Read Tobelo O MAZMUR 39 Bible Online

O MAZMUR 39 - Tobelo bible

O MAZMUR 39

¹Mangale yonyä nyanyi manga tutuda. O Daud ai Mazmur. Mangale o Yedutun.

²Tomapikiri, ”Ngohi tomau tögoana ahi diri hupaya de ahi akiri uha tobaradoha. Ngohi toluku totemo-temo nako o nyawa madorou ka ahi datekokahi.”

³Ngohi toma toilingua o bahasa o ribuhu moi, hiädono tohi rugi ahi diri mahirete. deʼ ahi hangihara tamao idogo itubuho;

⁴ngohi ihi hokoto o hininga mahuha itotubuho. Iholoi tapikiri, iholoi ihuha ahi hininga; mabaha ngohi totemo,

⁵”Jou, nohi hingahu muruonoka ahi ajali hupaya ngohi tohiöriki hokokia mamodipoko ahi ngango.”

⁶Hokokia mamodipoko Nohi tantu ahi umuru! Ahi ngango mahoana koiwa mamangarati Ngonaika. Igoungu, o nyawa hokä wowomaha dika,

⁷ai ngango ipaha hokä o gurumini. Mata-mata ai manarama kaparahaja dika, ünanga watoporono o arata, mä wohiorikua o nagona aha yapake.

⁸Oraha nënanga okia tödodama ya Jou? Ngonaika ahi ngonganono.

⁹Nohihirehene ngohi ahi baradohaino mata-mata, uha ngohi nohi mal̄aika idadi yobodo-bodo manga hohedu mangi.

¹⁰Ngohi toma rirïdi deʼ ahi uru tahelengaua; hababu Ngona nohi gohara ngohi.

¹¹Nal̄ë ngohioka Ani hukumanga, hababu ngohi ngade tohonenge karana Ani gogohara.

¹²O nyawa karana manga howono; Nähukumu deʼ Nägohara hokä o goguhu Nawedere okianaga dema ijaka onangika. Igoungu, o nyawa hokä o ngomaha moi dika.

¹³Noihene ahi niniata ya Jou, natailako nohidodiai ahi gogahoko; uha kanoma rirïdi nako ngohi toari. Hokä mata-mata ahi ete de ahi tohora, duga-duga kajai-jai dika ngohi toma hidodogumika Ngonaka.

¹⁴Uha ngohi nohi burakiti, hupaya ngohi mahuhutulu tosanangi, ngohi kotoikowahi deʼ komoiokaua.