Read Tobelo O MAZMUR 5 Bible Online

O MAZMUR 5 - Tobelo bible

O MAZMUR 5

¹Mangale yonyä nyanyi manga tutuda. De o suling ihi gogule. O Daud ai Mazmur.

²Ya Jou, noihene ahi demo-demo, natailako nohidodiai ahi daiana.

³Nohi gihene ahi böaka deʼ nohï riwo, ya ahi Koano deʼ ahi Jou Madutu.

⁴Hababu Ngonaika ngohi tomä niata, ya Jou, noihene ahi böaka o ngoru-ngorumino. O ngoru-ngorumino ngohi tao ahi huhuba deʼ todäma Ani bobaluhu ya Jou.

⁵Ngona Jou Madutu nö igoua o dorou; o nyawa madorou yakunua imä rekata Ngonaika.

⁶Ngona napoaua nä make o nyawa yoede-edenge, Ngona nä dohata o nyawa yododiai o dorou.

⁷Ngona nä binaha hagala o nyawa yöigo yoelu-eluku, yotipu-tipu deʼ yotoma-toma Ngona nä pulono okiaua yadaene.

⁸Mä karana Ani dora ma amoko, ngohi yakunu towohama Ani Tau magoronaika. Tohuba toma hitudukuku tameta Ani Tau itebi-tebinika deʼ toni huba Ngona dema horomati.

⁹Ya Jou, duru kamanga ngöe ahi haturu! Nohi tuda ngohi la tadiai Ani mau, deʼ nohi himatoko Ani ngekomo kokiani ngohi tanonu.

¹⁰ Hababu ahi haturu manga demo yakunua hangaku; toönanga manga hininga iomanga deo datoro madorou. Toönanga manga demo-demo imutiti nanga hininga yadaene; mä manga hininga madol̄a iomanga dema mela-mela.

¹¹Nä hukumu önanga ya Jou Madutu, mal̄aika önanga yobodito karana manga datoro mahirete. Nä duhu önanga karana mangöe toönanga manga baradoha, hababu önanga yomalawanoka Ngonaika.

¹²Tanu mata-mata o nyawa ima höhohongo Ngonaika yomorene deʼ ima uli-ulili kahiado-adonika. Nä hohongo hagala o nyawa duru iniö igo-igo, hupaya önanga kayo more-morene mangale Ngona.

¹³Hababu Ngona nahi barakati yososatia Ngonaika, Nä hohongo önanga de Ani dora.