Read Tobelo O MAZMUR 17 Bible Online

O MAZMUR 17 - Tobelo bible

O MAZMUR 17

¹O Daud ai niniata. Noihene ahi böaka togahoko o adili, natailako nohidodiai ahi niniata itö tebi-tebini, ya Jou.

²Tanu nö modeke nöriwo ahi perekara hababu Ngona nohiöriki okianaga madiai.

³Nako Ngona na uji ahi hininga deʼ noboa nohi tailako maöraha o hutu-hutu, aha Ngona namake ngohi ahi hininga itebini; ahi demo ima moteke de ahi dibanga.

⁴Ngohi tadiai okianaga Nohi popareta deʼ tä domotekua yapö pakisa.

⁵Ngohi salalu towango imoteke Ani hidumutu deʼ torehenua.

⁶Ngohi toma hiböaka Ngonaika, ya Jou Madutu, hababu Ngona nohï baluhu; nohi tailako nohidodiai deʼ noihene ahi demo-demo.

⁷Nohimatoko Ani dora ihö hera-heranga hababu Nahi halamati o nyawa imahö hohongo Ngonaika, ani datekoka önanga yahirehene manga haturu manga lolawani.

⁸Nohi paliara ngohi hokä Ani lako magomono, nohi gogono Ani gahuhu mahohohongo magoronaka

⁹o nyawa ma dorou manga lolawanika. Ngohi ihi gilolitino ahi haturu yomau ihi toma,

¹⁰önanga yanakoua o dora deʼ yotemo ikurutil̄e.

¹¹Onanga yotagi ihi lawani ngohi deʼ ihi hodoomu, yolingiri o öraha maoa hupaya ihihipaka ngohi.

¹²Onanga hokä o singa imau yagoli toënanga mainomo, o singa magö igogoana mangingiunoka.

¹³Nomomiki, ya Jou, nä lawani ahi haturu deʼ nähohihanga önanga. Nohi hihalamati ngohi de Ani oworo o nyawa madorou manga parangi.

¹⁴Nohihilapahi ngohi de hagala o nyawa ima doporono o arata o duniaka. Nä hukumu önanga de o bodito Nasosadiaoka mangale önanga. Mal̄aika toönanga manga ngohaka de manga danongo yä hukumoli.

¹⁵Mä ngohi aha toni pulono Ngona, hababu ngohi koiwa ahi howono. Maöraha ngohi tomomiki, Ani böa yadiai ahi hininga imorene.