Read Tobelo O MAZMUR 28 Bible Online

O MAZMUR 28 - Tobelo bible

O MAZMUR 28

¹O Daud ai Mazmur. Ya Jou, Ngonaika tomahiböaka, Ngona nohi popaliara, noihene ahi böaka. Nako Ngona noma mouoka ngohino, ngohi hokä o nyawa youti-uti o lungunu mabaituku.

²Noihene ahi gogahoko nako ngohi topöaka togahoko o roriwo, deʼ nagoraka ahi giama madumutu Ani Tau itebi-tebinika.

³Uha nohi binaha ngohi kamamoi deʼ o nyawa yososetiaua, kamamoi deʼ o nyawa yododiai o dorou. Onanga yotemo-temo ialuhu, mä manga hininga iomanga deʼ mamela-mela.

⁴ Nä hukumu önanga karana toönanga manga manarama, karana o dorou önanga yadodiai. Nä hukumu imamoteke deʼ toönanga manga manarama; nahidöaka o hukumanga ima dae-daene.

⁵Onanga koyahaduliua ma Jou Ai manarama, ekola okianaga Wakö karajanga. Done Unanga aha wähukumu önanga, deʼ wäbinaha önanga ka hiado-adonika.

⁶Ma Jou tihi gogiriri, hababu Unanga woihenoka ahi gogahoko.

⁷Ma Jou ahi hohohongo deʼ ahi paliara, ngohi tingaku Unangika. Unanga wohï riwo deʼ wamorene ahi hininga, ngohi ti higiriri Unanga deʼ o syukur malugo.

⁸Ma Jou wahidöaka o kuata Ai umatika, Unanga wipaliara deʼ wihihalamati ma koano Wi iri-iriki.

⁹Nahihalamati Ani umati, ya Jou, näbarakati hagala Tongona ani nyawa. Nodadi hokä womatengo o gogoana onangika, deʼ nagoana önanga kahiado-adonika.