Read Tobelo O MAZMUR 45 Bible Online

O MAZMUR 45 - Tobelo bible

O MAZMUR 45

¹O Korah ai ahali manga Mazmur. O dora ma nyanyi. Mangale yonyä nyanyi manga tutuda. Imoteke o bunga bakung malugo madoomu.

²Hagala o demo mahohailoa ihebulu ahi hiningail̄e, tohihuba ahi nyanyi ma koanoika. Hokä womatengo wotö tuli-tulihi wososawaro ai pena ahi akiri katohigoa-goana tahetongo o dolabololo.

³O nyawa manga hidogoronaka ngona iholoi nohailoa, ani demo-demo iomanga de o oa, hababu gënanga ngona ma Jou Madutu woni hibarakati mangale kahiado-adonika.

⁴Nohiliko ani oworo ani goronaino, hei koano nopoputurungu, ngona duru nomulia deʼ nokaramata!

⁵Notagi ani himangiha de ani nauru nödumutu o utumu nö riwo o diai deʼ o adili ma aluhu; de ani kuata naora o utumu ma amo-amoko!

⁶Ani toimi madö doto-doto yatotara ani haturu manga huo, hagala o hoana deo berera manyawa yoduruba ani l̄ou mahimanguku.

⁷ Ma Jou Madutu wonihidöaka ngona o kuaha mangale nopareta, ani kuaha kahirahi marioka kahiado-adonika; dema adili ngona näpareta ani kawaha.

⁸Ngona nöigo o diai deʼ nödohata o dorou; hababu gënanga, ma Jou Madutu, ani Jou Madutu woni irikoka, deʼ woni hisanangioka ngona iholoi deo kokoano mahomoa.

⁹Ani pakeanga mabounu o mur, o gaharu deʼ o cendana; o musik ihi gogogule o kadato gadingoka yadiai ngona nomorene.

¹⁰O kadato mamomoholehe manga hidogoronaka yamake ma koano ai ngoha-ngohaka o ngoheka. O popareta makuruhi manirakoka moma okoino ma jou Boki de ami poromu o gurasi madutu.

¹¹Hei ma koano ngoi ora, noihene ahi demo-demo, nawohanga ani hoana manyawa deʼ ani roriadodoto.

¹²Ani hailoa yatauru ma koano ai hininga, ünanga ani tuanga, noma ponu unangika.

¹³O Tirus maberera madutu yaoa o huhuba ngonaika; o nyawa kaya ihidailako yal̄e ani hininga.

¹⁴Ma koano ngoi ora mowohama de ami karamata, ami baju ihi bootekika o gurasi.

¹⁵De ami pakeanga marupa mangöe münanga imi hiduono makoanoika, imi nïkino o momoholehe maboro, ami dodiawo, onangö mangale ma koano.

¹⁶Onanga youlili de yohagaga deyo more-morene maöraha imi ngotaka ma koano ai kadato magoronaika!

¹⁷Ngona, ahi Koano, aha namake manga ngöe o ngohaka o nauru mangale yogogere ani ete de ani tohora manga popareta makuruhi. Onanga aha nahidadi yokokuaha o dunia mal̄okuoka.

¹⁸De o nyanyi malugo nënanga Ngona toni heto-hetongo iete de itohora hagala o hoana deo berera manyawa aha ini higiriri ngona ka kahiado-adonika.