Read Tobelo O MAZMUR 139 Bible Online

O MAZMUR 139 - Tobelo bible

O MAZMUR 139

¹Mangale yonyä nyanyi manga tutuda. O Daud ai Mazmur. Ya Jou, Ngona nohï dumunu ngohi deʼ nohi nako ngohi.

²Ngona nohiöriki hagala ahi manarama; magurutikahi Ngona nomangarati ahi dibanga.

³Ngona nohi make ngohi, kayaoa ngohi tokarajanga ekola tomahibatongo, Ngona nohiöriki hagala tadodiai.

⁴Itiai ngohi kototemo uwahi, Ngona nohiörikoka okianaga tomau tahetongo.

⁵hagala o libuku Ngona nohi higilolitino, deʼ nohï goana ngohi de Ani kuaha.

⁶Iluku holi mangale ngohi Ani ganako gënanga, ahi dibanga koyadonikaua.

⁷Okiaika yakunu ngohi toiki latö rehene Ani kuaha? Okiaika yakunu ngohi topiringana toma hikurutika de Ani himanga?

⁸Nako ngohi todoa dihangil̄e, Ngona naga dokengoka, nako ngohi tomä idu o honenge mangïoka genangoka ma Ngona naga.

⁹Nako ngohi tohoho ta tilakuru o ngöto mabarene o wange mahiwaroko ekola togogere o wange madumunu mabarenoka duru ikökurutika,

¹⁰dokengoka ma Ngona nohï riwo ngohi; dokengoka o Ani giama ihi tuda ngohi.

¹¹Nako ngohi togahoko hupaya o huhutu ihi hawoino ngohi, deʼ o dararono ihihigogilolitino imadadi o hutu-hutu,

¹²done o huhutu gënanga maihuhutuua mangale Ngona; o hutu-hutu gënanga itararono hokä o wange-wange, deʼ o huhutu gënanga hokä o dararono.

¹³Ngona nohidadi moi-moi ahi röehe mahidoku, deʼ ngohi nohituku, ngohi ayo ami ngohaka mangïoka.

¹⁴Ngohi toni higiriri Ngona hababu ngohi duru hokä biahaua! Hagala Ani manarama iheranga deʼ höheranga, ngohi igou-goungu tamao.

¹⁵Maöraha ahi kobo-kobongo nohidadi, nohidodiai nohi kodohanga ngohi ayo ami ngohaka mangïoka, magogiria ngohi towango dokengoka dei rahasia, ngohi toma ngiunua mangale Ngona.

¹⁶Ngona nohimake ngohi maöraha ngohi kao ngohaka mangï okahi; mata-mata itulihi Ani buku magoronaka; kamoiö ma imulaengowahi hagala mawange nohi tantuoka.

¹⁷Hokokia mahuha Ani dibanga mangale ngohi, ya Jou Madutu, deʼ hokokia mangöe magegetongo!

¹⁸Nako taetongo iholoi iwöe deo dowongi; nako ngohi tomomiki, Ngona katoni tibangohi.

¹⁹Tanu o nyawa madorou Näbinaha, ya Jou Madutu, nohihitingaka ikökurutika o awunu yakokopoaino!

²⁰Onanga yotemo itotorou mangale Ngona, deʼ yokoboto ielu-eluku mangale Ani kota.

²¹Ya Jou, tädohata o nyawa inï doha-dohata Ngona, ahi hininga isanangiua o nyawa Ini lawa-lawanika.

²²Onanga duru tädohata deʼ täpulono hokä ahi haturu.

²³Nohi tailako ngohi ya Jou Madutu, ahi hininga nödumunu, ngohi nohi uji deʼ nohi öriki ahi dibanga.

²⁴Nölega boteka naga o dorou ahi diri magoronaka, deʼ nohituda ngohi o ngekomo ikokakalika.