Read Tobelo O MAZMUR 38 Bible Online

O MAZMUR 38 - Tobelo bible

O MAZMUR 38

¹O Daud ai Mazmur maöraha wohihuba o hohininga mahuhuba.

²Jou, uha ngohi nohi hukumu Ani gangamo magoronaka, uha ngohi nohi hangihara Ani dohata magoronaka.

³Ani toimi ihi totara yal̄abo ahi röehe, Ani giama tamao madubuho ihi tuku ngohi.

⁴Ngohi topanyake itubuho karana Ani gangamo; koiwa itumuloa ahi röehoka karana ahi baradoha.

⁵Ngohi ihi lutu ahi howono manguihi magoronauku, ahi baradoha magina itubuho holi ngohiuku.

⁶Ahi nabo-nabo dema galigono deʼ yömela, karana ngohi toma diaioka tobodo.

⁷Ngohi toponuku deʼ tohuguku, o wange magurutu kato mongorika deʼ ahi hininga ihuha.

⁸O gogama yatuhuku ahi röehe, koiwa o dumuloa ahi röehoka.

⁹Ngohi towede-wederuku deʼ koiwaka ahi kuata, ngohi tokururihi karana ahi hininga iridua.

¹⁰Jou, Ngona nohiöriki hagala ahi nahihu, ahi daiana kotonï giunua.

¹¹Ahi huo kai hahahara, ahi kuata ihihanga, ahi lako itararonokaua.

¹²Ahi dodiawo ima hirehene karana ahi panyake, maboboloi ahi roriadodoto ima hitingaka dede ngohi.

¹³O nyawa yonö nahihu ihi toma o modoi ihi hiakana; yonö nahihu ngohi ihi hibodito ihï dodorohu yomau ihi hohonenge.

¹⁴Mä ngohi hokä o nyawa yatotopongono koto ihenua, hokä o nyawa yomou-mou koto temoua.

¹⁵Igoungu, ngohi hokä o nyawa yoihenua, deʼ karana gënanga toma lawanua.

¹⁶Mä ngohi tomahi nganono Ngonaika, ya Jou, deʼ Ngona, ma Jou ahi Jou Madutu, Ngona nohï baluhu.

¹⁷Uha nä mal̄aika ahi haturu yosanangi yamake ahi huha, uha nä higumal̄a önanga yotemo ihi hohomoa, nako ngohi togiwi.

¹⁸Ngohi ngade-ngadeke ihi otaka, kahokogenangika ngohi tohiri.

¹⁹Ngohi tomangaku hagala ahi baradoha, ahi hininga ieteke tapikiri ahi howono.

²⁰Hagala o nyawa ihihöhaturu ngohi yowöe deʼ yokuata, önanga yödohata ahi wowango madodagi.

²¹O nyawa yabala-balahi o oa deo dorou ihï haturu ngohi karana ngohi todiai yaoa-oa.

²²Ya Jou, ngohi uha nohi mal̄aika, uha nokurutika dede ngohi, ya ahi Jou Madutu.

²³Itaitino noboa nohï riwo ngohi, ya Jou nohihi hohalamati.