Read Tobelo O MAZMUR 34 Bible Online

O MAZMUR 34 - Tobelo bible

O MAZMUR 34

¹ O Daud ai Mazmur, maöraha ünanga woma eluku ai hininga itiaiua o Abimelekh ai himangoka, hiädono ünanga iwi duhu wosobo.

²Ngohi tomau tosyukur ma Jouika o öraha ihi geto-getongo, deʼ toma togu-togumua tï higiriri Unanga.

³Ngohi tomau toma hohanauru karana ma Jou Ai manarama; tanu o nyawa yahi kokauku yoihene deʼ yomorene.

⁴Dede ngohi hihimulia ma Jou, niaino homa komoteke hohimulia Ai romanga.

⁵Ngohi tomä niata ma Jouika, deʼ Unanga wohï baluhu, deʼ wohi hilapahi deʼ hagala o modongo.

⁶O nyawa yahikokauku ima hinganono Unangika deʼ yomorene, onangoka koiwa o hababu mangale idadi yämal̄eke.

⁷O nyawa yobobodito ima hiboaka deʼ ma Jou wäbaluhu, wahirehene de hagala manga hidehoto.

⁸Ma Jou Ai malaikat yagoana o nyawa iwï modo-modongo, deʼ wahirehene de hagala o bodito.

⁹ Nia mao mahirete hokokia ma Jou Ai oa, youtumu o nyawa ima hohohongo Unangika.

¹⁰Niwi horomati ma Jou, hei ngini Ai umati, hababu o nyawa iwï modo-modongo aha kokiaua yokuranga.

¹¹Hagala o singaö yahahini karana o inomo ikuranga; mä o nyawa iwihö huba-huba ma Jou kokiaua yokuranga.

¹²Ni ihene hei o ngoha-ngohaka mata-mata, tinï dotoko ngini niwi horomati ma Jou.

¹³ Nio nahihu nia umuru ikurutu deʼ nia mao ma oa-oa?

¹⁴Uha nihi hupu o demo-demo madorou, deʼ uha nio igo o tengeluku.

¹⁵Nima hitingaka itotorou, niadiai ma oa-oa, ka genangö nia kuata nihi dailako o dame.

¹⁶Ma Jou watötailako o nyawa manga wowango itebi-tebini, Unanga woihene nako yopöaka yogahoko o roriwo.

¹⁷Mä o nyawa yododiai o dorou Wälawani; nako önanga yohonenge, önanga itaiti yäwohanga.

¹⁸Nako o nyawa manga wowango itebi-tebini yopöaka, ma Jou wohi gihene, deʼ wahihalamati de hagala o dehehoto.

¹⁹Ma Jou wotigi o nyawa manga hininga kai hawa-hawanokaika; Unanga wahihalamati o nyawa manga nauru ihihihangoka.

²⁰O nyawa ma oa ai huha iwöe, mä ma Jou wihi bebasi ünanga mata-mata.

²¹ Ai röehe hirahi ma Jou wogoana, ai kobongo kamoiö mayatobikua.

²²O nyawa madorou aha wohonenge karana ai dorou, o nyawa yadoha-dohata o nyawa manga wowango itebi-tebini aha yahukumu.

²³Ma Jou wahihalamati ai gogilaongo; ima hohohongo Unangika aha koyä hukumua.