Read Tobelo O MAZMUR 18 Bible Online

O MAZMUR 18 - Tobelo bible

O MAZMUR 18

¹Mangale yonyä nyanyi manga tutuda. O Daud ai Mazmur, ma Jou ai gilaongo. Wohi nyanyi ma Jouika maöraha o Daud wolapahi o Saul deʼ ai haturu-haturuino.

²Tonï hininga Ngonaika, ya Jou, Ngona ganga tongohi ahi kuata.

³Ma Jou hokä o bebeno o mehele ikua-kuata o ngï ngohi toma hidutuluku. Ahi Jou Madutu hokä ol̄oku o helewo o ngï ngohi toma hohongo. Hokä o dadatoko Unanga wohi tamunuku ngohi, deʼ Wohï goana ngohi hupaya salalu ahi hininga irïdi.

⁴Ngohi tomahi böaka ma Jouika ipatutu hihi gogiriri, Unanga wohihibebasi ngohi ahi haturu-haturuino.

⁵Ngohi ihi higilolitino o bodito dema honengoka deʼ o binaha manguihi ihi oluil̄e.

⁶Ngohi ihi higilolitino o bodito dema honengoka o honenge madadagoko naga ahi himangoka.

⁷Ahi dehehoto magoronaka ngohi tomahi böaka ma Jouika, ngohi topoaka ahi Jou Madutuika togahoko o roriwo. Ai Tauino Unanga woihene ahi ilingi deʼ wohi gihene wohi dodiai ahi böaka.

⁸De o dunia igiwi deʼ ihahara, ol̄oku matiti igiwi deʼ ihahara karana ma Jou Madutu Ai dohata.

⁹O nofo iopuru Ai ngunungu mapidahuku, o uku deʼ o uku mangaboho ihupu Ai uruiha.

¹⁰O dihanga wabelaka, daha Unanga wouti de o lobi mahohuhutu Ai l̄ou matimioka.

¹¹Unanga wohoho wobarenuku o malaikat ihö hoho; Unanga wobaairi o hidal̄oko magahuhu ma l̄okuino.

¹²Unanga wahawoino Ai diri de o huhutu; o lobi mahohuhutu mabö biri-birini Iwi higilolitino.

¹³Ai himangoka o leletongo, ihupu o lobi, o awana o es de o uku.

¹⁴Deo gitaowaino ma Jou woma dotoreke; Duru Wokö Kurutil̄e wohi toihene Ai ilingi.

¹⁵Unanga wohi toimi Ai toimi madoto deʼ wahi kokitingakoka Ai haturu; wö gogilio Unanga wahi utuku deo leletongo, deʼ wadiai önanga yopiringana.

¹⁶O dowongi o gahi matimioka iwero deʼ o dunia mahohol̄e ihelengaika maöraha ma Jou wadorohu Ai haturu de Ai dohata.

¹⁷Daku de yauku ma Jou wahodoa Ai giama; ngohi Wohi sö de o akere maluku-lukuoka deʼ Wohi tauru.

¹⁸Unanga wohi hihalamati o haturu yopoputurungino, deʼ hagala o nyawa ihï doha-dohata ngohi, karana önanga yokuata holi ngohino.

¹⁹Onanga ihi gohara maöraha ngohi o huha ihi tapal̄u, mä ma Jou wodadi ahi roriwo.

²⁰O boditoino Unanga wohi hilapahi deʼ wohi hihalamati ngohi karana ngohi Ai hininga yadaene.

²¹Ma Jou wabalahi ahi manarama madiai; Unanga wohihibarakati hababu ngohi tahowonua.

²²Ngohi tohingounu ma Jou Ai pareta deʼ ahi Jou Madutuoka de toma idulua.

²³Mata-mata Ai tita tatailako tohi dodiai hagala Ai pareta toalipaua.

²⁴Unanga wohiöriki ngohi koiwa ahi howono deʼ tohi tingaka ahi diri deo howono.

²⁵Done ma Jou wabalahi ahi manarama madiai hababu Unanga wohiöriki ngohi tahowonua.

²⁶Jou, Ngona nosatia o nyawa yososatiaika deʼ yaoa o nyawa maoaika.

²⁷O nyawa yotebi-tebinika Nohi nyata Ani diri notebini, mä o nyawa madorou Nä haturu.

²⁸O nyawa manga hininga itotipokouku Ngona nahihalamati, mä o nyawa ima ede-edenge Ngona nahi tipokouku.

²⁹Ngona nawango ahi hilo; ma Jou ahi Jou Madutu watararono tongohi ahi huhutu.

³⁰Ngona nohihikuata mangale tabinaha ahi haturu; de ahi Jou Madutu Ai roriwo takilianga önanga ima hitä tatokino.

³¹Ma Jou Madutu Ai manarama itotomo ma Jou Ai jaji yakunu ha ngaku. Unanga hokä o dadatoko mangale mata-mata imahö hohongo Unangika Unanga idadi hokä o.

³²Hababu duga-duga ma Jou o Jou Madutu; ma Jou Madutu dika tongone nanga roriwo.

³³Unanga ganga ma Jou Madutu wohihikuata ngohi deʼ wadiai ahi ngekomo isanangi.

³⁴ Unanga wohi kuata ahi l̄ou hokä o maijanga mal̄ou, deʼ Wö goana ahi halamati il̄oku-l̄okuika.

³⁵Unanga wohihidotoko ngohi mangale o parangi, hiädono ngohi yakunu tateli ahi toimi duru ikö kua-kuata.

³⁶Jou, Ngona nohi hohongo deʼ nohihihalamati, deʼ nohi tiki ngohi de Ani kuata; ngohi todadi iholoi tosawaro karana Ani hidailako.

³⁷Nohï goana hupaya ngohi ihi tagokua, deʼ ngohi komaiwa ihi otaka.

³⁸Tä ginïki ahi haturu deʼ tahohihanga önanga, deʼ ahi bohono toma dohuku hiädono önanga yobinaha.

³⁹Tahi paka önanga hiädono yakunokaua yomomiki, önanga yoluluiha ahi l̄ouoka ima ngakunokaua.

⁴⁰Ngona nohi hidöaka o kuata mangale toparangi, deʼ täutumu hagala ahi haturu.

⁴¹Ahi haturu Nadiai ngohioka deyo piringana; hagala o nyawa ihï doha-dohata ngohi tabinaha.

⁴²Onanga yopöaka, mä moiua yäriwo, önanga imahiböaka ma Jouika, mä Unanga kowä baluhua.

⁴³Onanga tä wede-wederuku hokä o kuhuhunu ima hikabarihi, deʼ tähehara hokä o peseke o ngekomoka.

⁴⁴O nyawa madodorouoka de Ngona nohi hibebasi, deʼ nohihidadi ngohi o nyawa takokuaha hagala o hoana de o berera manyawa; o hoana manyawa tä nako-nakoua yodadi ahi gilaongo.

⁴⁵Hagala o nyawa maporetino imaponu ngohino deʼ ihingounu nako yoihene ahi pareta.

⁴⁶Toönanga manga barani ihihangoka; önanga yohahara deʼyohupu manga ngingiunino.

⁴⁷Jou nowango! Tï higiriri ahi roriwo! Tohi mulia ma Jou Madutu Ai kabaharanga wohi hihohalamati!

⁴⁸Unanga wohihidöaka ahi haturu tä utumu; hagala o hoana de o berera manyawa Wä hohihanga ahi himangoka,

⁴⁹hagala ahi lawanino Wohi hihalamati. Jou, Ngona nohi hidöaka ahi haturu tä utumu, hagala o nyawa ma dorouino Ngona nohi hohongo.

⁵⁰ Done toni himulia Ngona hagala o hoana deo berera manga hidogoronaka, deʼ tohi nyanyi o higiriri Ngonaika.

⁵¹Ma Jou Madutu wihidöaka o utumu ma amoko Ai koanoika, Unanga kahirahi wädora Ai ngongiriki manyawa, enagënanga o Daud deʼ aidifauku kahiado-adonika.