Read Tobelo O MAZMUR 25 Bible Online

O MAZMUR 25 - Tobelo bible

O MAZMUR 25

¹O Daud ai Mazmur. Ngonaika, ya Jou, tohi döa ahi niniata,

²Ya ahi Jou Madutu, ngohi tongaku Ngonaika! Uha nohi mal̄aika ihi himal̄eke, deʼ ihihi uli-ulili ahi haturu-haturu.

³O nyawa yososetiaua Ngonaika aha yahi mal̄eke, mä yongaku-ngaku Ngonaika aha manga hininga ihuhaua.

⁴Nohihi dumutu Ani mau ngohino, ya Jou, nohi nyata okia kokiani todiai.

⁵Nohï dotoko deʼ nohi tuda mangale towango imoteke Ani mau, hababu ka Ngona o Jou Madutu nohihi hohalamati, ngohi salalu tomahinganono Ngonaika.

⁶Nohininga Ani oa deʼ Ani dora, ya Jou, Ngona nohi dumu-dumutu kama dodihira okahi.

⁷Nohi apongo ahi baradoha deʼ ahi howono katoma gö ikahi, nohihininga ngohi imamoteke de Ani dora deʼ Ani oa.

⁸Hababu ma Jou yaoa deʼ woadili, Unanga wohidumutu o ngekomo o nyawa yohï hihangika.

⁹Ma Jou wätuda o nyawa manga hininga itotipokouku, deʼ önanga wädotoko Ai mau.

¹⁰O nyawa ihingou-ngounu Ai jaji deʼ Ai titaika, Wahidiai deʼ o dora deʼ o setia.

¹¹Jou, nohi hiapongo imamoteke deʼ Ani jaji, hababu ahi howono ilamoko.

¹²Jou, nä dotoko o nyawa yososetiaika o ngekomo kokiani önanga yanonu.

¹³Onanga aha kahirahi yowango manga hasili ilamoko, toönanga manga ngohaka deʼ manga danongo aha yapuhaka o puhaka matonaka.

¹⁴Ma Jou ganga o nyawa iwï modo-domongo manga hobata, Unanga wohi nyata Ai dungutu onangika.

¹⁵Ahi lako kahirahi mameta ma Jouika, hababu Unanga wohi hihalamati deʼ o bodito.

¹⁶Nohi pulono deʼ nohï dora, hababu ngohioka kairïdika deʼ tohangihara.

¹⁷Ahi hininga mahuha kai holoi idogo, nohi hibebasi deʼ ahi dehehoto.

¹⁸Natailako nohi dodiai ahi hangihara deʼ ahi huha, deʼ nohi apongo ahi baradoha mata-mata.

¹⁹Namake hokokia manga ngöe ahi haturu; önanga duru ihï dohata.

²⁰Nohï goana deʼ nohi hihalamati, hupaya ngohi tamakeua o mal̄eke, hababu ngohi toma hohongo Ngonaika.

²¹Tanu o oa deʼ o hininga iriko-rikoto ihï goana ngohi, hababu ngohi toma hinganono Ngonaika.

²²Ya Jou Madutu, nahi bebasi Ani umati deʼ hagala manga hidehoto.