Read Tobelo O MAZMUR 41 Bible Online

O MAZMUR 41 - Tobelo bible

O MAZMUR 41

¹Mangale yonyä nyanyi manga tutuda. O Daud ai Mazmur.

²Youtumu o nyawa ihidö dailako o nyawa yokua-kuatua; ma Jou aha wïriwo ünanga maöraha iwi hidehoto.

³Ma Jou aha wïhohongo deʼ wïpaliara ünanga, ünanga wihiutumu o duniaka, deʼünanga wihilapahiua ai haturu manga giama mahoatika.

⁴Ma Jou aha wïriwo ünanga maöraha wopanyake, deʼai panyake wohi togumu.

⁵Ngohi tato, ”Ngohi tobaradohaka Ngonaika, ya Jou, nohi dora ngohi deʼ nohihitogumu.”

⁶Ahi haturu yotemo itorou mangale ngohi, önanga yöigo hupaya ngohi tohonenge deʼ ihi wohanga.

⁷Hagala o nyawa ihitö tailako ngohi manga hininga itebinua. Onanga yatoomu o abari itotorou mangale ngohi, de ihi ngahu-ngahu kiaika honanga.

⁸Mata-mata ngohi ihï doha-dohata ima kokuhudu; önanga yotemo duru itotorou mangale ngohi.

⁹Onanga yato, ”Ai panyake duru itubuho, ünanga wakunokaua womomiki.”

¹⁰ Maboboloi ahi dodiawo duru tä ngaku-ngaku, o nyawa miol̄o-ol̄omo dede ngohi ihi hikaukuoka ngohi.

¹¹Ngohi nohï dora ya Jou, ngohi nohihitogumu, hupaya ngohi yakunu tabalahi hagala ahi lawani manga dorou.

¹²Nako ngohi ihi utumua ahi haturu, ngohi tohiöriki Ngona ani hininga yadaene ngohino.

¹³Ngona nohï riwo karana ahi hininga madebini, deʼ nadiai ngohi towango dede Ngona kahiado-adonika.

¹⁴ Niwi higiriri ma Jou, o Israeloka manga Jou Madutu! Niwi higiriri Unanga öraha nënanga deʼ kahiado-adonika! Idadi hoko gënanga. Amin!