ani dodotoko.

¹⁴⁰Ani jaji ikekete deʼ yakunu hangaku, ngohi duru katöhohininga.

¹⁴¹Ngohi nënanga toeteke de ahi kia-kiaua, mä ngohi toalipaua Ani dodotokika.

¹⁴²Ani adili itongohono kahiado-adonika, deʼ Ani tita salalu itiai.

¹⁴³Ngohi ihi tapal̄u o hidehoto deʼ o huha, mä Nohi totatapu ahi hininga yamorene.

¹⁴⁴Ani datoro salalu iadili, ngohi nohi hidöaka o mangarati hupaya ngohi towango.

¹⁴⁵De ahi hininga magahumu ngohi tomahiböaka Ngonaika ngohi nohïbaluhu ya Jou, ngohi tomau tohingounu Ani pareta.

¹⁴⁶Ngohi tomahiböaka Ngonaika; ngohi nohihihalamati, ngohi tomau tomahijojö Ani datorika.

¹⁴⁷O ngoru-ngorumino ngohi tomomiki deʼ tomahiböaka togahoko o roriwo; ngohi tonganono ani jajika.

¹⁴⁸O hutu yahaiwatiki ngohi toma maoino la Ani dodotoko tatibanga taluku-lukuku.

¹⁴⁹Ngohi nohihigihe-gihene karana Ani dora, ya Jou, ahi ngango Nögoana karana Ani adili.

¹⁵⁰O nyawa ihi kokokinïki ngohi ima hitigi-tiginoka, önanga manga dungutu itorou deʼ yölegaikaua Ani tita.

¹⁵¹Mä ngona noma hitigi-tigino, ya Jou, hagala Ani pareta itiai.

¹⁵²Kamahirainohi ngohi tohiöriki hagala Ani dodotokino. Ngona nohitatapu kahiado-adonika.

¹⁵³Napulono ahi huha de ahi hangihara deʼ ngohi nohihihalamati, hababu ngohi toalipaua Ani titaika.

¹⁵⁴Noriwo ahi perekara deʼ ngohi nohihibebasi; ngohi nohihihalamati imamoteke de Ani jaji.

¹⁵⁵O nyawa madorou aha koyohalamatua, karana ihingounua Nohi totatapu.

¹⁵⁶Igoungu ilamoko Ani dora de Ani hayangi, ya Jou, ngohi nohihihalamati imamoteke de Ani adili.

¹⁵⁷Manga ngöe o nyawa ihï haturu deʼ ihikinïki ngohi, mä ngohi toalipaua Ani datorika.

¹⁵⁸Ngohi tädohata tamake yososatiaokaua gënanga, hababu önanga yamotekua Ani dodotoko.

¹⁵⁹Namake hokokia töhohininga Ani pareta, ya Jou, ngohi nohihihalamati karana Ani dora.

¹⁶⁰Ani demo mata-mata itiai, hagala Ani tita iadili kahirahi kahiado-adonika.

¹⁶¹O nyawa yokokuaha ihïginïki ngohi mahababu koiwa, mä duga-duga Ani tita tömodongo.

¹⁶²Ani jaji yadiai ngohi tomorene, hokä o nyawa womatengo wamake o arata.

¹⁶³Hagala o tengeluku tödohata, mä Ani tita katöhohininga.

¹⁶⁴Ngohi tomatogu-togumua tosyukur Ngonaika, karana Ani tita iadili.

¹⁶⁵O nyawa kayöhohininga Ani tita yorïdi deʼ yosanangi, moiua yakunu yätatoko önanga.

¹⁶⁶Ngohi tödama o halamati Ngonaino, Jou, hagala Ani pareta tadiai.

¹⁶⁷Ngohi tohingounu hagala Ani pareta, deʼ töhohininga de ahi hininga magahumu.

¹⁶⁸Ngohi tohimoteke Ani pareta deʼ Ani hidumutu, hababu Ngona namake hagala ahi manarama.

¹⁶⁹Tanu ahi böaka yadono Ngonaika, ya Jou, ngohi nohihidöaka o mangarati, imamoteke de Ani jaji.

¹⁷⁰Mal̄aikala ahi gogahoko yadono Ngonaika, ngohi nohihihalamati imamoteke de Ani jaji.

¹⁷¹Ngohi tomau toni higiriri Ngona salalu, hababu Ngona nohï dotoko Nohi totatapu.

¹⁷²Ngohi tonahihu tonyanyi mangale Ani jaji, hababu hagala Ani pareta iadili.

¹⁷³Tanu Ngona salalu nömodeke Nohï riwo ngohi, hababu ngohi tomängiriki la Ani datoro tanïki.

¹⁷⁴Ahi hininga duru yönahihu o halamati Ngonaino, Ani tita yamorene ahi hininga.

¹⁷⁵Mal̄aikala ngohi towango, hupaya ngohi Toni higiriri, tanu hagala Nohitotatapu ihï riwo ngohi.

¹⁷⁶Ngohi o ngekomo tahihanga hokä o duba ihïhihanga, ho naino, deʼ nohi lingiri Ani gilaongo nënanga, hababu ngohi toalipaua hagala Ani paretaika.