Read Tobelo O MAZMUR 145 Bible Online

O MAZMUR 145 - Tobelo bible

O MAZMUR 145

¹O higiriri o Daudino. Ngohi tomau tonihimulia Ngona, ya ahi Jou Madutu deʼ ahi Koano, deʼ Ngona tonihigiriri kahiado-adonika.

²O wange tohigetongo tomau tosyukur Ngonaika, deʼ Ngona toni humulia kahiado-adonika.

³Hababu ma Jou womulia deʼ duru kaiwihigogiriri, Ai kabaharanga hakunua hödumunu.

⁴Ingohaka dei danongo o nyawa aha ihigiriri Ani manarama deʼ ihingangahu Ani buturungu.

⁵Onanga aha ihingahu Ani horomati deʼ Ani mulia, Ani gao-gao töhera-heranga aha tatibanga taluku-lukuku.

⁶Onanga ihingangahu Ani manarama hömodo-modongo, Ani kabaharanga aha taheto-hetongo.

⁷O nyawa aha ihijarita hagala Ani oa deʼ yonyanyi mangale Ani adili.

⁸Ma Jou gënanga wotodora deʼ wotahayanga, itaitua wongamo deʼ salalu wädora.

⁹Unanga Ai hininga imura o nyawaika wägeto-getongo, deʼ wödora Ai dodadi mata-mata.

¹⁰Mata-mata Ani dodadi aha ini higiriri Ngona, ya Jou, yongodumu Ani umati aha yosyukur Ngonaika.

¹¹Onanga aha yahoromati Ani kuaha hokä o Koano, deʼ ihijarita Ani buturungu,

¹²hupaya mata-mata o nyawa yanako Ani manarama ilago-agomo, inoli Ani popareta imomulia deʼ ihailoa.

¹³Ani popareta kahirahi o öraha magurutu, Ani kuaha itongohono ingohaka dei danongo. Ma Jou wosatia Ai jaji ika mata-mata, Unanga iomanga o dora hagala Ai manarama magoronaka.

¹⁴Ma Jou wäriwo o nyawa o huha magoronaka, Unanga wätiki il̄e o nyawa kayoruku-rukuku.

¹⁵Mata-mata Ani dodadi mangango Ngona imahinganono; nohidöaka önanga yol̄omo ma örahoka.

¹⁶Ngona nohitotomo hagala toönanga manga paralu, hiädono önanga okiaua yokuranga.

¹⁷Ma Jou woadili hagala okianaga wododiai magoronaka deʼ i omanga o dora hagala Ai manarama magoronaka.

¹⁸Unanga womahitigi o nyawaika imahiboa-boaka Unangika, deʼ yogahoko Unangika de manga hininga itiai.

¹⁹O nyawa iwï modo-modongo Unanga wasanangi manga hininga; Unanga woihene toönanga manga böaka deʼ wahihalamati önanga.

²⁰Unanga wägoana moi-moi o nyawa iwï hohininga Unanga, mä o nyawa madorou Wäbinaha.

²¹Ngohi tomau tonihigiriri salalu Jou, tanu Ani dodadi mata-mata ihigiriri ma Jou Ai romanga kahiado-adonika.