Read Tobelo O MAZMUR 26 Bible Online

O MAZMUR 26 - Tobelo bible

O MAZMUR 26

¹O Daud ai Mazmur. Nohidöaka o adili ngohino, ya Jou, hababu ngohi towango ahi hininga itebini. Ngohi toma hinganono ma Jouika, deʼ kamahuhutulö makoto dodatoua.

²Nohitailako, ya Jou, deʼ nohi uji, natailako ahi nahihu deʼ ahi dibanga.

³Ngohi salalu tohininga Ani dora, deʼ kahirahi tosetia Ngonaika.

⁴Ngohi toluku toma toomu deʼ yotipu-tipu, ekola tododiawo deʼ o nyawa yoelu-eluku.

⁵Tö dohata o nyawa yododiai o dorou manga doomu, o nyawa yododiai o dorou toma hirehene.

⁶Taihoro ahi giama manonako tahowonua, deʼ totagi takiloliti Ani huhuba mangi, ya Jou,

⁷ikali tohi nyanyi o syukur malugo, deʼ tohi ngahu-ngahu Ani manarama ihö hera-heranga.

⁸Ngohi tö nahihu Ani Tau, ya Jou, o ngï Ngona nogogere iomanga deʼ o mulia.

⁹Uha nohi toma kamamoi deʼ o baradoha manyawa, ekola ahi nyawa na l̄ë kamamoi deʼ o nyawa o awunu yakokopoa.

¹⁰Onanga koima togu-togumua yodiai o dorou, deʼ salalu yododamä yatarima o uru mabobokumu.

¹¹Mä ngohi towango ahi hininga itebini, nohï dora deʼ nohihibebasi.

¹²Done ngohi ahi hininga irïdi deʼ hagala o bodito, ngohi aha tihigiriri ma Jou Ai umati manga doomu magoronaka.