Read Tobelo O MAZMUR 144 Bible Online

O MAZMUR 144 - Tobelo bible

O MAZMUR 144

¹O Daudino. Niwi higiriri ma Jou ahi hohohongo! Unanga wohihi biaha totidingi deʼ wohïdotoko toparangi.

²Unanga ganga o roriwo deʼ wohirö riwo-riwo, wohihihalamati o ngï ngohi toma hohongo. Unanga ahi hohohongo, o ngï ngohi tomahidö dito-ditoko, hagala o hoana deo berera Wadiai imaponu ngohino.

³ Jou, mode okia o nyawa hiädono ünanga Nitö tailako? Unanga o naguna hiädono Ngona kanihidodiai.

⁴O nyawa gënanga hokä o hidal̄oko mawuwu hokä o gurumini yakaino, hoko gënanga ai ngango.

⁵Ya Jou, nahelenga Ani dihanga deʼ nouti, napeleke hagala o l̄oku hupaya inofo.

⁶Nohikaweli Ani leletongo hupaya ahi haturu yahikokitingakika, napidili Ani toimi madoto hupaya önanga yoburakituku.

⁷Ani giama nohidöaka o horogaino, deʼ ngohi nohihibebasi o nguihino. Ngohi nohihihalamati o nyawa maporetino manga kuahaino

⁸yöigo-igo yoeluku deʼ yotipu, deʼ yokoboto ielu-eluku.

⁹Ngohi aha tohi nyanyi o nyanyi malugo mahungi mangale Ngona, ya Jou Madutu, deʼ o kecapi tokuti inoli tonyanyi.

¹⁰Ngona no hidöaka o utumu o kokoanoika, deʼ nihi bebasi o Daud Ani gilaongo.

¹¹Ngohi nohihirehene o nyawa yorusi-rusi manga oworino; ngohi nohihihalamati o nyawa maporetino manga kuahaino yöigo-igo yoeluku, deʼ yotipu deʼ yokoboto yoelu-eluku.

¹²Tanu tongone nanga ngohaka o nau-nauru imagö ikahi, hokä o dadatomo imadadi ilago-agomo. Tanu tongone nanga ngohaka o ngongoheka hokä o liate mahöhailoa, yaporomu o kadato malolibuku.

¹³Tanu tongone nanga gudang iomanga madol̄a de hagala irupa o tonaka mahasili. Tanu nanga duba-duba nanga tonaka ilua-luasoka ingohaka hiädono dema saana mangöe.

¹⁴Tanu nanga hapi imol̄oka dei dogo-dogo deʼ koiwa naga ihihanga ekola yahaiotaka. Tanu hoihenua o hangihara maböaka nanga kota mangekomika.

¹⁵Youtumu o hoana deo berera hoko gënanga, youtumu o umati manga Jou Madutu ma Jou.