Read Tobelo O MAZMUR 51 Bible Online

O MAZMUR 51 - Tobelo bible

O MAZMUR 51

¹Mangale yonyä nyanyi manga tutuda. O Mazmur o Daud watuli-tulihi

² ma Nabi Natan wïtaaere ünanga ipahaino karana wohowono de ongo Batsyeba.

³Nohï dora ngohi ya Jou Madutu, karana Ngona kahirahi nohï dora, naehe ahi baradoha karana Ani hayanga de Ani dora ilamoko.

⁴Nafoka hagala ahi dorou; nohi tebini tongohi ahi baradoha.

⁵Hababu tomangaku hagala ahi howono, ahi baradoha salalu tohohininga.

⁶ Ngonaika, ka Ngonaika dika ngohi tobaradoha, deʼ tadiai okianaga Napulono itorou. Done ipatutu Ngona nohi hukumu ngohi, i adili Ani putuhu.

⁷Igou-goungu, ngohi itorou kade madero tomakil̄auino, deʼ o baradoha ihi korona kade madero ngohi ayo ami mamatakahi.

⁸Ngona nogahoko o hininga iriko-rikoto; nohiomanga ahi hininga de Ani barija.

⁹Nohi tebini ngohi, done ngohi aha totebini; nohi ihoro ngohi, done ngohi aha iholoi toarehe deo kapasi.

¹⁰Mal̄aikala ngohi toihene o morene ma abari, hupaya o hininga Nawede-wederoka nënanga iuliloli.

¹¹Ani biono nohi niporo de hagala ahi baradoha, deʼ naehe hagala ani howono.

¹²Nadiai o hininga itebi-tebini mangale ngohi, ya Jou Madutu, nahungi ahi hininga madol̄a deo kuata ibitu-bitumu.

¹³Uha Ani himangoka de nohi umo ngohi, deʼ uha nal̄e Ani womaha itebi-tebini ngohioka.

¹⁴Nadiai tomorenoli karana o halamati Ngonaka deyaino, nohi hidöaka ngohi o hininga yöigo-igo mangale ihingounu Ngonaika.

¹⁵Done ngohi aha tädotoko Ani pareta o nyawa baradohaika, hupaya önanga imaiduloli Ngonaika.

¹⁶Ngohi nohihirehene o honenge, ya Jou Madutu ahi halamati, done de ahi morene aha tohingangahu Ani adili.

¹⁷Ya Jou, nohï riwo ngohi totemo-temo, done ngohi aha toni higogiriri Ngona.

¹⁸Ngona ani hininga yadaenua o huhuba yalui-luitika; hokanako ngohi toni huba o huhuba yatö tuhu-tuhuku, Ngona konö igoua.

¹⁹O huhuba ma Jou Madutuika ganga o hininga iwö wede-wedere, o hininga ima ponu-ponuku deʼ itoba Ngona natilaua.

²⁰Ya Jou Madutu, nohimatoko Ani oa o Sionika, nohi gokoli o Yerusalem mabebeno o mehele.

²¹Done Ngona aha nomodeke natarima o huhuba ipatu-patutu, o huhuba yatö tuhu-tuhuku deʼ o huhuba magahu-gahumu o hapi manauru aha ihi huba Ani huhuba mangï mal̄okuoka.