Read Tobelo O MAZMUR 136 Bible Online

O MAZMUR 136 - Tobelo bible

O MAZMUR 136

¹ Nisyukur ma Jouika, hababu Unanga yaoa; Ai dora ikakali kahiado-adonika.

²Nisyukur ma Jou Madutu Duru Woko Kurutil̄eika; Ai dora ikakali kahiado-adonika.

³Nisyukur ma Jou Duru Wokö Kurutil̄eika; Ai dora ikakali kahiado-adonika.

⁴Duga-duga Unanga wadodiai ihö hera-heranga malago-agomo; Ai dora ikakali kahiado-adonika.

⁵ De Ai barija Unanga wohidadi o dihanga; Ai dora ikakali kahiado-adonika.

⁶Unanga wohihohe o dunia o akere mal̄okuika; Ai dora ikakali kahiado-adonika.

⁷ Unanga wodiai okianaga yatotararono o dihangoka; Ai dora ikakali kahiado-adonika;

⁸o wange malako la yakuaha o wange-wange Ai dora ikakali kahiado-adonika;

⁹o mede deʼ o murumu la yakuaha o hutu-hutu; Ai dora ikakali kahiado-adonika.

¹⁰ Wätoma o Mesir mangoha-ngohaka o riaka Ai dora ikakali kahiado-adonika.

¹¹ O Israeloka Wängotaka o Mesir mabereraka de yohupu; Ai dora ikakali kahiado-adonika;

¹²de Ai giama makua-kuata deʼ mabobuturungu; Ai dora ikakali kahiado-adonika.

¹³ O Gelagah ma Ngöto Wabelaka; Ai dora ikakali kahiado-adonika.

¹⁴O Israeloka Ai umati Wä ao mahonongaika; Ai dora ikakali kahiado-adonika.

¹⁵Mä o Mesir ma koano deʼ aitentara Unanga wälutu; Ai dora ikakali kahiado-adonika.

¹⁶Wätuda Ai umati yatilakuru o tonaka ikokakaha; Ai dora ikakali kahiado-adonika.

¹⁷Wahohihanga o kokoano yopoputurungu; Ai dora ikakali kahiado-adonika;

¹⁸Wätoma o kokoano yahö heto-hetongo; Ai dora ikakali kahiado-adonika;

¹⁹ O Sihon, o Amori ma koano; Ai dora ikakali kahiado-adonika;

²⁰ deʼ o Og, o Basyan ma koano; Ai dora ikakali kahiado-adonika.

²¹Toönanga manga berera wahidöaka Ai umatika; Ai dora ikakali kahiado-adonika;

²²idadi madutu to Israel Ai gilaongo; Ai dora ikakali kahiado-adonika.

²³Unanga Wonä wohangua ngone maöraha ngone inä hohihanga; Ai dora ikakali kahiado-adonika.

²⁴Ngone Wonahibebasi o haturu manga giamino; Ai dora ikakali kahiado-adonika.

²⁵Moi-moi o dodadi mangango Watofo; Ai dora ikakali kahiado-adonika.

²⁶Nisyukur ma Jou Madutuika wakokuaha o dihanga; Ai dora ikakali kahiado-adonika.