Read Tobelo O MAZMUR 57 Bible Online

O MAZMUR 57 - Tobelo bible

O MAZMUR 57

¹ Mangale yonyä nyanyi manga tutuda. Imoteke malugo: Uha nia binaha. O Daud ai Mazmur maöraha ünanga wopiringana o aruku magoronaika mangale woma hirehene de o Saul.

²Nohï dora ngohi, ya Jou Madutu, nohï dora ngohi, hababu Ngonaika ngohi tomahi dutuku. Ani gahuhu mahohohongo magoronaka ngohi toma ngiunu, hiädono o taufani ifae-fae iogoro.

³Ngohi toma hiboaka ma Jou Madutuika Duru Woko Kurutil̄e, ma Jou Madutuika wohi dodailako mangale ngohi.

⁴O horogaino Unanga wohi baluhu deʼ wohihihalamati ngohi; Unanga wähohihanga hagala o nyawa ihi tuku-tuku ngohi. Ma Jou Madutu aha wohidumutu Unanga wosatia ngohino, deʼ salalu wohï dora ngohi.

⁵Ngohi ihi higilolitino o haturu, önanga hokä o singa i ol̄o-ol̄omo o nyawa. Toönanga manga ingiri hokä o kuama deʼ o toimi, toönanga manga akiri hokä o dia madoto-doto.

⁶Ya Jou Madutu, nohidumutu Ani mulia o dihangoka, deʼ Ani mulia o dunia yamode-modekika.

⁷Ahi haturu ihi akana o modoi mangale ngohi, deʼ yatobiki ahi hininga mabuturungu. Onanga yohaiti o guhu ahi ngekomika, mä önanga mahirete yäotaka magoronauku.

⁸Ngohi tongaku tagoungu, ya Jou Madutu, ngohi tongaku ibitumu, ngohi tomau tonyanyi deʼ Toni higiriri.

⁹Hei nomomiki, ahi jiwa! Hei nimomiki o gambus deʼ o kecapi! Ngohi tomau tatumomiki tigi-tigi itebini madararono.

¹⁰Jou, ngohi tomau tosyukur Ngonaika hagala o hoana deo berera ma nyawa manga hidogoronaka. Tö igo tohi nyanyi o higiriri Ngonaika o umati o nyawa manga hidogoronaka.

¹¹Hababu Ani dora ilamoko hiädono o dihangil̄e, deʼ Ani satia hiädono o lobi-lobil̄e.

¹²Ya Jou Madutu, nohi dumutu Ani mulia o dihangoka, deʼ Ani mulia o dunia yamode-modekika.