Read Tobelo O MAZMUR 141 Bible Online

O MAZMUR 141 - Tobelo bible

O MAZMUR 141

¹O Daud ai Mazmur. Ngohi tomahiböaka Ngonaika, ya Jou, itaiti nohï riwo! Nohigihene nako ngohi toma hiböaka Ngonaika.

² Natarima ahi niniata hokä ihihö huba-huba o dupa, deʼ ahi giama itoakika hokä o hutu-hutu mahuhuba.

³Ya Jou, nögoana ahi uru deʼ natötailako ahi uru makai.

⁴Nohihitingaka nakökurutika o nahihu todiai o dorou. Uha nohihigumal̄a ngohi tomahiganu deo nyawa yososatiaua detämoteke miol̄omo toönanga manga rameanga magoronaka.

⁵Nako womatengo o nyawa maoa wohi taaere, deʼ de ai hininga madebi-debini wohigohara ngohi, gënanga mangale ngohi hokä o minya duru maoa-oa ngohino. Tanu ngohi tatilaua, hababu ngohi kahokogenangika toma niata talawani toönanga manga dorou.

⁶Nako yäkokuaha önanga o bakoro helewoka deya hikaweli, önanga aha ihigoungu ahi demo-demo itiai.

⁷Tongone nanga kobo-kobongo aha ihibarihi o jere madatekino hokä moi o helewo yawederuku o tonakoka.

⁸Mä ngohi kahirahi tomahinganono Ngonaika, ya Jou ahi Jou Madutu, uha nohigumal̄a ngohi tohonenge, hababu ngohi toma ngiunu Ngonaika.

⁹Nohi goana ngohi deo modoi ihi aka-akana mangale ngohi, o nyawa madorou manga dadagokino gënanga.

¹⁰Mal̄aikala önanga yäotaka manga modoiuku mahirete, ma ngohi tanu tohalamati.