Read Tobelo O MAZMUR 33 Bible Online

O MAZMUR 33 - Tobelo bible

O MAZMUR 33

¹Hei hagala o nyawa nia wowango itebi-tebini, niulili nimorene karana okianaga ma Jou wadodiaioka; ipatutu o nyawa manga hininga iriko-rikoto iwihi gogiriri.

²Nisyukur ma Jouika deo kecapi, niwida nyanyi Unangika de nihi ginïki de o musik.

³Nihi nyanyi o nyanyi mahungi mangale ma Jou, nihi dodiai o kecapi nihi gogule deʼ niulili de nia morene!

⁴Mata-mata ma Jou Ai demo yakunu hangaku; Unanga wosatia hagala Ai manarama magoronaka.

⁵Unanga wöigo o hininga iriko-rikoto deʼ o adili; o dunia yamode-modekika iomanga de Ai dora.

⁶Ma Jou wohidöaka o pareta, done o dihanga idadi; o wange malako, o mede deʼ o murumu wohidadi de Ai demo.

⁷Mata-mata o gahi Watoomu o ngï moioka, o ngoto ma ago-agomika Watumungu o lupanga ma ago-agomo ma bebeno magoronaka.

⁸Mal̄aikala o dunia yamode-modekika iwï modongo ma Jouika deʼ o dunia yogogogere iwi horomati Unanga.

⁹Hababu Unanga de wotemo, daha mata-mata wohi dadi, Unanga wohi pareta done mata-mata naga.

¹⁰O hoana deo berera manga datoro ma Jou watatoko, Unanga wahohihanga toönanga manga dungutu.

¹¹Mä ma Jou Ai datoro kahirahi igogogere, Ai datoro ibitumu o öraha magurutu.

¹²Youtumu o hoana deo berera iwi ngaku-ngaku ma Jou hokä manga Jou Madutu, youtumu o umati Wa iri-iriki yodadi Tounanga madutu!

¹³O horogaka de ma Jou womä legauku, deʼ Unanga wämake yongodumu o umati.

¹⁴Ai popareta makuruhioka de ma Jou watötailako mata-mata yogogogere o dunia.

¹⁵Ka Unanga wadiai toönanga manga hininga, deʼ wanako hagala toönanga manga manarama.

¹⁶Ma koano woutumua karana aitentara manga ngöe, o tentara wohalamatua karana ikuata!

¹⁷O kuda yakunua yönganono mangale youtumu, manga kuata ma ago-agomo yakunua yahihalamati.

¹⁸Ma Jou wägoana hagala o nyawa iwï modo-modongo yongö ngano-nganono Ai dora.

¹⁹Unanga wahirehene o honenge, deʼ wäpaliara o habirokata maorahoka.

²⁰Done ngone homa hinganono ma Jouika, ka Unanga naga roriwo deʼ nanga gogoana.

²¹Ngone homorene karana Unanga deʼ hangaku Ai romanga itebi-tebinika.

²²Tanu ngomi kahirahi Ngona nomï dora, ya Jou, hababu ngomi mima hinganono Ngonaika.