Read Tobelo O MAZMUR 27 Bible Online

O MAZMUR 27 - Tobelo bible

O MAZMUR 27

¹O Daud ai Mazmur. Ma Jou ganga ahi cahaya deʼ ahi halamati, okiaua tomodongo. Ma Jou ganga o bebeno o mehele ahi hohohongo, ngohi aha koto hawanua.

²Nako ngohi ihï ngino o nyawa madorou yomau ihi toma, kaönanga yopeleke deʼ yoruba.

³Ngaroko ngohi ihi higilolitino o duduono ma ago-agomo, ngohi aha koto hawanua. Ngaroko idadi o parangi ihi lawani ngohi, ngohi kahirahi toma hinganono.

⁴Duga-duga kamoi togahoko ma Jouika, duga-duga nënanga tonö nahihu: tomarïdi Jou ani Tauoka ahi wowango magurutu, mangale tamao ma Jou Ai oa deʼ togahoko Ai tutuda.

⁵Jou nohi hohongo ngohi maöraha ihi hidehoto; Unanga wohi iunu ngohi Ai Tau magoronaka, deʼ wohi goraka ngohi ol̄oku ihohelewoil̄e.

⁶Oraha nënanga ngohi täutumu ahi haturu ahi gilolitino; done deʼ ahi morene toulili tohi huba o syukur mahuhuba Ani Tauoka; ngohi tomau tonyanyi deʼ tihigiriri ma Jou.

⁷Ya Jou, noihene nako toma hiböaka Ngonaika, nohi dora deʼ nohi baluhu!

⁸Ngona notemo, ”Niboa nihihuba Ngohi.” Tohaluhu, ”Ngohi deʼ majapati toboa, ya Jou;

⁹uha nohï ngiunu ngohi.” Uha nongamo deʼ nohï umo Ani gilaongo, hababu Ngona nohï riwoka. Uha nohi umo ekola nohi mal̄aika, ya Jou Madutu nohihi hohalamati.

¹⁰Ngaroko ahi ama deʼ ngohi ayo ihi mal̄aika, ma Jou Madutu aha wohi paliara ngohi.

¹¹Nohi hidumutu Ani mau, ya Jou, nohi tuda o ngekomo iriko-rikotika, hababu kamanga ngöe ahi haturu.

¹²Uha nohihilapahi ahi lawani manga nahihuika, ihï ngino-ngino deʼ manga tengeluku deʼ yomau ihibodito.

¹³Ngohi tongaku aha tamao ma Jou Ai oa, ahi ngango magoronaka o duniaka nënanga.

¹⁴Noma hinganono ma Jouika, nakuata deʼ nabitumu ani hininga; iya, noma hinganono ma Jouika!