Read Tobelo O MAZMUR 22 Bible Online

O MAZMUR 22 - Tobelo bible

O MAZMUR 22

¹Mangale yonyä nyanyi manga tutuda. Imoteke malugo: Ibatingoka mamaijanga. O Daud ai Mazmur.

² Ahi Jou Madutu, ya ahi Jou Madutu, yadodoaho Ngona nohi mal̄aika ngohi? Ngohi tomahi böaka, mä Ngona kahirahi ani gurutika, deʼ nohï riwoua ngohi.

³Ya ahi Jou Madutu, ngohi tomahi böaka o wangeoka, mä Ngona kahirahi noma rirïdi. Ngohi tomä niata maöraha o hutu-hutu, ahi hininga koiridua dika.

⁴Mä Ngona o Koano Duru Notebi-tebini, o Israeloka ini higogiriri.

⁵Tongomi mia ete de mia tohora ima hinganono Ngonaika, önanga ima hinganono deʼ Ngona nä hihalamati önanga.

⁶Onanga imahiböaka Ngonaika deʼ yolapahi; önanga imahinganono deʼ manga hininga koihuhaua.

⁷Mä ngohi nënanga o kulubati, ko nyawaua ihi hohedu deʼ manga ngöe ihi hikauku.

⁸ Mata-mata ihi make-make ngohi, ihi hohedu, manga uru yapeduru deʼ manga häeke yagiwi.

⁹ Onanga yato, ”Mal̄aika ünanga wï nganono ma Jou, hupaya ma Jou wï hihalamati, nako ma Jou wosanangi unangika!”

¹⁰Ngona nohi hihupu ngohi ayo ami mamataino, deʼ nadiai ngohi tosanangi ngohi ayo ami daparionoka.

¹¹Kadeʼ toma hiadonino, ahi nasib naga ani giama mahoatoka, ngohi ayo ka ami mamata okahi, ka Ngona ahi Jou Madutu.

¹²Uha nokurutika, hababu o bodito itigioka, deʼ moiua ihï riwo.

¹³Hokä o banteng matika, o haturu ihi hidoomuino, hokä o banteng ihühuhuku o Basan deʼ yaino ihi higilolitino.

¹⁴Onanga ihï himangino deʼ manga uru imoanil̄e, hokä o singa ipöaka deʼ ikaboto.

¹⁵Ahi kuata koiwaka hokä o akere ikopoa, mata-mata ahi kobongo madonga-donga ikoki pahaka, ahi hininga iuihi hokä o lilin.

¹⁶Ahi ngomaha itore hokä o hepe mangedere, ahi akiri ima hitaulu ahi uru gakakil̄e. Jou, Ngona nohi mal̄aika o kafo mal̄okuoka hokä o nyawa yohonengoka.

¹⁷Ngohi ihi higilolitino o nyawa madorou manga doomu; hokä o kaho dema tikaka önanga ihi hidoomuino, yatopoko ahi giama deʼ ahi l̄ou.

¹⁸Mata-mata ahi kobongo yakunu taetongo, ahi haturu ihi pulono ngohi hokä imä domina.

¹⁹ Onanga imä kokeregu ahi pakeanga, deʼ ahi juba yaundi.

²⁰Mä Ngona, uha nokurutika, ya Jou, itai-taiti naino nohï riwo, hababu ka Ngona ahi kuata.

²¹Nohirehene ahi nyawa o oworino, nohi halamati deo kaho magolino.

²²Ngohi tomä gakunua, nohi lapahi ngohi de o banteng matatadukino deʼ de o singa mauruino.

²³ Ani manarama aha tohi jarita ahi roriadodotika; Ani umati manga doomu magoronaka ngohi toni higogiriri Ngona.

²⁴Niwi higiriri Unanga, hei hagala o nyawa deʼ nia modongoka! Mata-mata o Yakub aidifauku, niwi himulia Unanga! Mata-mata o Israel aidifauku, nihuba Unangika!

²⁵Hababu Unanga wapulonua yadaene o nyawa yahi kokauku, deʼ kowo hikokurangua manga hangihara. O nyawa geonangoka Unanga kowoma idulua, mä wohi gihene nako önanga yogahoko o roriwo Unangika.

²⁶O umati manga doomu magoronaka ngohi toni higiriri Ngona, karana hagala Nadodiaioka. O umati inï modo-modongo manga himangoka tohihuba o huhuba tohi jajaji.

²⁷O mihikini manyawa aha yol̄omo hiädono yapunuhu; o nyawa yoböa-böa ma Jouika aha iwi higiriri Unanga. Tanu ngini nisosanangi kahiado-adonika!

²⁸Mata-mata o hoana deo berera aha ima hininga ma Jouika deʼ ima kilioro Unangika, hagala o hoana deo berera aha iwi huba Unanga.

²⁹Hababu kama Jou wokokuaha, Unanga wä pareta hagala o hoana deo berera.

³⁰Mata-mata o nyawa yolago-agomo aha yohuba Ai himangoka, mata-mata o nyawa yokokakaliua aha iwi huba Unanga.

³¹O ngohaka maduruil̄e yopuji ma Jouika, O ngohaka deo danongo aha Unanga iwi hingangahu.

³²O hoana deo berera ima kil̄au maduru-duruino onangika aha yahi abari ma Jou wahihalamatoka Ai umati.