Read Tobelo O MAZMUR 44 Bible Online

O MAZMUR 44 - Tobelo bible

O MAZMUR 44

¹O Korah ai ahali manga Mazmur. O dodotoko manyanyi. Mangale yonyä nyanyi manga tutuda.

²Ya Jou Madutu, ngomi mahirete mi ihenoka o jarita ihijojarita miaete de mia tohora mangale o manarama hömodo-modongo Nadodiai mahiraino.

³Ngona mahirete näduhu hagala o hoana deo berera manyawa hupaya Ani umati kahirahi yogogere toönanga manga bereraka. Hagala o hoana deo berera manyawa mahomoa Ngona näbodito, mä Ani umati Ngona nohigumal̄a yodogo-dogo.

⁴O tonaka gënanga önanga koyaoraua deo oworo; de toönanga manga kuatua mahirete önanga youtumu, mä de Ani himanga makuaha deʼ macahaya hababu Ngona ani hininga yadaene Ani umatika.

⁵Ngona ahi Koano deʼ ahi Jou Madutu, nahidö döa-döaka o utumu Ani umatika.

⁶De Ani kuaha ngomi mia hohihanga tongomi mia haturu, deʼ mia hohihanga hagala o nyawa imï poparangi ngomi.

⁷Hababu ngohi tönganonua ahi toimi, ahi oworo ma aha koihihalamatiua ngohi.

⁸Mä Ngona mia haturuoka de nomi hihalamati ngomi, deʼ nä hohihanga hagala o nyawa imï doha-dohata ngomi.

⁹Done ngomi aha salalu mini hilamoko Ngona, deʼ kahokogenangika misyukur Ngonaika.

¹⁰Mä öraha nënanga Ngona nomi mal̄aika ngomi deʼ nomi mal̄aika ngomi imï hohihanga. Ngona notagiokaua Ani himangiha de tongomi mia duduono.

¹¹Ngona nomi mal̄aika ngomi mia haturuoka de mipiringana, deʼ önanga imï ora tongomi mia arata.

¹²Ngona nomi mal̄aika ngomi imï toaka hokä o duba, deʼ ngomi Nomi hikabarihi hagala o hoana deo berera manyawa manga hidogoronaka.

¹³Ngona nä hukumu Ani umati de okia moiua maija, deʼ mautumu okia-kiaua namake.

¹⁴Ngona nadiai ngomi mima kokadateke manga hohedu önanga imï hohedu deʼ imi gogiete ngomi.

¹⁵Ngona nadiai ngomi hagala o hoana deʼ o berera manga hohedu mangi; önanga manga häeke yagiwi de inoli ngomi imihikauku.

¹⁶O wange magurutu ngohi ihi hohedu, tatagongo o mal̄eke deʼ ahi biono magurutil̄eua,

¹⁷karana toihene o hohedu deʼ o hikauku ahi haturu deʼihi doha-dohata manga uruiha.

¹⁸Mata-mata gënanga ngomi imi tapal̄uoka ngaroko ngomi mini wohangua Ngona ekola mia tilakuru Ani jaji dede ngomi.

¹⁹Mia hininga Ngona mini hipongonua; Ani pareta ngomi mia tingakikaua mia datekoka.

²⁰Mä Ngona nomi mal̄aika ngomi o huhutu magoronaka; ngomi okiaua miakunu o aiwani madorou mahidogoronaka.

²¹O demo ma ade ngomi miwi hubaokaua ma Jou Madutu, duga-duga mimä niata o gikiri mahomoaika,

²²ma Jou Madutu marai aha wohiöriki, hababu Unanga wödumunu tongomi mia hininga marahasia.

²³ Mangale Ngona ngomi kahokogenangika o honenge imi dodama, deʼimi hidiai hokä o duba yatoa-toaka.

²⁴Nomomiki ya Jou! Yadodoaho Ngona noma idu? Noma oko! Uha nomï umo ngomi kahiado-adonika.

²⁵Yadodoaho Ngona noma ngiunu, deʼ nawohanga tongomi mia huha de mia hangihara?

²⁶Ngomi mitifa miwedere o tonakoka, miluluiha o kafo magoronaka karana imï bole?

²⁷Noma oko deʼ noboa nomï riwo, ngomi nomi hihalamati karana Ani dora.