Read Tobelo O MAZMUR 40 Bible Online

O MAZMUR 40 - Tobelo bible

O MAZMUR 40

¹Mangale yonyä nyanyi manga tutuda. O Daud ai Mazmur.

²De ahi sabari todamä ma Jou Ai roriwo; daha Unanga ngohi wohi tailako wohidodiai deʼ woihene ahi boaka.

³Unanga wohitauru ngohi o baiti dema boboditokail̄e, de o tonaka mapeseke ilepa-lepaka. Unanga wohi higogere ngohi o doporono ihohelewo mal̄okuoka, hiädono ahi aguru kahirahi.

⁴Unanga wohï dotoko ngohi tohi nyanyi o nyanyi mahungi, o higiriri ma nyanyi mangale tongone nanga Jou Madutu. O nyawa manga ngöe iwi make deʼ idadi yohawana, daha iwi ngaku ma Jouika.

⁵Youtumu o nyawa iwi ngaku-ngaku ma Jouika, yonikua yahuba hagala o gikiri, ekola yogahoko o roriwo o nyawa yoede-edengika.

⁶Jou hokokia mangöe Ani manarama mangale ngomi, ya Jou ahi Jou Madutu, Ngona koiwa honihitero. Mangöe Ani datoro ihera-heranga mangale ngomi, yakunua ihijarita mata-mata.

⁷ Ihihö huba-huba deʼ o huhuba idodiaiuku Ngona konö igoua, o huhuba yatö tuhu-tuhuku deʼ o huhuba o baradoha magegehe Nö gahokua. Mä Ngona nohi hidöakoka ngohi o ngauku yakunu toihene Ani ilingi.

⁸De ngohi totemo, ”Nenanga ngohi, o buku yalü luluino magoronaka yatulihi mangale ngohi.

⁹Ngohi tosanangi tadiai Ani mau, ya Jou Madutu, Ani tita tagogono ahi hininga magoronaka.”

¹⁰Ani umati manga doomu magoronaka tohingahu o morene ma abari Ngona nomi hihalamatoka. Madodogumu koiwa o hali gënanga tohingahu, Ngona nohiöriki mata-mata gënanga, ya Jou.

¹¹O halamti ma abari gënanga tagogonua ahi hininga magoronaka, Ani roriwo deʼ Ani setia salalu tohi abari. Ani umati manga doomu mahimangoka ngohi toma rirïdua, mä tohingahu Ani dora deʼ Ani setia.

¹²Jou, uha nomatogumu nohï dora ngohi; ngohi nohi hohongo salalu de Ani dora deʼ Ani setia.

¹³Ngohi ihi higilolitinoka o bodito deo hangihara iwöe-wöe, mangöe taetongo takunua. Hagala ahi baradoha ngohi ihi ginïki hiädono ngohi toma himakeokaua. Mangöe iholoi deo tadauru ahi häekoka, yadiai ngohi ahi nganono itoaka.

¹⁴Ya Jou ngohi nohihihalamati, Jou itai-taiti ngohi nohï riwo!

¹⁵Mal̄aikala o nyawa yöigo-igo ngohi ihi toma yähohihanga deʼ yopiringana imahi kokorikokaua. Mal̄aikala o nyawa ihi uli-ulili ahi bodito yähidodohuku deʼ yahikauku.

¹⁶Mal̄aikala o nyawa ihi gogiete ngohi idadi yätodokana deʼ yämal̄eke.

¹⁷Tanu mata-mata o nyawa ini huba-huba Ngona yomorene deʼ manga hininga isanangi, deʼ mata-mata yoigo-igo o halamati Ngonaino igila-gila yotemo, ”Igoungu nomulia Jou.”

¹⁸Ngohi nënanga tomihikini deʼ tobole, mä ma Jou kawohi totailako. Ngona ahi roriwo deʼ nohi hihalamati, uha noma totedekana, ya ahi Jou Madutu!