Read Tobelo O MAZMUR 31 Bible Online

O MAZMUR 31 - Tobelo bible

O MAZMUR 31

¹Mangale yonyä nyanyi manga tutuda. O Daud ai Mazmur.

²Ngonaika ngohi toma hihohongo ya Jou, uha nohi mal̄aika ngohi ahi hininga itobiki. Nohi hihalamati mangale ngohi deʼ Ani adili,

³Nohihigihe-gihene ngohi deʼ tai-taiti nohihibebasi ngohi. Nodadi ngohino hokä ol̄oku o helewo o ngi ngohi toma hohongo, hokä o bebeno o mehele ikö kua-kuata, kiaka ngohi tohalamati.

⁴Ya, Ngona hokä ol̄oku o helewo deʼ o bebeno o mehele ikö kua-kuata mangale ngohi! Nohi tuda ngohi imamoteke deʼ Ani jaji.

⁵Nohihirehene deʼ o modoi ihi aka-akana mangale ngohi, hababu ka Ngona o ngï ngohi toma hohongo.

⁶ Ani giama mahoatika ahi diri toma hilapahi; Ngona nohi hibebasoka ngohi, ya Jou, o Jou Madutu nososetia.

⁷O nyawa yahö huba-huba o gomanga Nä dohata; mä ngohi tingaku ma Jouika.

⁸Ngohi aha tomorene deʼ toma garago hababu Ngona kahirahi nohï dora. Ngona namake ahi hangihara deʼ natö tailako ahi huha.

⁹Ngona nohi mal̄aikaua ahi haturu ihi tagoko, mä kayakunu ngohi totagi-tagi tobebasi.

¹⁰Nohï dora ngohi, ya Jou, hababu ngohi o huha magoronaka; ahi lako yahihi karana toari, ahi röehe deʼ ahi jiwa kai popanyake.

¹¹Ahi ngango imata o hangihara magoronaka, ahi taongo ima paha o daiana magoronaka. Ahi kuata ikuranga karana ahi dorou, maboboloi ahi kobongo ikokibabitoka.

¹²Ngohi todadi o gie-giete mangale mata-mata ahi haturu ma boboloi mangale mima kokadatekika. Mata-mata mima kokanako yatodokana nako ihi make, ngohi önanga yopiringana nako mima kamake dede ngohi o ngekomoka.

¹³Ngohi ihi wohanga hokä o nyawa mahonenge, deʼ todadi hokä o baranga yaumo-umoika.

¹⁴Kiaka dika naga tamao tomodongo; toihene ahi haturu ima kokuhudu. Onanga imateke fakati ihi lawani, deʼ yadiai o datoro mangale ihi toma.

¹⁵Mä ngohi toma hinganono Ngonaika, ya Jou, hababu ka Ngona ahi Jou Madutu.

¹⁶Salalu Ngona nohi paliara; nohi hihalamati ngohi deʼ hagala ahi haturu, dede hagala o nyawa ihï goginïki.

¹⁷Tanu Ngona ani hininga yadaene Ani gilaongika; nohi hihalamati ngohi karana Ani dora.

¹⁸Uha nohi mal̄aika tamake o mal̄eke, ya Jou, hababu ngohi toma hiböaka Ngonaika. Mal̄aika o nyawa madorou yahi mal̄eke, deʼ koiwa mademo youti o nyawa yohone-honenge manga duniauku.

¹⁹Najumu o nyawa yoelu-eluku manga uru deʼ manga edenge yahohedu o nyawa manga hininga iriko-rikoto.

²⁰Duru dema boboloi Ani oa Nasosadia mangale o nyawa inï modo-modongo! Moi-moi o nyawa yamake o oa Nadodiai, mangale önanga ima hohohongo Ngonaika.

²¹Ngona nä iunu önanga Ani hohohongo magoronaka o nyawa madorou manga siasatika; Nä goana önanga Ani hohohongo magoronaka manga lawani manga galakika.

²²Tihigiriri ma Jou! Duru töheranga Ai dora ngohino, maöraha ngohi ihihigilolitino deʼ ihi lawani.

²³Ahi bingu magoronaka ngohi tatobote Ai himangoka wohi umoka ma Jou. Mä Unanga woihenoka ahi gogahoko maöraha ngohi tomahi böaka Unangika.

²⁴Niwi hayangi ma Jou, hei ningodumu Ai umati, ma Jou wä hohongo o nyawa yososatia. Mä o nyawa manga hininga ikökurutil̄e Wä hukumu wagou-goungu.

²⁵Nia kuata deʼ nia bitumu nia hininga, ngini mata-mata nimahi ngano-nganono ma Jouika!