Read Tobelo O MAZMUR 49 Bible Online

O MAZMUR 49 - Tobelo bible

O MAZMUR 49

¹O Korah ai ahali manga Mazmur. Mangale yonyä nyanyi manga tutuda.

²Ni ihene, hei hagala hoana deo berera, nia ngauku nihidakunu, hei o duniaka nigö gogere,

³kayaoa o nyawa biaha, kayaoa o nyawa yolago-agomo, kayaoa o mihikini manyawa, kayaoa o kaya manyawa.

⁴Ngohi aha tahetongo o barija mademo-demo, ahi dibanga duru iluku.

⁵Ngohi aha tatailako o dola bololo, deʼ tohi tararono mamangarati de ikali tohigogule o kecapi.

⁶Ngohi tohawanua maöraha o hidehoto magoronaka, maöraha ngohi ihi higilolitino ahi haturu madorou.

⁷Onanga gënanga yonganono manga kaya, deʼ ima hiedenge manga arata.

⁸Igoungu kaimatengo ma yakunua yahihalamati manga riadodoto, ekola yofangu manga duduhuhu ma Jou Madutuika.

⁹Okia dika yahidöaka aha koyä wedonua; ihali holi manga jiwa maduduhuhu maija,

¹⁰hupaya ünanga iwi hirehene deo honenge deʼ yakunu wowango kahiado-adonika.

¹¹Kowali, ünanga aha wamake o nyawa yososawaro mayohonenge. O nyawa fuma deʼ o nyawa bodo kamamoi yobinaha, deʼ yamal̄aika manga arata mangale o nyawa mahomoa.

¹²Onanga aha yogogere o lungunoka kahiado-adonika; gënangadoka toönanga manga gogere ihi gila-gila, ngaroko mahira toönanga manga tonaka i woë ngaroka mahira toönanga manga tonaka ma amoko.

¹³O nyawa yakunua yowango ihigila-gila o sanangi magoronaka; hokä o aiwani onangö aha yobinaha.

¹⁴Hoko gënanga manga nasib o nyawa yöngano-nganono manga diri, deʼ manga himangika o nyawa ihiaku-akunu manga demo.

¹⁵Hokä o duba, önanga ihi tantuoka yohonenge; o honenge aha idadi toönanga manga gogoana. O ngoru-ngorumino o nyawa manga hininga iriko-rikotoönanga yahohihanga; toönanga manga röehe dema japati yömela o nyawa yohone-honenge manga duniaka, ikurutika deo ngï isosanangi.

¹⁶Mä ma Jou Madutu aha ngohi wohihibebasi, Unanga aha ngohi wohi hilapahi deo honenge makuaha.

¹⁷Uha nohawana nako womatengo idadi wokaya, deʼ ai arata idogo iwöe.

¹⁸Hababu maöraha wohonenge ünanga yakunua okianaga woao, ai arata aha koiutiua dede ünanga o lungunuku.

¹⁹Maboboloi nako womatengo woutumu ai ngango magoronaka, deʼ iwi gora-goraka karana wohasili,

²⁰Unanga aha wahi duru ai ete de ai tohoraö o ngï mahohuhutuika kahiado-adonika.

²¹O nyawa yakunua ihi gila yowango o sanangi magoronaka, hokä o aiwani, unangö ma aha wobinaha.