Read Tobelo O MAZMUR 135 Bible Online

O MAZMUR 135 - Tobelo bible

O MAZMUR 135

¹Niwihigiriri ma Jou! Nihigiriri ma Jou Ai romanga, hei ngini Ai gogilaongo.

²Nihöhuba-huba de niwi horomati ma Jou Ai Tauoka tongone nanga Jou Madutu wogögogeroka.

³Niwi higiriri ma Jou hababu Unanga yaoa, nihigiriri Ai romanga, hababu Unanga ai hininga imura.

⁴Uanga wï iriki o Yakub mangale Ai diri, o Israel ma umati idadi kato Unanga.

⁵Hababu ngohi tohiöriki ma Jou igoungu wolamoko, Unanga womulia iholoi deo gikiri.

⁶Unanga wadiai okianaga Wömau, o dihangoka deʼ o duniaka, o ngötoka deʼ o ngöto iluku-lukuoka.

⁷O dunia mabarenoka Unanga wödotagao o lobi, Wodiai o leletongo lai awana. Daha Unanga wapareta o hidal̄oko hupaya ihupu magogogono mangï ino.

⁸O Mesir mabereraka Unanga wätoma mata-mata o ngohaka o riaka kayaoa o nyawa kayaoa o aiwani.

⁹Dokengoka Wodiai ihera-heranga deʼ o nonako mangöe la wïhukumu ma koano de mata-mata ai pegawe.

¹⁰Unanga wabinaha o hoana deo berera mangöe, deʼ Wätoma o kokoano yopoputurungu.

¹¹O Sihon o Amori ma koano, deʼ o Og o Basyan ma koano inoli o kokoano mata-mata o Kanaan matonakoka.

¹²Daha toönanga manga berera Wohidöaka idadi madutu to Israeloka Ai umati.

¹³Ya Jou, Ngona aha kahirahi inihio ade-ade, deʼ Ani romanga yöhohininga mata-mata o ngohaka deo danonguku,

¹⁴hababu Ngona nohidöaka o adili Ani umatika, deʼ nädora Ani gogilaongo.

¹⁵ Toönanga manga gikiri o dulada o gurasi deʼ o haaka, o nyawa manga giama mamanarama.

¹⁶Enanga dema uruoka, mä yakunua itemo, dema lakoka, mä yakunua imahimake.

¹⁷Enanga dema ngaukoka, mä yakunua imahihene, mauruiha yakunua ihupu o womaha.

¹⁸Tanu hoko gënanga manga nasib o nyawa yadodiai, deʼ yangaku-ngaku enangika.

¹⁹Niwihigiriri ma Jou, hei o Israel ma umati, niwihigiriri Unanga, hei ma Jou Madutu Ai imam-imam.

²⁰Niwihigiriri ma Jou, hei o Lewi manyawa, niwihigiriri Unanga, ngini mata-mata niwï modo-modongo.

²¹Niwihigiriri ma Jou o Sion mabereraka, o Yerusalem mabereraka Ai gogere mangïoka. Niwihigiriri ma Jou!